Ɛzayi 64 - Ghena ta Shala

¹ nza katenza na kala ghwə nya ketse te təkwə, kala ghwə nya kewəvaɗe wəvaɗe yɛmə. Tsagha ne, katencɛ nda zləvəa ŋa na ke ka ghema ta ŋa. Katebare bare hwelefefi kwa kema ta ŋa,

² vəa ŋkwa nya temene wəshi meŋele nyi neghema ghen'yɛ na. Kaganda ne, katesawa na, kategaŋkəɗə yɛ ghweme kwa kema ta ŋa.

³ Kegha mbeli kafate, kegha mbeli kaveyite sleme yite, kegha ntsə kanakɛ kwete shala, keɗema gha, nya kemenete wəsə nya kala nya kaŋa mbeli nyi kevate ghə te we.

⁴ Kase na kezha begeme le mbeli nyi kezlama yitea mene wəsə nya kehi, mbeli nyi kezəzə zele hweŋkwa ta ŋa. Nahe na kehwepete wənə va nya nza ghen'yɛ kaka mene fete. Ama kwa hweŋkwa nyi vəashi nza ghen'yɛ kambele.

⁵ Nahe pɛtɛa n'yɛ kenza kala mbeli nyi wale wale, nahe slene ganjia n'yɛ kenza kala hame nya kareɗa. Nahe n'yɛ keghwele n'yɛ pɛtɛ kala sleke, kafə n'yɛ yɛ jaɗafa ta n'yɛ kala sefə.

⁶ Wəndə shɛ kazhɛne kahekɛme sləa ŋa we, wəndə shɛ kafeɗeghe kezha jikə geva le gha we. Kwa nza ŋkɛ ne, kaɗe na kazhɛne kanewe n'yɛ we, nahe na kepelave nda n'yɛ ke yɛ fete ta n'yɛ.

⁷ Mahwətə, ndagwara gha ya kayiteyɛa n'yɛ. Nahe ghen'yɛ kenza karekɛ ghene, gha ya kande ŋa n'yɛ kala ghene. Nahe pɛtɛa n'yɛ kenza kaslene ta dzeve ta ŋa.

⁸ Mahwətə, hwepema wənəa ŋa kwele kwele ma, zəzəma yɛ fete ta n'yɛ na kevə kevə ma. Ama təhwə təhwə newe n'yɛ pɛtɛ kambelia ŋa.

⁹ Nahe meleme ta ŋa nyi keveyi geva tekeleke kenza shalala, nahe Zhɛrəzalɛm kenza kaɓerama, nahe Siyon kenza kakwəfi.

¹⁰ Ma ghɛa n'yɛ nya keveyi geva tekeleke ba'a nya ganyɛ nya se ka shihɛ n'yɛ katsahe ŋa mbe ne, nahe ghwə keteremte ŋkɛ. Nahe ŋkwa nya ɗehwe nya n'yɛ kenza kakwəfi.

¹¹ Kwa kema ta pɛtɛa wəshi nyi ne, katenza ŋa na divə na Mahwətə? Katenza ŋa na tikə tikə ba'a kateve hawe na tsape tsape te ghen'yɛ na?