Ɛzayi 61 - Ghena ta Shala

Nde ghwene ta Mahwətə kancɛ ghəa ŋkɛ

¹ Nahe Sefəa Shala Mahwətə kenza kənəa 'ya. Kaganda ne, nahe Mahwətə keveyi ɗa tekeleke kezha zlape nda mɛnɛfɛa ghena ganyɛ ke ka dewə ŋeli. Nahe ŋkɛ keghwenakɛ ɗa kezha mbe mbeli nyi mehele ta nci ketaze taze, kezha geze nda nza kaka mamzashi ke mbeli nyi fəhwe mbeli, kezha geze nda nza waɗe ke mbeli nyi kwa daŋgayɛ,

² kezha zlape va ta zlaɓa ta Mahwətə, vecia wa dewa ta Shala ta ɓəmə, kezha gwəfə nda ghə ke mbeli mbe nehwene,

³ kezha ve nda zlave kepeɗe ghə ke mbeli nyi mbe nehwene mbe Siyon, kezha peɗe nda ghə ke hɛ le zlave ganyɛ te ŋkwa pəsəɗə nya yitea ghəa nci, kezha sheke 'wərdə zlama kənəa hɛ te ŋkwa nehwene, kezha seɗe nda lekwesa gəsəkə ke hɛ te ŋkwa nza keyirə yirə. Tagha gɛ, kateheka hɛ mbeli kahwemeke nyi keve zləvə te Shala, kantsa nya kencɛ zləvəa Mahwətə.

⁴ Katezhɛne hɛ kapa zli nyi vəashi, katezhɛne hɛ kaŋa ghɛ nyi keŋzlanji heca, katezhɛne hɛ kahi meleme nyi kebeze beze, ŋkwa nyi keŋzla ŋzla se teshi teshi.

⁵ Katenza ka se se teke kezha timɛti ba'a kwia ŋayɛ. Katewəza ŋayɛ wəza ba'a katekwahə yɛ rɛzɛŋea ŋayɛ kweci mbeli.

⁶ Ma gheyɛ ne, kateheka ŋayɛ mbeli “Kaka dzeghe melɛ ta Mahwətə”. Kateheka ŋayɛ slə mbeli “Kaka mene slene ta Shala ta ɓəmə”. Katezeme wəshia kweci hwelefefi yɛ ba'a katefege yɛ le zləvəa nci.

⁷ Nahe hawe kese kwele kwele te gheyɛ, yiɗə nya yiɗə ŋayɛ mbeli nde se kawəsəa ŋayɛ. Vatse tenza hɛɗia nci bake zhigə kaŋa ŋayɛ ba'a tenza yɛ mbe zlama nya kaghala ghala.

⁸ Kwa nza ŋkɛ ma 'ya, 'ya Mahwətə ne, wəsə nya kehi yaɗe 'ya, kaɗe ghərə ba'a mbəɗəkwə 'ya we. Kateve ŋayɛ zhɛme nya kehi 'ya, katemene jikə geva nya kaghala ghala 'ya le gheyɛ.

⁹ Kateɗepe hwelefe ta ŋayɛ kweci hwelefefi, kateɗepe ŋwalea ŋayɛ kweci mbeli. Kateɗepe hɛ mbeli pɛtɛ ketenewe hɛ kahwelefe nya wəpikɛ Mahwətə.

Zhɛrəzalɛm katsahe Mahwətə

¹⁰ Nahe Mahwətə kenza kazlama ta ɗa nya wəba, fare fare mehele ta ɗa tewəmbəreke Shala ta ɗa, kwa nza ŋkɛ nahe ŋkɛ keseɗete ɗa lekwesa ta mbele, nahe ŋkɛ keseɗaghe ɗa karalamea nza tiɗiɗi kala za makwa nya kepeɗekɛ ghə le zlave, kala makwa nya kenza bətə mbe wəshi kepesa geva.

¹¹ Kala nya pese wəshi hɛɗi ba'a kala nya pese wəshi nyi tsawete mbeli ntsa ne, tsagha tepese mbele ba'a tsahe Mahwətə kwa kema ta pɛtɛa hwelefefi.