Ɛzayi 60 - Ghena ta Shala

Katenza Zhɛrəzalɛm kawaŋea hɛɗi lema

¹ Zhɛrəzalɛm, sate meslete ba'a zhɛre ŋa kawaŋe, kwa nza ŋkɛ se yase waŋea ŋa, nahe zləvəa Mahwətə kesame kənəa gha.

² Nahe hɛɗi kenza bətə mbe ŋkwesle, nahe viɗi kezhiɓəaghe geva kənəa mbeli. Ama kənəa gha ne, katesame Mahwətə, kateɓele zləvəa ŋkɛ kənəa gha.

³ Katelə hwelefefi laka waŋe ta ŋa ba'a ka meghe laka ɓele ta same ta ŋa.

⁴ Kafete ghə ba'a newe ŋkwa nya dzeyi yitea gha: tsene yatsene geva hɛ pɛtɛ, se yase hɛ sha gha. Se yase ŋwale tezhilia ŋa se cakeɗake, nahe mbeli kefəte ŋwalea kwɛa ŋa yitea dzeve.

⁵ Ma ketenakɛ wəsəa shɛ na ne, katezlama na, katenza na hake ba'a katenza zlama kwa wənəa ŋa. Kwa nza ŋkɛ ne, katese mcɛlə nyi kwa ndərə sha gha, katese wəshi zləvəa kweci hwelefefi sha gha.

⁶ Katenza na bətə mbe wəvəsəa zlegweməa lɛmə, ŋwalea zlegweməa lɛmə nyi kese mbe Madiyan ba'a Ɛfa, katese se hɛ pɛtɛ se mbe Saba. Katefə mze kwa tere tere ba'a 'wərdə kwa hə hə hɛ kase, katezlape tsahe nyi te Mahwətə hɛ.

⁷ Katetsene ŋa geva timɛti ba'a kwi nyi mbe Kɛdar kase, katedzeghe melɛ na le gamea lɛmə nyi mbe Nebayot, katedzete reghwetɛa ɗa hɛ, katenza hɛ kamelɛ nyi zeɗehwe ɗa. Tagha gɛ, kateve zləvə 'ya te ghɛa ɗa.

⁸ Kawa pɛtɛa mbeli nyi wa? Nahe hɛ kenza kala ləmbə keɗema kala me ta yɛ gheɗepe te ghɛa nci.

⁹ Kagwəfə ghə hɛɗi nyi dzeyi te yɛmə le 'ya, kancɛ kema kwambelə nyi mbe Tarsis kezha fə ŋwale tezhilia ŋa se cakeɗake le mze kwa tɛawetɛa ta nci ba'a mze kwa tere tere ta nci. Kase hɛ kezha ve zləvə te 'ya, 'ya Shala Mahwətə ta ŋa, 'ya Shala nya kaganda ta Israyɛl, kwa nza ŋkɛ nahe ŋkɛ kendeke ŋa zləvə.

¹⁰ Katezhɛne ka se se kaŋa zlia ŋa, katemene ŋa slene ka meghea nci. Kwa nza ŋkɛ ne, nahe 'ya keɗate ŋa le wənə le wənə, ama mbe ganyɛa ɗa ne, katezhɛ heli 'ya yitea gha.

¹¹ Katenza yɛ mɛ degha ta ŋa teghwene kevə kevə, kateŋzle hɛ geva heveci keɗema heviɗi tɛape we. Tagha gɛ, katefə mcɛləa kweci hwelefefi mbeli kadzeki gha, tsagha ka meghea nci yite yite.

¹² Kateza sebe te hwelefe keɗema hɛɗia meghe nya keɗema mene ŋa slene. Rayɛ teza sebe te hwelefefia shɛhɛ.

¹³ Katese zləvəa Liban sha gha, sheghwəa vɛ, ŋa gwevɛre, ŋa vɛ kezha pesa ghɛa ɗa nya keveyi geva tekeleke. Tsagha ne, katencɛ zləvəa ŋkwa keŋkeɗe seɗa ta ɗa 'ya.

¹⁴ Katese mbeli nyi kese kasa ŋa yaka megwəɗəŋə megwəɗəŋə sha gha, kategwəɗəŋə pɛtɛa mbeli nyi kese kayiɗə ŋa yitea seɗa ta ŋa. Kateheka ŋa hɛ “Kameleme ta Mahwətə”, “kaSiyon ta Shala nya kaganda ta Israyɛl”.

¹⁵ Kenya nza na kewəfə wəfə, kaŋkwa nya ɗema mbeli ba'a kaɗema wəndə shɛ kadzeghwa mbe gha ne, kateve ŋa 'ya kawəsə farefa kaghala ghala, kawəsə zlama keshi keshi.

¹⁶ Katesa ŋ'wa ta kweci hwelefefi na, katezeme mcɛləa ka meghea kɛfi na. Tagha gɛ, kateɗepe na 'ya Mahwətə ya kande mbele ŋa, 'ya Shala nde berete ta Zhakob ya kande mbeɗe ŋa.

¹⁷ 'Ya katefə mze kwa tere tere kase te ŋkwa mze kwa ghwə ghwə, mze kwa tɛawetɛa te ŋkwa lɛ, mze kwa ghwə ghwə te ŋkwa sheghwə, lɛ te ŋkwa pelɛ. Te zlaɓa ta ɗa ne, katenza na mbe kwelɛŋe katedzeghwa na mbe nza tiɗiɗi.

¹⁸ Katezhɛne mbeli kafa mene berete te hɛɗia ŋa, ya beze keɗema ɗa te ghala ta hɛɗia ŋa we. Kateheka zlia ŋa na “kaMbele” ba'a yɛ mɛ degha ta ŋa na “kaTsahe”.

¹⁹ Katezhɛne veci kawaŋe ŋa ŋkwa heveci, ya tere heviɗi we. Kwa nza ŋkɛ 'ya Mahwətə nde tewaŋe ŋa ŋkwa keveci keveci, 'ya Shala ta ŋa nde teɓele ŋa ŋkwa.

²⁰ Katezhɛne vecia ŋa kapəkwə we, katezhɛne terea ŋa kaza we. Kwa nza ŋkɛ 'ya Mahwətə nde tewaŋe ŋa ŋkwa kaghala ghala. Katekiɗinji yɛ hɛa nehwene ta ŋa.

²¹ Katenza pɛtɛa mbelia ŋa kambeli nyi tiɗiɗi, katenza hɛɗi kaŋa nci kaghala ghala. Nahe 'ya kepate hɛ le dzeve ta ɗa kezha ncɛ zləvəa ɗa hɛ. Nahe hɛ kenza kala wəfe nyi mɓete 'ya.

²² Katenza mbeli slibə kwa pelə nya ɓɛhwɛ ma, katezhɛre nya dewə berete ma kahwelefe nya berete. Ma 'ya Mahwətə ne, katemene wəsəa shɛ 'ya kahe kahe, vəa ŋkwa nya tese vəa ŋkɛ.