Ɛzayi 58 - Ghena ta Shala

Səwəmayɛ nya zeɗehwe nda ke Shala

¹ Ma ke Shala gezete: «Tsa lewela le berete, fɛama ghəa ŋa na ma, gakate ŋwələa ŋa kala vɛ ta tereme. Geze nda yɛ fama ghena ta nci ke mbelia ɗa, yɛ jaɗafa ta nci ke mbelia Zhakob.

² Keveci keveci ne, kazele ɗa hɛ, kaɗe hɛ kaɗepe wəsə nya neghe 'ya va hɛ. Kala hwelefe nya kemene wəsə nya kehi ba'a nya kewəfəma wəsə mahalegəa Shala ta ŋkɛ hɛ. Ka'yɛwe meha ghwə nyi tiɗiɗi hɛ va 'ya, kamawe hɛ kanza 'ya terasle yitea hɛ.

³ Ndagwara ma ke hɛ sha geze ɗa: ‹Wa yakete n'yɛ mene səwəmayɛ keɗema na kanewe n'yɛ wa? Wa yakete n'yɛ shifə ghə le keɗema na kamare n'yɛ wa?› Tagha gɛ, ma 'ya zhɛnete: Ma te veci nya mene səwəmayɛ yɛ ne, slene ta ŋayɛ yamene yɛ ba'a yaka yasa nda yɛ ke ka mene ŋayɛ slene.

⁴ Ma te və nya mene səwəmayɛ yɛ ne, kaghəpə yɛ kwelɛ ghəa ŋayɛ ba'a kampa kweci mbeli yɛ le balema. Kenza laka mene səwəmayɛ nya kala nya nza səkwə ta ŋayɛ kafate geva pelɛ ghweme we.

⁵ Ma səwəmayɛ nya zeɗehwe ɗa ne, nahe nde keyipəte geva le nya kala nya na? Tsetse hi ŋkɛ kashifə ghə yɛ kwa kema ta ɗa na? Ŋa ghə kala ghwəvərə, hwepe wəsə hwa hwə, ɓelahe hwa hɛɗi yaheka yɛ kasəwəmayɛ, kaveci nya zeɗehwe ɗa na?

⁶ Wa nya səwəmayɛ nya zeɗehwe ɗa nya: pele mbeli nyi kwa zewe lɛ gəmə, kelemte sheghwə nya te welɛ va hɛ kala sla kewəza, ve nda nza waɗe ke mbeli nyi kesa yaka, geze ta ŋkɛ, zamte sebe te yayata wəsə nya keve hɛ kaka mavashi.

⁷ Nahe ŋkɛ kenza kanehe wəsə kezeme ta ŋa le wəndə nya shewə va ma, kave nda ŋkwa ke ka titikwəa kɛfi nyi ɗema ghɛa va hɛ, kaseɗe nda lekwesa ke mbeli nyi mederelaŋe. Kenza kazhɛre nda wəmbə ke menə helia ŋa we.»

⁸ Tagha gɛ, kateɓele waŋea ŋa kala kiɗi ta ŋkwa, katedzete zhɛvəalia ŋa na kahe kahe. Katedzeghwa nza tiɗiɗia ŋa te kema ta ŋa ba'a katenza zləvəa Mahwətə kwa sebe ta ŋa.

⁹ Ma te və nya tesəkwə ghə na ne, katezhɛne ŋa Mahwətə. Ma te və nya tetsa lewela na ne, «Wa nya 'ya nya», a ke sha tezhɛne ŋa. Ma kezamte sebe na te wəsə nya kesa nda yaka ke mbeli, te cɛɗɛ ŋkwa, te ghena nyi kezhɛ ŋkwa te hɛɗia ŋa,

¹⁰ kenza na kanehe wəsə kezeme ta ŋa le wəndə nya shewə va ma ba'a kenza na kave nda wəsə kezeme ke nde dewə berete ne, katesame waŋe ta ŋa hwa ŋkwesle, katenza ŋkwesle ta ŋa kala nza ta veci kwa ghə.

¹¹ Katencɛ ŋa hweŋkwa Mahwətə kevə kevə. Ya kwamte te ɓerama ne, katebehe ŋa ŋkɛ ba'a kateve ŋa berete ŋkɛ. Katenza na kala ntsa nya ncɛhwɛaɓɛ, kala wəfe nyi gə nda yɛmə mbeli, kala ghwa nya kiɗima yɛmə kwa.

¹² Katezhɛne na kaŋa kwəfi nyi vəashi, katezhɛne na kaŋa shihə nyi kewəfəyite geva heca. Ma ke mbeli sha teheka ŋa slə: «Hwelefe nya kesekawe zli ba'a nya kehi hweŋkwa nyi mbe meleme.»

Vecia zhɛne mpi nya zeɗehwe nda ke Shala

¹³ Ma keɗema na kadzeghwa te veci kezhɛne mpi keɗema kamene slene ta ghəa ŋa te veci nya keveyi ɗa geva tekeleke, kenza na kaheka veci kezhɛne mpi “kaZeɗe nza”, veci nya keveyi ɗa geva tekeleke, 'ya Mahwətə “kaZləvə”, kenza na kahawe ve, kaɗema na kadzeghwa, kamene slene ta ghəa ŋa ba'a kaghəpə ne,

¹⁴ katezlama na te 'ya, 'ya Mahwətə, katedzeghwa 'ya le gha dzeyi pelɛ ghweme nyi te hɛɗi, kateve ŋa fa deme 'ya te hɛɗi nya kemave shia ŋa Zhakob kaŋa ŋkɛ. Nya ya kaghena nya gezete Mahwətə.