Ɛzayi 54 - Ghena ta Shala

Kezhɛne Zhɛrəzalɛm kanza kewəfə wəfə we

¹ Zhɛrəzalɛm, tsa yɛyi, gha nya kamale jɛŋa, nya kezhɛnema kayake ŋwale. Tsa yɛyi ba'a wetse, gha nya kezhɛnema kaɗepe zhɛ ta ya ta wəzege. Ma ke Shala sha gha: «Ma gha nya kamale nya kewəfə wəfə ne, kwele kwele ma ŋwale va gha ke male nya yitea za.

² Wədəɗəte cɛ lekwesa ta ŋa, nteɗete yɛ zlave ta ŋkwa kenza ta ŋa, ɓelama wəshi nyi teza na yite na ma, mtsehete yɛ zewe ta cɛ lekwesa ta ŋa ba'a baŋeyi yɛ sheghwəa ŋa kwa hɛɗi gərə gərə.

³ Kwa nza ŋkɛ ne, katembake bezle na jive laka bela kwa zeme ba'a laka bela kwa gwela. Katekele hɛɗi nyi dzeyi yitea gha hwelefefia ŋa kaŋa nci, katezhɛne hɛ kanza mbe meleme nyi wəfəyite nyi mbeli.

⁴ Ghazlənəma na ma, katezhɛne hawe kanza te gha we. Nzama na keteŋwesle teŋwesle ma, katezhɛne mbeli kaŋele ŋa we. Katezaghə hawe nya se kawəzha makwa na, katezhɛne na kazəzə ŋ'wəshi nya te gha vəa ŋkwa nya se na kawede we.

⁵ Kwa nza ŋkɛ nde pate ŋa ya kaza ŋa, Mahwətə nde berete ya kasləa ŋkɛ. Shala nya kaganda ta Israyɛl ya kande mbeɗe ŋa, gheŋkɛ yaheka mbeli kaShala ta hɛɗi lema.

⁶ Kala male nya wəfəyite mbeli ne, keteŋwesle teŋwesle se mehele ta ŋa. Ama ma ke Mahwətə gezete ŋa: Tsema nza wəndə kaŋkamte male mempɛhweta nya ntave wəndə wa? Shala ta ŋa nde gezete.

⁷ Nahe 'ya kewəfəyite ŋa kavə ɓɛhwɛ, ama katezhɛne ŋa 'ya kase mbe ɗe nya wəba.

⁸ Ma va wəba ta beze ta wənəa ɗa va gha ne, nahe 'ya kezhɛrave ŋa wəmbə kavə ɓɛhwɛ, ama mbe ɗe nya keɗema kakiɗi ne, 'ya kancɛ ŋa ganyɛa ɗa. 'Ya Mahwətə nya kembeɗe ŋa nde gezete ŋa.

⁹ Katemene 'ya ɓeshi kala nya te vəa Nowɛ: nahe 'ya kemeɗeyi kaɗema yɛmə nya wəba kazhɛne kaza hɛɗi. Tsagha shɛ ne, 'ya kameɗe ɓeshi kaɗema kazhɛne kahwepe wənə va gha, kaɗema kazhɛne kaŋele ŋa.

¹⁰ Wərə yɛ ghweme kagaŋkəɗə, wərə yɛ wəmbə kambeɗete ŋkwa, ama katezhɛre pa ɗe ta ɗa laka gha, kategaŋkəɗə jikə geva ta zeɗe nza nya menete 'ya le gha we. 'Ya Mahwətə nya kencɛ ŋa ganyɛa ɗa nde gezete ŋa.»

Zhɛrəzalɛm nya te kwete hɛ

¹¹ Ma ke Shala: «Zhɛrəzalɛm nya nza ndiremi te, keŋzla ŋzla na va sefə nya wəba, wəndə shɛ kezha gweɗakwe ŋa we. Ma 'ya, 'ya Mahwətə ne, 'ya kateŋa ŋa le pelɛ nyi kerafe rafe, kateve shihəa ŋa le pelɛ nyi kakwa lɛa lɛa ghweme.

¹² Katemene pelɛ nyi kakwa ghɛmɛ 'ya dzeyi te zlia ŋa, katenza yɛ gelembe ta ŋa kakwacaregesla nyi welɛlɛ, katenza zli nya yitea gha le pelɛ nyi nza zləvə te hɛ.

¹³ Katenza pɛtɛa ŋwalea ŋa kaka təkwə təkwə ɗa, 'ya Mahwətə, katenza ŋwalea ŋa mbe zeɗe nza nya wəba.

¹⁴ Katenza na dɛŋe dɛŋe te nza tiɗiɗi, wəndə shɛ katezhɛne kasa ŋa yaka we, wəsə shɛ katezhɛne na kaghazlənə ve we. Wəndə shɛ katezhɛne kadake ŋa we, katezhɛne na kanza hweredzekwe we.

¹⁵ Ma kehave ŋa mpa wəndə ne, va 'ya tese ŋkɛ we. Ma yayata wəndə nya keteha ŋa mpa ne, kateteɗe ŋkɛ mbe kema ta ŋa.

¹⁶ Newema gi, 'ya nde pate nde gezla nya ketsa vɛsə ba'a nya kegezla mama ta wəshi kempa. 'Ya nde pate nde za sebe te hɛ ɓiyitsa.

¹⁷ Ma yayata wəsə kempa nya kegezlate geva yitea gha ne, wəsə kwa ndiremi shɛ katemene ŋa ŋkɛ we. Ma yayata wəndə nya keleghe ŋa kadzete ghwə ne, kateve nda fete na te ghwə. Nya ya kawəsə nya wəmbə 'ya ke ka mene slene ta ɗa, 'ya Mahwətə, nya ya kanza tiɗiɗi nya teve nda 'ya ke hɛ. 'Ya Mahwətə nde gezete.»