Ɛzayi 50 - Ghena ta Shala

Nehe shɛ kwelɛ yɛ Shala le mbelia ŋkɛ we

¹ Wa nya ghena nya geze Mahwətə nya: «Ma ya kaganda ŋkamte Zhɛrəzalɛm, meyɛ ŋayɛ 'ya ne, ncɛte ɗa mə palepa ta ŋka nya ŋkamte ŋkɛ 'ya ga? Keɗema gezete ɗa mə wəndə nya pamte nda ŋayɛ 'ya kaka mavashi kezha ŋki dewa nya hwa 'ya ga? Tewəmbəreke fete ta ŋayɛ pamte geva yɛ, va fama ghena ta ŋayɛ ŋkamte geva meyɛ ŋayɛ.

² Ma kwa se 'ya ne, va wa ɗema 'ya kesləyi wəndə wa? Ma kwa heka ŋkwa 'ya ne, va wa ɗema wəndə kekwaɗe wa? Dzeve ta ɗa nza kebaslɛnyɛ kezha mbele ŋkwa na? Berete ɗema va 'ya kezha mbeɗe ŋkwa na? Ndagwara deke le ŋgezle ta ɗa ne, kahase ndərə 'ya, kazhɛre yɛ hələ 'ya kaɓerama. Tagha gɛ, kampə yɛ kelepe va titikwə yɛmə, kadaɗə hɛ.

³ Kazhiɓə ghweme 'ya le ŋkwesle, kahwepe nda zewe 'ya hwa hwə.»

Ve nda ghə ke Shala mbe yaka

⁴ Nahe Shala Mahwətə kendeke ɗa ghɛni ganyɛ kezha ɗepe gweɗakwe nde dewə ŋeli 'ya. Kala kiɗi ta ŋkwa ne, kafeɗeghe ɗa ŋkɛ ba'a kateke ɗa fa ghena ŋkɛ kala nya fa ka təkwə təkwə.

⁵ Nahe Shala Mahwətə keghwenemte sleme ta ɗa. Tagha gɛ, kese 'ya kazhɛne nda ghə we, kese 'ya kazhɛne geva dzeyi te sebe we.

⁶ Nahe 'ya kezhɛrave nda wəmbə ke ka se kaɗa ɗa, yɛ ghweleme ta ɗa ke ka se kaŋkwətsə ghwɛmɛa ɗa. Kese 'ya kazhɛre kema ta ɗa va yɛ ŋele ba'a va yɛ ndɛghwɛɗɛ we.

⁷ Ama nahe Shala Mahwətə kekemanakɛ ɗa, vatse ɗema yɛ ŋele kese katsewe te 'ya, vatse ntsəte geva ghəa ɗa ntɛaŋe ntɛaŋe kala pelɛ, nahe 'ya keɗepete kateɗema hawe kazhɛ ɗa.

⁸ Nahe nde ve ɗa kaganda kenza dekwe yitea 'ya. Wa nde tenteɗe ɗa mɛa ŋkɛ wa? Dzete ghwə ŋkɛ le 'ya ga! Wa nde ɗe kanza kande ghema ta ɗa wa? Hende ɗa geva ŋkɛ kase ga!

⁹ Shala Mahwətə nde tekemane ɗa. Wa nde teve ɗa fete wa? Kweciɓə ciɓə tezemenji ka ghema ta ɗa kala lekwesa nya zehwe lema.

¹⁰ Wa nde hawe va Mahwətə hwa gheyɛ wa? Fa ghena ta nde mene slene ta ŋkɛ ŋkɛ. Wa nde dzeghwa hwa ŋkwesle kaɗema ghwə ve wa? Ndeke nda wənəa ŋkɛ ŋkɛ ke Mahwətə ba'a dɛŋate geva ŋkɛ te Shala ta ŋkɛ.

¹¹ Ma gheyɛ pɛtɛa mbeli nyi kemeha ghwə, gheyɛ nyi nza have nyi tse ghwə te hɛ va gheyɛ ne, kwiɗi mə kadzembe tse ta ghwə ta ŋayɛ, te tepe ta have nyi ndəate ghwə yɛ te hɛ. Gheŋkɛ ya kazhɛme nya wəmbə ŋayɛ 'ya. Katempə yɛ mbe yaka nya wəba.