Ɛzayi 38 - Ghena ta Shala

Zereghwe ba'a mbe ta Ɛzɛkiyas

¹ Ma vəa ŋkwa shɛ ne, pa zereghwe kemte keseve Ɛzɛkiyas. Hwa'a nde mɛ ŋkwa Ɛzayi, wəzege ta Amots se kanewe ŋkɛ, ma ke shɛ: «Wa nya ghena nya geze Mahwətə nya: Geze nda ghena ta ŋa ke mbelia ŋa, kwa nza ŋkɛ ne, katembele na va zereghwe nya we.»

² Tagha gɛ, pa Ɛzɛkiyas zhɛrete kema kadzembe dewe ba'a səkwəte Mahwətə:

³ Ma ke: «Mahwətə yawe, təhwə təhwə ŋa 'ya, zəzəte dzeghwa nya dzeghwahwe 'ya tiɗiɗi ba'a mbe kaganda kwa kema ta ŋa, nahe 'ya kemenete wəsə nya zeɗehwe ŋa.» Ma kwa sebe ta ŋkɛ ne, pa Ɛzɛkiyas nehwenakawa nehwene kwele kwele.

⁴ Tagha gɛ, ma ke Mahwətə sha Ɛzayi:

⁵ «Kwiɗi shɛ na gezete nda ke Ɛzɛkiyas: Wa nya ghena nya geze Mahwətə, Shala ta shia ŋa David nya: Nahe 'ya kefate səkwə ta ŋa ba'a nahe 'ya kenakɛ nehwene ta ŋa. 'Ya katemtsehe ŋa temə teghweme kava meŋe mcɛfeghəmbe.

⁶ Katembele ŋa 'ya, tsagha meleme nya shave mbe dzeve ta meghe nya mbe Asiri. Kateya meleme nya 'ya.»

⁷ Wa nya wəsə kencɛ wəsə nya kese va Mahwətə, nya ketencɛ ŋa katemene wəsə nya gezete ŋkɛ Mahwətə nya:

⁸ Ma te taŋa ta Ahaz nya kese te veci ne, nahe shenaŋkwe kedzawanyɛ. Yawa, katehende ŋkɛ Shala kadzeme kataŋa meŋe. Tagha gɛ, nahe veci kezhɛneke geva kataŋa meŋe nyi kese te shenaŋkwe.

Səkwə ghə ta Ɛzɛkiyas kwa sebe ta mbe ta ŋkɛ

⁹ Ghena ta Ɛzɛkiyas, meghea ka Zhəwda, vəa ŋkwa nya se ŋkɛ shewə ba'a nya slerahwe zereghwe ta ŋkɛ ŋkɛ.

¹⁰ Ma 'ya sha se kageze mbe ghəa ɗa: Deke bela ta vəa ɗa teghweme yakiɗimte 'ya, katedzeghwa ɗa 'ya, kwa ghɛa mbelia kwahɛɗi tekiɗi va ta ɗa nyi ketene 'ya.

¹¹ Ma 'ya sha se kageze zhɛkwa: Katezhɛne 'ya katenakɛ Mahwətə te hɛɗia mbeli nyi teghweme we. Wəndə shɛ katezhɛne 'ya katenakɛ hwa mbeli nyi te hɛɗi lema we.

¹² Nahe mpia ɗa kezləgwəhwe geva ba'a kekelemte geva cakeɗake yitea 'ya kala cɛ lekwesa ta nde ya wəshi. Katepeɗe mpia ɗa 'ya kala zlave nya peɗe nde tsa zlave. Nahe pawa nyi te keŋslenji. Ma nda tepəkwə veci ne, katekiɗi ɗa na.

¹³ Ma nda tekiɗi ŋkwa ne, gəmə tenza 'ya. Nahe ŋkɛ kempeɗemte pɛtɛa 'yɛ'yɛa ɗa kala nivɛrə. Ma nda tepəkwə veci ne, katekiɗi ɗa na.

¹⁴ Kala ndɛhwepɛ ghweghwɛa mɛ 'ya, kala ghwəɗəŋkwə ŋələvə 'ya. Leɓakwe ntsə ta ɗa va newe ŋkwa dzeme yitea ghweme. Mahwətə, kedene dene 'ya, kemane ɗa.

¹⁵ Tsema 'ya sha tegeze kezha zhɛne ɗa ŋkɛ, kwa nza ŋkɛ gheŋkɛ nde mene slene ta ŋkɛ tse wa? Kakele ɗa hɛ va wəba yaka nya te 'ya we.

¹⁶ Mahwətə, nahe na keɗepe wəsə nya kemenete ɗa geva, nahe na kezhɛne kandeke ɗa nza teghweme. Nahe na kendeke ɗa berete, nahe na kendeke ɗa nza teghweme.

¹⁷ Nahe yaka ta ɗa nya dzawe kezhɛrenyɛ kazeɗe nza. Kwa nza ŋkɛ kwele kwele ɗehwe ɗa na, vatse weslemte ɗa na va mte. Nahe na kebeteyi pɛtɛa jaɗafa ta ɗa kwetere ghəa ŋa.

¹⁸ Ma kwa ghɛa mbelia kwahɛɗi ne, wəndə shɛ katsahe ŋa we. Kave zləvə mbeli nyi kempə mpə te gha we. Ma mbeli nyi kedzawa kwele ne, kazhɛne hɛ kave ghə te ɗe ta ŋa we

¹⁹ Deke mbeli nyi teghweme ka tsahe ŋa kala 'ya ɓeshi nya tse. Kategeze nda ɗe ta ŋa yita ke ŋwalea ŋkɛ.

²⁰ Mahwətə, nahe na kembelete ɗa. Tsetse gɛ ne, katetsahe ŋa n'yɛ le wəshi ketsa kala pɛtɛa hɛa n'yɛ teghweme mbe ghɛa ŋa, gha Mahwətə.

²¹ Ma kwa sebe ta ŋkɛ, ma ke Ɛzayi: «Keleke ghwempe ta ya ta dasekwa shɛ mbeli menate te ŋkwa nya kwəzləvə kezha mbe meghe.»

²² Ma ke Ɛzɛkiyas: «Te wa nza 'ya kaɗepe katezhɛne 'ya kadzeme ghɛa Mahwətə wa?»