Ɛzayi 34 - Ghena ta Shala

Meha ta ghwə te Ɛdom

¹ Hwelefefi, hende mə geva kase kezha fa ghena, mbeli, kese mə mehele. Fa ghena yɛ hɛɗi le pɛtɛa wəshi nyi te! Fa ghena yɛ hɛɗi lema le pɛtɛa wəshi nyi kemene te!

² Nahe wənəa Mahwətə kehwepe va pɛtɛa hwelefefi, nahe wənəa ŋkɛ kebeze va pɛtɛa ka sewajɛa nci, nahe ŋkɛ ketarete kaza sebe te hɛ, nahe ŋkɛ keveyi hɛ kezha mpə.

³ Selekə lekə mbeli nyi kempə mpə te hɛɗi, keda da zəŋwə geva ta nci, kala ghwa hwɛ mimia nci sawa hwa yɛ ghweme.

⁴ Katencɛncɛhwe geva pɛtɛa wəshi nyi te ghweme, katepeɗe geva ghweme kala palepa. Katebete pɛtɛa wəshi nyi te ghweme kala slekea rɛzɛŋe keɗema ŋa dasekwa.

⁵ Nahe kafayɛa ɗa kebehe pelɛ ghweme, sawa yasawa ŋkɛ kadzeghəa Ɛdom, kadzeghəa mbeli nyi tarete 'ya kaza sebe te hɛ.

⁶ Bətə kafayɛa Mahwətə mbe mimi, kededənə dedənə va merege, kala mimia gamea lɛmə ba'a zhɛfa lɛmə, kala merege nya te yɛ ghwelese ta gamea lɛmə. Melɛ kezha Mahwətə ya shɛ mbe Bosra, mpə ŋkwa nya wəba ya te hɛɗia Ɛdom.

⁷ Kanya kwetɛŋe tebete yɛ sla gamba, mcɛmcɛli ba'a yɛ sla. Behe tenza hɛɗi va mimi, katededənə keləwə va merege.

⁸ Vecia wa ghena ŋkɛ kaŋa Mahwətə, va ta meha ghwə ŋkɛ tewəmbəreke Siyon.

⁹ Kala ɗəkə tezhɛre yɛ hələa Ɛdom, kala ghwə ta gezla tenza keləwəa ŋkɛ. Kala ɗəkə nya tse ghwə te tenza hɛɗia shɛ.

¹⁰ Katemte ŋkɛ heviɗi keɗema heveci we, geɗeɗe tenza n'yia ŋkɛ kaghala ghala. Keshi keshi tenza hɛɗia shɛ kaɓerama, wəndə shɛ katezhɛne kadzeghwa te we.

¹¹ Katenza təwəvəŋə ba'a haheyisə dzeyi te, katenza təwəvəŋə gamba ba'a ghame dzeyi te. Kateza sebe Mahwətə te hɛɗia shɛ. Katenza ŋkɛ kala shaka shaka ta ŋkwa nya shɛ nda tepate geva hɛɗi lema.

¹² Katezhɛne mbelia jama jama kanza shɛ kezha nta meghe te we, kateza sebe te pɛtɛa mbeli nyi te ghə.

¹³ Katepese yɛ tigə dzeyi ki ghɛ ganji, katenza yɛ tigə kwara ba'a yɛ ndəŋwə dzeyi te zli. Katenza ŋkɛ kaŋkwa kenza ta yɛ kelɛ gamba, kaŋkwa kebeke ta yɛ zhenɛgə.

¹⁴ Katebegeme yɛ wəve ba'a yɛ deghwavaŋwe te, katetsene ghəa nci zhɛfa lɛmə te. Tagha ne, katenza Lilit nya ka'ye'yighwə perə, tagha teŋ'we ŋkwa kezhɛne mpi ŋkɛ.

¹⁵ Katela ghɛa ŋkɛ shishi te, kateya yɛ slesle ta ŋkɛ ba'a katevereghe hɛ ŋkɛ pa te ntsa ta nci. Katetsene ghəa nci yɛ zleŋa te.

¹⁶ Ma kezele palepa ta Mahwətə yɛ ne, wərə yɛ kajaŋgate ghena nyi mbe: Kwete shɛ hwa wəshi keseɗa nyi kaɗema shɛ we, kwete shɛ kaɗema tagha we. Kwa nza ŋkɛ ne, Mahwətə nde gezete hɛ, sefəa ŋkɛ nde tsenete hɛ.

¹⁷ Gheŋkɛ nde slate nda kwasheghediɗi ke hɛ, dzeve ta ŋkɛ nde neheve nda hɛɗi ke hɛ le zewe. Katenza ŋkɛ kaŋa nci kaghala ghala, katenza ghɛa nci te keshi keshi.