Ɛzayi 32 - Ghena ta Shala

Meghe nya tiɗiɗi

¹ Tagha gɛ, katesleke ŋkwa meghe laka nza tiɗiɗi, katemene slene mbeli nyi te ghə le hweŋkwa ta ŋkɛ.

² Katenza yayata wəndəa nci kala ŋkwa kewəfərə va sefə, kala ŋkwa kewəfərə va va nya wəba, kala hələ nya kehwɛ te ɓerama, kala shenaŋkwe ta gela nya wəba te hɛɗi nya ŋ'wara.

³ Katezhɛne ntsə ta mbeli nyi kenewe ŋkwa kedərəzlə dərəzlə we, megela tefa ghena sleme ta mbeli nyi kefa ghena.

⁴ Katefave ghena mehele ta ka dewə zəzə, kategeze ghena ka ɓeɓəa kɛfi kahe kahe ba'a tiɗiɗi.

⁵ Katezhɛne mbeli kaheka nde dewə mehele kawəndə nya nza zləvə te we, katezhɛne mbeli kaheka nde mbəɗəkwə kawəndə nya nza zləvə te we.

⁶ Kwa nza ŋkɛ ne, ghena gezhi yageze ka gezhia kɛfi. Wəsə nya ndiremi yazəzə hɛ, wəshi nyi ndiremi ndiremi kashasha yamene hɛ ba'a Mahwətə yaŋele hɛ. Kaɗa nda wəsə kezeme hɛ ke wəndə nya shewə va ma we, kasa nda yɛmə hɛ ke wəndə nya shewə va ndere we.

⁷ Ma ka mbəɗəkwəa kɛfi ne, wəshi nyi ndiremi ndiremi yamene hɛ, Kasepa ntsehwele hɛ kezha za ka titikwəa kɛfi laka ghena tseŋwə. Ndagwara berete ya'yɛwe ka titikwəa shɛhɛ.

⁸ Ama mbeli nyi nza zləvə te hɛ ne, ghena nyi tiɗiɗi yazəzə hɛ, deke slene ganji yamene hɛ.

Te ghəa mi nyi mbe Zhɛrəzalɛm

⁹ Mi nyi sheshɛrɛayɛ, sate mə te ŋkwa, fa ɗa mə ŋa ɗa! Ŋwalea kwɛ nyi kegezleŋema ghə, ve mə sleme yitea ghena nyi tegeze 'ya:

¹⁰ Tene va kwetɛŋe le hɛ ɓɛhwɛ ne, katenza yɛ keyirə yirə, gheyɛ nyi kegezleŋema ghə nyi. Kwa nza ŋkɛ ne, katenza rɛzɛŋe shɛ kezha nda we, katenza mene wəshi shɛ se te wəve we.

¹¹ Bare bare mə, gheyɛ nyi sheshɛrɛayɛ, nza mə keyirə yirə, gheyɛ nyi kegezleŋema ghə seɗemte mə lekwesa ta ŋayɛ, nza mə mederesakwe ba'a hwepahwe mə wəshi hwa hwə.

¹² Ghɛve ghɛve mə hate ta ŋayɛ, nehwene mə yitea wəve ganji ba'a yitea rɛzɛŋe nyi ŋkerɛape ŋkerɛape,

¹³ yitea hɛɗia mbelia ɗa nya kepeseke yɛ tigə, yitea pɛtɛa ghɛ nyi nza zlama ki mbe meleme nya nza gəsəkə mbe.

¹⁴ Kwa nza ŋkɛ nahe ghɛ meghe kewəfəyite geva, nahe meleme nya kegaka kesərəakɛ geva. Nahe ghedəkwəa Ofɛl ba'a cɛ nya biya kenewe ŋkwa kezhɛrenji kahɛɗi nyi kewəfəyite geva kaghala ghala. Katezlama kwara lɛmə gamba yitea hɛ, katezeme gwəzə wəshi keseɗa te hɛ.

Kateshave kwelɛŋe mbe nza tiɗiɗi

¹⁵ Ma te kwete veci ne, katevɛ sefəa ŋkɛ Shala kənəa gheɓəmə. Tagha gɛ, katezhɛre hɛɗi ɓerama kantsa ta wəfe ba'a katenza ntsa ta wəfe kala ghɛa wəfe.

¹⁶ Katenza wəsə nya tiɗiɗi te ɓerama, katenza nza tiɗiɗi kwa ntsa ta wəfe.

¹⁷ Kateshave kwelɛŋe mbe nza tiɗiɗi, katekele nza gwezlayɛ ba'a nza gweɗakwe ŋkɛ kase kaghala ghala.

¹⁸ Katenza mbelia ŋkɛ te hɛɗia kwelɛŋe dzeyi ki ghɛ nyi gezleŋema ghə mbeli va hɛ, dzeyi te ŋkwa nyi gwezlayɛ gwezlayɛ.

¹⁹ Ama katebete kwacakelɛ kənəa ghɛa wəfe, kateŋzla meleme kadzete hɛɗi.

²⁰ Zlama nde tenza va gheyɛ: katetsawe wəshi te yayata ŋkwa nya nza yɛmə, katepele sla ba'a kwara yɛ waɗe.