Ɛzayi 3 - Ghena ta Shala

Beze nya te hɛɗia Zhəwda

¹ Katendaŋe Zhɛrəzalɛm ba'a hɛɗia Zhəwda Shala Mahwətə nde berete te pɛtɛa wəshi kezeme ba'a yɛmə. Katefəmte mbeli nyi kekemane hɛ ŋkɛ shave hwa hɛ:

² ka katsala kɛfia ka sewajɛ ba'a kweci ka sewajɛ, ka meha ghwə ba'a ka mɛ ŋkwa, ka ŋa zlera ba'a mbelia jama,

³ mbelia jama ta ka sewajɛ ba'a mbeli nyi nza zləvə te hɛ, ka ncɛ ntsehwele, ka ɗepemte mene ghwɛ ba'a ka ɗepemte gepe ŋkwa kwa weta.

⁴ Ma ke Shala gezete: «Kateve ka dɛgwəa hɛɗi 'ya te ghəa nci kezha sleke hɛ hɛ kala ɗe ta nci.»

⁵ Katememene berete mbeli kwelɛ ghəa nci, yayata wəndə te nde ghedəkwəa ŋkɛ: katesa nda yaka ka dɛgwəa hɛɗi ke ka meha mehɛɗi ba'a wəshia kwadanjia mbeli ke mbeli nyi nza zləvə te hɛ.

⁶ Katekese wəza yitenyɛ, wəndə nya kwa peləa ŋkɛ kwete wəndə, ma ke sha tegeze nda: «Karalame ya va gha, nza te ghəa ɓəmə, kelete beze nya wəba nya mbe dzeve ta ŋa!»

⁷ Te vecia shɛ, ma ke kwete wəndə sha tegeze: «Kenza 'ya kande mbe ŋkwa we. Wəsə kezeme keɗema karalame shɛ ki ghɛa ɗa we. Kaveyi ɗa yɛ kawəndə nya te ghəa mbeli we.»

⁸ Teɗe yateɗe Zhɛrəzalɛm, ŋzla yaŋzla Zhəwda. Nahe ghena ta nci ba'a slene ta nci laka Mahwətə kenza kafama ghena kwa kema ta zləvəa ŋkɛ.

⁹ Nta ghala ta nci nde ve nda fete ke hɛ. Darahwe geze jaɗafa ta nci hɛ kala ka Sodome, kawəfərə hɛ hɛ we. Amaga, ndiremi yahi nda hɛ ke ghəa nci.

¹⁰ Geze mə katenza zlama va mbeli nyi tiɗiɗi, kwa nza ŋkɛ katefa deme hɛ te slene ta nci.

¹¹ Wa nya ndiremi te ka 'yaghwa mehele gɛ! Pɛtɛ tenza wəshi ndiremike kaŋa nci. Katemene nda mbeli ke hɛ kala wəshi nyi menete hɛ.

¹² Ma ke Shala: «Mbelia ɗa, ŋwalea fəshi ka sa ŋayɛ yaka, mi ka sleke ŋayɛ. Mbelia ɗa, gheyɛ yaghwete mbeli nyi te ghəa ŋayɛ, kadzawa hweŋkwa nya ndiremi beghe ŋayɛ hɛ.»

Ghena nya kwelɛ yɛ Mahwətə le mbeli nyi te ghə

¹³ Nahe Mahwətə kesate te ŋkwa kezha ve nda fete ke mbeli, nahe ŋkɛ keghereŋe kezha meha ghwə te mbeli.

¹⁴ Nahe Mahwətə kefəke mbelia jama ba'a mbeli nyi te ghəa mbelia ŋkɛ kadzete ghwə, ma ke sha hɛ: «Gheyɛ ka bezemte wəvea rɛzɛŋea ɗa, nahe yɛ keviɗikɛ ghɛa ŋayɛ le wəshi nyi fəhwe yɛ va ka titikwəa kɛfi.

¹⁵ Kezha wa sa nda yaka yɛ ke mbelia ɗa ba'a mene berete yɛ te ka titikwəa kɛfi wa?» Nya ya kaghena nya geze Shala Mahwətə nde berete.

Mi nyi ndeɗe ndeɗe mbe Zhɛrəzalɛm

¹⁶ Ma ke Mahwətə: Ma va nya mene fege mi nyi mbe Zhɛrəzalɛm ba'a nya dzeghwa hɛ le ɓele welɛ kezha ghwelɛaɗɛ ŋkwa, va nya mteyi dzeghwa hɛ kezha gaka takase nyi kwa seɗa ta nci ne,

¹⁷ kateŋsə ghəa nci Mahwətə dɛrɛŋe rɛŋe, faɗake ɗake tenza kema ta nci.

¹⁸ Ma te vecia shɛ ne, katefəmte wəshi kepesa geva Mahwətə te hɛ: takase nyi kwa seɗa, wəshi kepesa nyi kala veci keɗema kala tere,

¹⁹ wəshi nyi mbe sleme, takase nyi kwa dzeve, zlave kegaɓe kənəa ghə,

²⁰ getse nyi yitea ghə, livə nyi kwa seɗa, hətə kedzehwa hwə nyi ketsa tsa, yɛ laya, yɛ mbelaza,

²¹ yɛ ŋgwedɛba, yɛ geɗə,

²² lekwesa ganji, yɛ rewebe, yɛ salabi, slibə nyi yitea dzeve,

²³ yɛ deraŋgale, tɛagware pawa, yɛ zlave ba'a yɛ paramale.

²⁴ Zəŋwəa wəshi nyi kedanji nde tenza te ŋkwa 'wərdə, zewe nde tenza te ŋkwa hətə nya hwa hwə, ŋsə ghə nde tenza te ŋkwa ndere ghə, behwe nde tenza te ŋkwa lekwesa ganji, wəshi hawe ka tenza te ŋkwa ndeɗe.

Ka wedidi nyi mbe Zhɛrəzalɛm

²⁵ Zhɛrəzalɛm, katempə mbelia ŋa va kafayɛ, katempə ka katsala kɛfia ka sewajɛa ŋa kwamte mpa.

²⁶ Tagha gɛ, kateŋgaɗe ghə meleme pɛtɛ ba'a katenehwene ŋkɛ. Kala male nya zanji wəshia nta ne, katentishɛ na hwa hɛɗi.