Ɛzayi 26 - Ghena ta Shala

Ciməa meleme nya berete

¹ Ma te vecia shɛ, te hɛɗia Zhəwda ne, ma ke mbeli sha tegha cimə: Meleme nya berete ya va gheɓəmə. Kezha ya ŋkɛ ne, nahe Mahwətə keŋeyite zli bake yite.

² Ghwenemte mə yɛ ŋkwa kedzeki, sərəakɛ mə mbeli nyi tiɗiɗi kadzeki, mbeli nyi dɛŋe dɛŋe te ghena ta Shala.

³ Ke wəndə nya dɛŋe dɛŋe te zəzə ta ŋkɛ ne, kave nda kwelɛŋe na, va nya ndeke ŋa ghəa ŋkɛ ŋkɛ.

⁴ Ve nda mə ghəa ŋayɛ ke Mahwətə kaghala ghala, ke Mahwətə nya kakeleɓa nya kaghala ghala,

⁵ Nahe ŋkɛ ketsəkwəakawa mbeli nyi pelɛ wəmbə, nahe ŋkɛ keŋzlamte meleme nya nza zli yite. Nahe ŋkɛ kempəmte ŋkɛ pa mɛa hɛɗi, nahe ŋkɛ keŋzleyi ŋkɛ hwa hɛɗi.

⁶ Kateŋkeɗemte ŋkɛ seɗa, seɗa ta ka titikwəa kɛfi ba'a ŋa ka dewə ŋeli.

Səkwə ghə nya te keɗaŋe ta və

⁷ Tiɗiɗi nza hweŋkwa ta wəndə nya tiɗiɗi. Ma gha nya tiɗiɗi ne, kahi hweŋkwa ta wəndə nya tiɗiɗi na.

⁸ Ma kwa hweŋkwa nya geze na kazele n'yɛ ne, kave ghə n'yɛ te gha Mahwətə. Ma wəsə nya ɗe wənəa n'yɛ ne, hekɛme sləa ŋa ba'a zəzə ŋa.

⁹ Ma heviɗi ne, te gha nza mehele ta ɗa, gha yazele 'ya le wənə kwetɛŋe. Ma vəa ŋkwa nya mene geva ghena nyi gezete na te hɛɗi ne, kateke mene wəsə nya kehi mbeli nyi te hɛɗi lema.

¹⁰ Ama kezhɛakɛ heli mbeli yitea ka 'yaghwa mehele ne, kateke wəsə nya kehi kamene geva hɛ we. Ma te hɛɗi nya mene wəsə nya tiɗiɗi mbeli ne, wəsə nya ndiremi yamene hɛ, kanewe zləvə nya te gha, gha Mahwətə hɛ we.

¹¹ Mahwətə, tekafe dzeve ta ŋa kezha ɗa ka ghema ta ɗa, ama kenakɛ ŋkɛ hɛ we. Ama katenewe ɗe ta ŋa hɛ kezha mbeli katenza mehele ta nci ketaze taze, katenza hɛ ketere tere va ghwə nya keveyi geva kezha ghema ta ŋa.

¹² Mahwətə, kave n'yɛ kwelɛŋe na, gha nde yipə n'yɛ pɛtɛa wəshi nyi mene ghen'yɛ kadzawa.

¹³ Shala Mahwətə ta n'yɛ, nahe kweci ka sleke ŋkwa nyi keɗema kagha kese kasleke n'yɛ, ama deke gha yave ghen'yɛ te.

¹⁴ Nahe hɛ kempənji, katezhɛne hɛ kanza teghweme we, deke shenaŋkwe hɛ tsetsenya, katezhɛne hɛ kasame kwa kwele we. Kaganda ne, nahe na kemate te hɛ, nahe na kezamte sebe te hɛ ba'a te wəshi nyi kenza kazəzəke hɛ.

¹⁵ Mahwətə, nahe na keyate hwelefe ta n'yɛ, nahe na kencɛte zləvəa ŋa, nahe na keyate hwelefe ta n'yɛ, nahe na kehendeyi yɛ ghala ta hɛɗi pelɛ ŋwela.

¹⁶ Mahwətə, mbe yaka ne, nahe hɛ kese kasepa ŋa. Ma vəa ŋkwa nya mate na te hɛ ne, nahe hɛ kese kasəkwə ŋa kwele kwele.

¹⁷ Mahwətə, nahe ghen'yɛ kese kwa kema ta ŋa kala male nya keheha va ya: kasa yaka nde ba'a katsa lewela nde va zhɛ ta ŋkɛ.

¹⁸ Nahe ghen'yɛ kese le hwə, nahe ghen'yɛ kese mbe yaka, Ama kala wəsə sefə yayake ghen'yɛ. Kekeleke nda mbele ghen'yɛ ke hɛɗi, ya mbeli mɛnɛfɛ ghen'yɛ ke hɛɗi lema we.

Ɗa nya te hɛɗi ba'a te ndərə

¹⁹ Katezhɛne mbeli nyi kempə mpə ta ŋayɛ kanza teghweme, katesame geva ta nci kwa kwele. Gheyɛ mbelia kwahɛɗi, feɗeghe mə ba'a tsa mə gaghwe. Kwa nza ŋkɛ ne, kateghwene ŋayɛ mɛnɛa waŋe Shala, kezha zhɛne hɛɗi kave nda mpi ke mbeli nyi kempə mpə.

²⁰ Mbelia ɗa, zhɛne mə geva kadzeki ghɛa ŋayɛ, ŋzlete mə yɛ gelembe yitea ghəa ŋayɛ. Wəfərə ŋayɛ mə kavə ɓɛhwɛ pa te və nya tekiɗi hwepe wənə.

²¹ Kwa nza ŋkɛ shave yashave Mahwətə mbe ŋkwa kenza ta ŋkɛ kezha meha ghwə te fete ta mbeli nyi te hɛɗi lema. Katencɛ mimi nya keshekeyi geva hɛɗi te, katezhɛne ŋkɛ kawəfərə mbeli nyi mpəmte mbeli we.