Ɛzayi 20 - Ghena ta Shala

Ghena ke yɛ Ɛzhipte le Ɛtiyopi

¹ Te va nya ghweneghe wəndə nya te ghəa ka sewajɛa ŋkɛ Sargon, meghea ka Asiri kezha ha mpa ke Asdod nya mbe Filisti menete geva ŋkɛ. Pa ŋkɛ have nda mpa ke meleme ba'a kelehwe ŋkɛ.

² Ma vəa ŋkwa shɛ ne, ma ke Mahwətə sha Ɛzayi, wəzege ta Amots: «Katepele zlave nya hwa hwə nya na va gha ba'a kateseɗemte tsahwa nyi mbe seɗa nyi na va gha.» Pa Ɛzayi menete tsagha, ntəŋə ŋkɛ yitea dzeghwa mederesakwe ba'a kaɗema tsahwa mbe seɗa.

³ Ma ke Mahwətə: «Va mahekene menete nde mene slene ta ɗa Ɛzayi kadzeghwa mederesakwe ba'a kaɗema tsahwa mbe seɗa. Wəsə kencɛ wəsə ba'a ghena ŋkɛ kaŋa yɛ Ɛzhipte le Ɛtiyopi.

⁴ Katekese ka Ɛzhipte meghea ka Asiri kaka mavashi ba'a katefə ka Ɛtiyopi, megelɛshi ba'a meha mehɛɗi ŋkɛ. Kateslə hɛ mederesakwe ba'a kaɗema tsahwa mbe seɗa, ghenci perə. Te ŋwela tenza zeweve ta nci. Wa nya hawe te Ɛzhipte gɛ!

⁵ Ma tsagha gɛ ne, benake tenza mbeli nyi kevate ghə te Ɛtiyopi ba'a nyi kemene fege le kemane ta Ɛzhipte va ghazlənə ba'a shewə tenza hɛ va hawe.»

⁶ Ma te vecia shɛ ne, ma ke mbeli nyi te hɛɗi nyi dzeyi mɛa ndərə sha tegeze: «Newe mə wəsə nya kemene nda geva ke mbeli nyi se nyi gheɓəmə kave ghə te hɛ gɛ! Nahe gheɓəmə keɗe kalə kawəfərə sha hɛ yitea kemane ɓəmə hɛ ba'a yitea mbele ɓəmə hɛ va meghea ka Asiri. Tsetsenya gɛ ne, tsema tenza gheɓəmə kambele ɓəmə tse gɛ?»