Ka Ɛbrə 9 - Ghena ta Shala

Hawe va Shala te hɛɗi ba'a pelɛ ghweme

¹ Wəshi nyi kegezete geva te ghəa hawe va Shala ba'a ghɛa Shala nya te hɛɗi ya mbe kwa ghate ta jikə geva.

² Pa mbeli mɓete cɛ lekwesa nya keneheve geva bake mbe. Ma mbe kwa ghate ta bela nya heka mbeli kaŋkwa nya keveyi geva tekeleke ne, wəsə kentare yɛ paterela ba'a tabelea ɗafa nyi fəke nda mbeli ke Shala ya shɛ.

³ Ma kwetere wəmbəa kwa bake ta mayafe ne, kwete bela ta cɛ lekwesa nya heka mbeli kaŋkwa nya keveyi geva tekeleke tsape ya shɛ.

⁴ Ma mbe ŋkwa shɛ ne, reghwetɛ mze kwa tere tere ketere 'wərdə ya shɛ. Səndəkwəa jikə geva nya vɛsəaghe mze kwa tere tere mbeli kənə ya shɛ perə. Kwa səndəkwəa shɛ beteyi helape mze kwa tere tere nya nza ɗafa nya heka mbeli kamane kwa, geta ta Aron nya kebetete ghwə ba'a pelɛ nyi slapesla slapesla nyi rafete geva ghena ta jikə geva te hɛ.

⁵ Ma te səndəkwəa shɛ ne, pa ta ka shɛrəbɛŋe nyi kencɛ nza ta Shala tagha ya shɛ. Nahe bidzəa nci kedəpəmte wəsə keŋzle səndəkwə le shenaŋkwe ta nci. Ama kashɛ mbeli ɓelamte pɛtɛa ghena shɛ teke we.

⁶ Ma kwa mɓeyi geva cɛ lekwesa ne, keveci keveci dzembe kwa ghate ta bela ta cɛ lekwesa ka dzeghe Shala kezha mene slene ta nci.

⁷ Ama kwa bake ta bela ne, deke wəndə kwelea ka dzeghe Shala nde dzembe kwetɛŋe zhigə mbe va, le mimia wəsə keseɗa yitea dzeve kezha ve nda ke Shala kezha kelemte jaɗafa ta ŋkɛ ba'a jaɗafa nyi menete mbeli kaɗema le ɗe ta nci Shala te wənə.

⁸ Kancɛ nda Sefəa Shala ke mbeli tsagha kaɗema hweŋkwa ta ŋkwa nya keveyi geva tekeleke tsape keghwenemte geva, va nya nza kwa ghate ta cɛ lekwesa mba.

⁹ Nahe ŋkɛ kenza kawəsə kencɛ wəsə kaŋa və nya tsetsenya. Ma vəa ŋkwa shɛ ne, kafə wəshi mbeli kase ba'a kadzeghe melɛ mbeli, wəshi nyi keɗema kazhɛrete wənəa wəndə nya kemene wəshia shɛhɛ tiɗiɗi.

¹⁰ Nahe hɛ kenza kawəshi nyi gezete mbeli te ghəa wəshi kezeme, wəshi kesa ba'a mama ta ɓela gəsəkəa yaɓe ŋkwa wɛŋe. Nahe zləvə kenza te wəshia shɛhɛ hwa'a te və nya mbeɗete wəshi Shala.

¹¹ Ama nahe Kriste kese kala wəndə kwelea ka dzeghe Shala kezha fə ɓəmə wəshi nyi tsetsenya. Nahe ŋkɛ kedzembe cɛ lekwesa nya nza zləvə te za ma ba'a nya ganyɛ ma. Ma ŋkwa shɛ ne, dzeve ta wəndə nde menete we, geze ta ŋkɛ, kenza ŋkɛ kaŋa ŋkwa nya te hɛɗi nya we.

¹² Ma kwa dzembe ŋkwa nya keveyi geva tsape Kriste ne, kenza le mimia zhɛfa ba'a ŋa leve dzembe ŋkɛ we, ama le mimia ŋkɛ, kwetɛŋe zhigə se ŋkɛ mbe nda mbelete ɓəmə ŋkɛ kaghala ghala.

¹³ Ma mimia zhɛfa lɛmə, ŋa mcɛmcɛli ba'a pəsəɗəa mbəkwəa sla nya teremte mbeli le ghwə nya yisə mbeli kənəa mbeli nyi wale wale ne, kezha yaɓemte wale wale nya te geva ta nci hɛ.

¹⁴ Ma nda kala nya ŋkɛ ne, ashɛ za ma ŋa Yɛsə Kriste nza bereteke wəka! Kwa nza ŋkɛ ne, nahe ŋkɛ kendeke nda ghəa ŋkɛ ke Shala laka Sefəa Shala, kala wəsə keseɗa kedzeghe melɛ nya ɗema beze te. Tsagha gɛ, kateyaɓemte mehele ta ɓəmə nyi kebeze beze va wəshi nyi keketema ŋkwa ŋkɛ, kezha mene nda slene gheɓəmə ke Shala nya teghweme.

¹⁵ Vatse nza Kriste kawəze makwa ta jikə geva mɛnɛfɛ, yitea kemave wəshi nyi kaghala ghala nyi meɗeyi nda ŋkɛ ke mbelia ŋkɛ, mbeli nyi hekakɛ Shala. Kwa nza ŋkɛ nahe Kriste kemte kezha mbele mbeli va wəshi nyi ndiremi ndiremi nyi kemenete geva te vəa kwa ghate ta jikə geva.

¹⁶ Ma kenza meɗe mɛ shɛ ne, nda mbeli kancɛte mte ta wəndə nya kemenete meɗe mɛa shɛ.

¹⁷ Kwa nza ŋkɛ kamene slene mbeli le meɗe mɛ mba wəndəa shɛ teghweme we, nda wəndəa shɛ kemte nda mene slene mbeli le meɗe mɛa ŋkɛ.

¹⁸ Vatse ɗema kwa ghate ta jikə geva kemenete slene tewə mimi keshekeyi geva.

¹⁹ Kaba ne, nahe Moyize kezlapete ghena nya gezete nda Shala ke mbeli kala nya kerafete geva mbe wəsə mahalegəa Shala. Pa ŋkɛ kelete mimia levea lɛmə ba'a ŋa zhɛfa lɛmə, tsagha yɛmə, pa ŋkɛ yisəyi mimia shɛ te palepa ta wəsə mahalegə kaba ba'a kənəa mbeli pɛtɛ le dzeve ta wəfe ta izope ba'a shintia təmə nyi kefi fi le yirə kwa ghɛmɛ.

²⁰ Ma ke: «Nya ya kamimia jikə geva nya gezete ŋayɛ Shala.»

²¹ Pa Moyize yisəate mimi te cɛ lekwesa ba'a te pɛtɛa wəshi kemene slene nyi mbe cɛa shɛ.

²² Kala nya gezete wəsə mahalegə ne, le mimi yaɓe geva wəba ta wəshi. Ma keɗema mimi kesheke ne, kakelemte geva yɛ jaɗafa te wənə we.

Kayaɓe jaɗafa melɛa Kriste

²³ Nahe yɛ pa ta pɛtɛa wəshi nyi pelɛ ghweme kehi kayaɓe geva kala nya. Ama nahe wəshi nyi pelɛ ghweme le ghəa nci keɗete melɛ nyi za ma.

²⁴ Kwa nza ŋkɛ ne, kedzembe ghɛa Shala nya ŋate dzeve ta mbeli Kriste we, deke pa ta ŋkwa nya keveyi geva tekeleke kaganda ŋkɛ. Ama nahe ŋkɛ kedzeme ghweme nya nza ŋkɛ tsetsenya kwa kema ta Shala kezha gheɓəmə.

²⁵ Keva keva dzembe ŋkwa nya keveyi geva tekeleke wəndə kwelea ka dzeghe Shala ta ka Zhəwif le mimia wəshi keseɗa. Ama kedzembe Kriste kezha dzeghe melɛ kwele kwele zhigə le ghəa ŋkɛ we.

²⁶ Ma ya kaɗema ŋkɛ kala nya ne, nza kwele kwele zhigə tesahwe yaka ŋkɛ ghala pate geva hɛɗi. Ama tsetsenya nca ŋkɛ kezha wəshi pɛtɛ, va nya nza və kekiɗi ta hɛɗi takwa takwa, kezha zamte sebe te jaɗafa laka dzeghe melɛ le ghəa ŋkɛ.

²⁷ Yayata wəndə kamte kwetɛŋe zhigə, ma kwetere wəmbəa ŋkɛ ne, meha ghwə ta Shala ya shɛ.

²⁸ Tsagha shɛnyɛ ne, nahe Kriste kedzeghekɛ melɛ kwetɛŋe zhigə le ghəa ŋkɛ kezha kelemte jaɗafa ta mbeli kwele kwele. Katenca ŋkɛ kakwa bake zhigə, kaɗema kezha kelemte jaɗafa, ama kezha mbele mbeli nyi keneghe se ta ŋkɛ.