Ka Ɛbrə 11 - Ghena ta Shala

Yɛ ta ka shihɛ ɓəmə nyi kaka Israyɛl

¹ Ma yɛ Shala ne, gheŋkɛ ya kakemave wəsə nya vate ghə wəndə, gheŋkɛ ya kaɗepe kaganda ta wəshi nyi ɗema mbeli kanakɛ.

² Tewəmbəreke yɛ ta nci nda ɗehwe ka shihɛ ɓəmə nyi vəashi Shala.

³ Laka yɛ ne, kafave gheɓəmə nahe Shala kepate wəshi pɛtɛ laka ghena ta ŋkɛ. Ma pɛtɛa wəshi nyi newe mbeli tsagha gɛ ne, shave mbe wəshi nyi ɗema mbeli kanakɛ pake geva hɛ.

⁴ Laka yɛ ne, nahe Abɛl kedzeghekɛ nda melɛ nya za ma ke ŋa Kayin ke Shala. Laka yɛa shɛ ne, nahe Shala keveyi ŋkɛ kawəndə nya tiɗiɗi, kwa nza ŋkɛ nahe Shala le ghəa ŋkɛ keyɛhwe wəshi nyi fəke ŋkɛ. Laka yɛ ta ŋkɛ ne, mba Abɛl kageze ghena, ya gheŋkɛ nza kemte mte.

⁵ Laka yɛ ne, nahe Ɛnok kekeleghe geva kadzeme sha Shala kaɗema ŋkɛ keɗepe mte. Wəndə kesləyi ŋkɛ, va nya keleghe ŋkɛ Shala kadzeme shɛ we. Kwa nza ŋkɛ ma nde tekeleghe geva Ɛnok kadzeme ne, nahe mbeli keneghate fete yite kawəndə nya zeɗehwe nda ke Shala.

⁶ Wəndə shɛ zeɗehwe nda ke Shala keɗema yɛ ve we. Kwa nza ŋkɛ ma wəndə nya kehende nda geva ke Shala ne, nahe ŋkɛ kehi kayɛ ŋkɛ Shala ya shɛ ba'a kaŋki nda zhɛme ŋkɛ ke mbeli nyi kezele ŋkɛ.

⁷ Laka yɛ ne, nahe Nowɛ keveyite sleme yitea ghena ta Shala te ghəa wəsə nya ketemene geva, nya ɗema mbeli kenaka kanakɛ. Nahe ŋkɛ kefate nda ghena ke Shala fate fate ba'a kebaŋete kwambelə nya mbelenyɛ ŋkɛ mbe le mbelia ŋkɛ va yɛmə. Tsagha ne, nahe ŋkɛ kendeke nda fete ke mbeli pɛtɛ ba'a kekemave nza tiɗiɗi kwa kema ta Shala laka yɛ ta ŋkɛ.

⁸ Laka yɛ ne, nahe Abraham kehawete hawe ke Shala nya kehekakɛ ŋkɛ. Ntəŋə ŋkɛ kalə kadzete hɛɗi nya teve nda Shala kawəsə kezeme ghɛ. Cape ŋkɛ kaɗema keɗepe ŋkwa nya telə ŋkɛ te.

⁹ Laka yɛ ne, nahe ŋkɛ kenzahwe nza kala nde se se te hɛɗi nya meɗeyi nda Shala. Nahe ŋkɛ kenzahwe nza mbe cɛ lekwesa, tsagha Izak ba'a Zhakob. Nahe hɛ kekemave meɗe mɛ nya kwetɛŋe le Abraham perə.

¹⁰ Kwa nza ŋkɛ meleme nya nza shihəa ŋkɛ berete, nya nza Shala kande dzeghete ba'a kande ŋate, yaneghe Abraham.

¹¹ Laka yɛ ne, nahe Sara kekemave ya wəzege, ya ghenta nza kehale hale. Nahe nde keveyi ghə kateyipə meɗe mɛa ŋkɛ Shala kadzawa.

¹² Vatse gɛ, ya Abraham nza kala wəndə nya ketemte ne, nahe ŋkɛ kekemave hwelefefi kwele kwele kala saseregwa nyi te ghweme, kala ndaleghe nya ɗema mbeli kaɓelate kwa hələ.

¹³ Mbe yɛ Shala mpənji pɛtɛa mbelia shɛhɛ. Ama kekemave wəshi nyi meɗeyi nda Shala ke hɛ hɛ we, ama nahe hɛ kenakɛ hɛ ba'a kenjiŋwakɛ hɛ cakeɗake. Nahe hɛ keɗepete fate fate kaka se se hɛ ba'a kaka dzeghwa hɛ te hɛɗi.

¹⁴ Kwa nza ŋkɛ ma mbeli nyi kegeze ghena kala nya ne, ncɛ yancɛ hɛ dazhɛ dazhɛ kwete hɛɗi yazele hɛ kaŋa nci.

¹⁵ Ma ya nahe hɛ kese kazəzə hɛɗi nya se hɛ te ne, nza nahe hɛ kekemave və kalə kadzete.

¹⁶ Kaganda ne, hɛɗi nya ganyɛ yamawe hɛ, geze ta ŋkɛ, ŋkwa nya pelɛ ghweme. Vatse ɗema hawe kazhɛ nda ke Shala keheka ŋkɛ mbeli kaShala ta nci, kwa nza ŋkɛ nahe ŋkɛ kehite nda meleme ke hɛ.

¹⁷ Laka yɛ ne, nahe Abraham kedzeghekɛ melɛ le Izak, kwa nza Shala kadzeghe yɛ ta ŋkɛ. Nahe ŋkɛ kenza ɗeke ɗeke kadzeghe melɛ le wəzege kwetɛa ŋkɛ, ndagwara nahe ŋkɛ kekemave meɗe mɛa Shala.

¹⁸ Ma ke Shala shɛ: «Laka Izak tekemave hwelefefi nyi meɗeyi ŋa 'ya na.»

¹⁹ Nahe Abraham keɗepe berete ya va Shala kezha kelakame Izak kwa kwele le mpi. Vatse zhɛnave nda wəzege ta ŋkɛ Shala, kala wəsə nya same ŋkɛ kwa kwele.

²⁰ Laka yɛ ne, nahe Izak kewəpikɛ yɛ Zhakob le Ɛzawə kezha nza nya te kwete hɛ.

²¹ Laka yɛ ne, nahe Zhakob kewəpikɛ yayata wəndəa ŋwalea Zhozɛf, mpelɛa ma ke mte ta ŋkɛ. Ma kwa dɛŋate geva ŋkɛ te geta ta ŋkɛ ne, pa ŋkɛ ndeke nda hawe ke Shala.

²² Laka yɛ ne, nahe Zhozɛf kegezete shave ta ka Zhəwif mbe Ɛzhipte, kwa nza ŋkɛ takwa takwa kamte. Nahe ŋkɛ kegezete wəsə nya temene mbeli le 'yɛ'yɛa ŋkɛ.

²³ Laka yɛ ne, nahe mbeli nyi keyake Moyize kentikəakɛ ŋkɛ katere mahekene kwa sebe ta ya ta ŋkɛ. Ma kwa nakɛ hɛ kawəzege ganyɛ ŋkɛ ne, kese hɛ kaghazlənə va fa nda ma ghena ke meghe we.

²⁴ Laka yɛ ne, nahe Moyize, kwa kelenyɛ ŋkɛ, keɗema heka ŋkɛ mbeli kawəzege ta wəzha ta Farawon.

²⁵ Yaka yaɗehwe ŋkɛ le mbelia Shala ke zlama kavə ɓɛhwɛ mbe jaɗafa.

²⁶ Shifə kala Kriste yaɓela ŋkɛ kamcɛlə nya kwele ma ke mcɛlə nyi mbe Ɛzhipte, kwa nza ŋkɛ, nahe ŋkɛ keveyi zəzə ta ŋkɛ te zhɛme nya te kwete veci.

²⁷ Laka yɛ ne, nahe Moyize keshavenyɛ mbe Ɛzhipte, kaɗema kaghazlənə va hwepe wənəa meghe. Nahe ŋkɛ keghereŋe le berete kala wəsə nya newe Shala nya ɗema mbeli kanakɛ ŋkɛ.

²⁸ Laka yɛ ne, nahe Moyize kemenete gəsəkəa Pake ba'a kegezete kezha sehwe mimi mbeli dzeme vare yɛ gelembe ta yɛ ghɛ, yitea ɗema Nde mpə ŋkwa kampəmte ka tezhɛa kɛfi ta ka Israyɛl.

²⁹ Laka yɛ ne, nahe ka Israyɛl kejivenji te ndərə kwa Ghɛmɛ le seɗa kala wəsə nya te hɛɗi kwa ghwele ghwele. Ama vəa ŋkwa nya dzeghakɛ ka Ɛzhipte kamene kala hɛ ne, nahe yɛmə kezamte hɛ.

³⁰ Laka yɛ ne, nahe zli nya yitea Zhɛriko keŋzlamte geva, kwa sebe ta nya ntəsləte ka Israyɛl kahɛ mberefaŋe.

³¹ Laka yɛ ne, nahe Rahab nya kamale mefətekwə, keɗema kemte le ka Zhɛriko nyi kefa nda ma ghena ke Shala, va nya kemaneve mbeli nyi kenewe nza ta hɛɗi nde megela.

³² Tsema 'ya sha geze ɓiyitsa tse wa? Dewə ɗa və kezha geze ghena te Zhɛdɛyon, Barak, Samson, Zhɛftɛ, David, Saməyɛl ba'a kweci ka mɛ ŋkwa ta Shala.

³³ Te zlaɓa ta yɛ nda se hɛ kazehwe kweci hɛɗi, kamenete wəsə nya tiɗiɗi ba'a kakemave wəsə nya meɗeyi Shala. Nahe hɛ keŋzlemte mɛa yɛ nivɛrə,

³⁴ kepeslekɛ ghwə nyi jama jama, kembele va mpə va yɛ kafayɛ. Kaka dewə ŋeli se hɛ, ama pa hɛ zhɛrenji kaka berete. Ma mbe mpa ne, nahe hɛ keŋkamte ka sewajɛa kweci mbeli.

³⁵ Laka yɛ ne, nahe mi kenakɛ mbelia nci nyi kempə kasame kwa kwele. Ma kweci mbeli nyi mpəmte hɛ mbeli le yaka ne, kese hɛ kaɗe kambele hɛ mbeli, yitea kemave same kwa kwele nya ganyɛ ma hɛ we.

³⁶ Nahe kweci kezereghehwe yɛ ŋele ba'a ghweɗa, nahe mbeli kehwehwepeyi kweci kwa yɛ zewe lɛ ba'a kenegheyi hɛ kwa daŋgayɛ.

³⁷ Le pelɛ mpəmte kweci mbeli, le hwa kesla sheghwə slamte kweci mbeli bake mbe keɗema le kafayɛ mpəmte hɛ mbeli. Keŋkwa keŋkwa se kweci kadzeghwa le hweta ta təmə keɗema ŋa kwe kənəa geva. Kaka titikwə se hɛ, kaghweze mɛ mbeli hwa hɛ ba'a kasa nda yaka mbeli ke hɛ.

³⁸ Kehite geva ŋkwa nya te hɛɗi sha mbelia shɛhɛ. Kandendeŋe hɛ dzeyi te yɛ ɓerama, dzeyi hwa yɛ ghweme, dzeyi mbe yɛ gezlɛŋə ba'a dzeyi kwa yɛ ki.

³⁹ Pɛtɛa mbelia shɛhɛ ne, nahe Shala keneghate fete yitea hɛ, tewəmbəreke yɛ ta nci, ama kekemave wəsə nya meɗeyi Shala hɛ we.

⁴⁰ Nahe Shala keveyi wəsə nya ganyɛ ma kaŋa ɓəmə, vatse ɗema ŋkɛ kazhɛre hɛ tiɗiɗi kaɗema gheɓəmə hwe.