Habakək 1 - Ghena ta Shala

¹ Ghena nya ncɛte nda Shala ke nde mɛ ŋkwa Habakək laka kelɛŋə.

Nde mɛ ŋkwa katsa nda lewela ke Shala

² Mahwətə yawe, pa te nyama və tetsa ŋa lewela 'ya kaɗema na kafa ɗa ŋa ɗa wa? Pa te nyama və tezlape ŋa 'ya va mene berete kaɗema na kambele ŋkwa wa?

³ Kezha wa sərə ɗa na kanewe wəsə kwa ndiremi wa? Kezha wa yɛ na kanewe yaka wa? Ma dzeyi yitea 'ya ne, deke beze ba'a mene berete ya shɛ, mene ghwə ba'a ghəpə ka kelehwe ŋkwa.

⁴ Kamene slene mbeli le wəsə mahalegə we, kameha ghwə nya tiɗiɗi mbeli we, kahərə wəndə nya tiɗiɗi nde 'yaghwa mehele ba'a ghwə ɗafa yameha ka meha ghwə.

Zhɛne ta Shala: se ta ka Babilone

⁵ Ma ke Shala gezete: «Newema mə wəsə nya kemene geva hwa kweci hwelefefi, nza mə heheɓake ba'a bebenake. Kwa nza ŋkɛ ne, katemene geva kwete wəsə vəa ŋkwa nya nza yɛ teghweme. Ma vəa ŋkwa nya ɓelate ŋayɛ wəsəa shɛ mbeli ne, kateve ghə yɛ te we.

⁶ Katefə ka Babilone 'ya kase, ka ndiremia mehele ba'a ka zhɛma heli. Katedzeghwamte hɛɗi lema hɛ kezha fə hɛɗi nyi keɗema kaŋa nci.

⁷ Nahe hɛ kenza kaka dake ŋkwa ba'a kambeli nyi ghazlənə mbeli va hɛ. Katare wəshi nyi kehi kezha hɛ ba'a kwelea nci hɛ le ghəa nci.

⁸ Nahe gədəwəa lɛməa nci kenza wɛrewɛ ma ke yɛ deghwava, wɛrewɛ ma hɛ ke kelɛa keti gamba nyi kepəli hetɛhwɛɗi. Se cakeɗake ne, kampereke ka zleɗe gədəwəa lɛməa nci, kazlə hɛ kala zele nya keme kənəa wəsə kezeme ta ŋkɛ.

⁹ Kase pɛtɛa nci kezha mene berete, le newe ŋkwa te kema va sla ntsə. Katsene ka mavashi hɛ kwele kwele kala ndaleghe.

¹⁰ Kaŋ'wəshi ka meghea kɛfi hɛ, kaɓela mbeli nyi te ghəa nci hɛ we. Katsakɛ hɛ meleme nyi berete berete we: katsene hɛɗi hɛ dzeyi yitea hɛ kezha fə hɛ.

¹¹ Kajive hɛ kala sefə nya wəba, kajive hɛ mbe kema mbe kema. Berete ta nci yave ghə hɛ te, nahe nde kenza kashala ta nci.»

Nde mɛ ŋkwa kazhɛne kaheka Shala

¹² Se vəashi ne, gha ya kaMahwətə, Shala ta ɗa na, Shala nya kaganda nya keɗema kamte. Mahwətə yawe, gha nde ntave ka Babilone kezha meha ghwə te ghen'yɛ. Ma gha nya kagela nya keya ɗa ne, nahe na kendeke nda hweŋkwa ke hɛ kaɗa n'yɛ.

¹³ Nahe yɛ ntsə ta ŋa kenza kewɛŋe kezha newe wəsə kwa ndiremi, kayɛ na kezha newe yaka we. Va wa newe ka mbəɗəkwə nyi na wa? Va wa nza ŋa na divə vəa ŋkwa nya sa nda yaka ka 'yaghwa mehele ke mbeli nyi tiɗiɗi ma ke hɛ wa?

¹⁴ Va wa mene nda na ke mbeli kala yɛ kelepe ba'a menciɗi nyi ɗema nde sleke hɛ shɛ wa?

¹⁵ Kakese mbeli ka Babilone kala kelepe nya kekeseve geva le dzara, kafə hɛ hɛ kadzembe zamba ta nci. Tagha gɛ, kazlama hɛ kwele kwele.

¹⁶ Kadzeghe nda melɛ hɛ ke zamba ta nci, katere 'wərdə hɛ kazləvəa nci, kwa nza ŋkɛ ma te zlaɓa ta nci ne, kakese kelepe hɛ kwele kwele ba'a kazeme wəshi kezeme nyi zeɗe zeɗe hɛ.

¹⁷ Kateɗema hɛ nteɗe yɛ kafayɛa nci kezha mpə hwelefefi kakwa zhɛma heli na?