Ghena Kelɛŋə 9 - Ghena ta Shala

¹ Tagha gɛ, pa nde mcɛfe ta nde ghwene ta Shala vɛte veke. Pa 'ya nakɛ saseregwa nya keteɗe sawa pelɛ ghweme kadzete hɛɗi. Pa mbeli ndeke nda wəsə keghwene ki nya ɗema ghala kwa.

² Pa saseregwa shɛ ghwenemte ki nya ɗema shɛ ghala kwa, pa n'yia ghwə kala ŋa ghwə nya wəba same kwa. Pa veci ba'a ŋkwa zhɛrenji ngərə ngərə va n'yia nya kesame kwa kia shɛ.

³ Pa yɛ dzale shave mbe n'yia shɛ ba'a rayɛmte ŋkwa nya te hɛɗi. Pa hɛ kemave berete ke hɛ kala ŋa yɛ yite.

⁴ Pa mbeli gezete nda ke hɛ kezha ɗema hɛ kabeze gwəzə, ya yɛ wəfe, ya kweci wəshi nyi kepese. Ama deke mbeli nyi ɗema lamba ta Shala mɛa kema va hɛ yasa nda yaka hɛ.

⁵ Kekemave hweŋkwa kepesle mbeli dzalea shɛhɛ we, ama deke kezha sa nda yaka ke hɛ katere mcɛfe. Ma yaka nya sa nda hɛ ke mbeli ne, yipə yipə ŋkɛ le zhɛ ta yite kehekɛ wəndə ŋkɛ.

⁶ Ma mbe tere nyi mcɛfea shɛhɛ ne, katezele mte mbeli, ama kakemave hɛ we. Kateɗe hɛ kampə ne, ama katehwɛ mte cakeɗake va hɛ.

⁷ Nahe dzale shɛhɛ kenza kala gədəwə nyi kehite geva yitea mpa, yɛ derə mze kwa tere tere ya mbe ghəa nci, nahe yɛ kema ta nci kenza kala ŋa wəndə ŋelɛ.

⁸ Nahe shintia ghəa nci kenza kala ŋa mi, yɛ slene ta nci kala ŋa nivɛrə.

⁹ Kala wəsə nya nza rəbəci kwa lɛ lɛ kwa hate ta nci, nahe gaka ta bidzəa nci kenza kala gaka ta wəmata nyi ntsehe gədəwəa lɛmə kwele kwele kahe kahe kadzemte mpa.

¹⁰ Sheghe ya te hɛ lɛme lɛme kala ŋa yɛ yite, mbe sheghe ta nci shɛhɛ nza berete kesa nda yaka ke mbeli katere mcɛfe.

¹¹ Meghe ya va hɛ, gheŋkɛ nde ghwene ta ki nya ɗema ghala kwa. Ma le ghena ta ka Ɛbrə ne, Abadon sləa ŋkɛ, ma le ŋa ka Grɛk ne, Apoliyon, geze ta ŋkɛ, Nde za ŋkwa.

¹² Nahe kwa ghate ta ndiremi kekiɗi. Kwa sebe ta nya ne, katese kweci ndiremi bake zhɛkwa.

¹³ Pa nde ŋkwaŋe ya nde ghwene ta Shala vɛte veke. Pa 'ya fate ŋwələ nya kese te tereme nyi wəfaɗe te reghwetɛ mze kwa tere tere nya te kema ta Shala.

¹⁴ Ma ke ŋwələa shɛ sha nde ŋkwaŋe ta nde ghwene ta Shala nya nza veke ve: «Pelemte ka ghwene ta Shala nyi wəfaɗe nyi kwa zewe lɛ vare hələa Efrate.»

¹⁵ Pa mbeli pelakɛ ka ghwene ta Shala nyi wəfaɗea shɛhɛ, nahe hɛ kehite geva kezha və, veci, tere ba'a va nya tepesle kwa maheke ta bela ta mbeli hɛ.

¹⁶ Pa mbeli gezete ɗe ɓela ta ka sewajɛ nyi kezleɗe gədəwə: mbeli miliyeŋə gwəmsə bake hɛ.

¹⁷ Wa nya tsetse nakɛ gədəwəa lɛmə ba'a mbeli nyi pelɛ hɛ 'ya: rəbəci nyi gheme gheme kala ghwə, nyi kala pelɛ nyi kakwa lɛa lɛa ghweme ba'a nyi kala laɗe ta ghwə ya kənəa hɛ. Nahe yɛ ghəa gədəwəa lɛməa shɛhɛ kenza kala ŋa yɛ nivɛrə, kasame ghwə, n'yia ghwə ba'a laɗe ta ghwə kwa mɛa nci.

¹⁸ Nahe kwa maheke ta bela ta mbeli kezamte geva va ndiremi nyi mahekenea shɛhɛ: ghwə, n'yia ghwə ba'a ghwə ta gezla nyi kesame kwa mɛa gədəwəa lɛmə.

¹⁹ Kwa nza ŋkɛ kwa mɛa gədəwəa lɛməa shɛhɛ ba'a mbe yɛ sheghe ta nci nza berete ta nci. Nahe yɛ sheghe ta nci kenza kala yɛ shishi, ghə ya kwa sheghea shɛhɛ kezha sa nda yaka ke mbeli.

²⁰ Ma mbeli nyi ketene kaɗema kempə va ndiremia shɛhɛ ne, kese hɛ kazhɛre nda wəmbə ke wəshi nyi zhɛrete mbeli kashala nyi menete hɛ le dzeve ta nci we. Kefɛa hɛ yitea hawe va yɛ 'yi'yɛghwə, shala nyi menete mbeli yitea mze kwa tere tere, mze kwa tɛawetɛa, mze kwa ghwə ghwə, pelɛ ba'a sheghwə, wəshi nyi keɗema kanewe ŋkwa, kafa ghena ba'a kadzeghwa we.

²¹ Kewəfəyite mpə ŋkwa ta nci, mene ghwɛ ta nci vale tahe ta nci ba'a ghərəa nci hɛ we.