Ghena Kelɛŋə 6 - Ghena ta Shala

Lamba nyi te palepa kwa peɗe peɗe

¹ Ma newe 'ya ne, pa Zhɛgwəa təmə mpəmte kwa ghate ta lamba nyi mberefaŋe. Ma fa 'ya ne, kagaka kwete wəndəa wəshi keseɗa nyi wəfaɗe le berete kala nehwene ta va, ma ke: «Nde!»

² Newe 'ya sha ŋkwa ne, dəkwə 'ya te gədəwə kwa tɛawetɛa. Rəgi ya va wəndə nya pelɛ, pa mbeli ndeke nda derə meghe. Nahe ŋkɛ kenza kawəndə nya kehərəte ŋkwa, ntəŋə ŋkɛ kalə kahərə ŋkwa zhɛkwa.

³ Zhɛne ne, pa Zhɛgwəa təmə mpəmte kwa bake ta lamba. Ma fa 'ya ne, kagaka kwa bake ta wəsə keseɗa, ma ke zlapete: «Nde!»

⁴ Tagha gɛ, pa kwete gədəwə se, nahe ŋkɛ kenza gheme kala ghwə. Nahe wəndə nya pelɛ kekemave berete kekele kwelɛŋe seyi te hɛɗi lema, kezha ghazle ghəa nci mbeli. Pa mbeli ndeke nda kafayɛ nya wəba.

⁵ Pa Zhɛgwəa təmə mpəmte kwa maheke ta lamba. Ma fa 'ya ne, ma ke kwa maheke ta wəsə keseɗa zlapete: «Nde!» Newe 'ya ne, dəkwə 'ya te gədəwə kwa ŋkereyi. Kiləwə kedzeghe wəshi ya yitea dzeve ta wəndə nya pelɛ.

⁶ Pa 'ya fate kwete wəsə kala ŋwələ te tepe ta wəshi keseɗa nyi wəfaɗe, ma ke: «Kwetɛŋe kiləwəa ha kezha ŋki slene mbe vəghwə ba'a mahekene kiləwəa megi kezha ŋki slene mbe vəghwə. Ama kwaɗema n'yi keɗema tɛ na ma.»

⁷ Zhɛne ne, pa Zhɛgwəa təmə mpəmte kwa wəfaɗe ta lamba. Ma fa 'ya ne, ma ke kwa wəfaɗe ta wəsə keseɗa zlapete: «Nde!»

⁸ Newe 'ya ne, dəkwə 'ya te gədəwə kwa pəsəɗə pəsəɗə. Ma wəndə nya pelɛ nyagha gɛ ne, mte sləa ŋkɛ, katəkwə təkwə ŋkɛ ghɛa mbelia kwahɛɗi. Pa mbeli berete te kwa wəfaɗe ta bela ta hɛɗi ke hɛ kezha mpə mbeli nyi te le kafayɛ, ma, ba ba'a wəshi keseɗa nyi ghyana ghyana hwa gamba.

⁹ Pa Zhɛgwəa təmə mpəmte kwa mcɛfe ta lamba. Pa 'ya nakɛ shenaŋkwe ta mbeli nyi mpəmte mbeli va nza ta nci dɛŋe dɛŋe te ghena ta Shala ba'a te negha fete ta nci yite mbeyitere reghwetɛ.

¹⁰ Ma ke hɛ zlapete le berete: «Nde sleke ŋkwa nya keveyi geva tekeleke nya kaganda, hweŋkwa temeha ghwə na te mbeli nyi te hɛɗi kezha wa dewa ta mimia n'yɛ wa?»

¹¹ Pa mbeli ndeke nda rewebe kwa tɛawetɛa ke yayata wəndəa nci. Pa mbeli gezete ke hɛ kaneghe kavə ɓɛhwɛ, hwa'a te vəa nya tetseramete geva ɓela ta ka menəhɛ nci ba'a mbeli nyi kemene slene le hɛ nyi tempə mbeli kala gheyɛ.

¹² Zhɛne ne, pa 'ya nakɛ Zhɛgwəa təmə kampə kwa ŋkwaŋe ta lamba. Tagha gɛ, pa hɛɗi gaŋkəɗəte geva kwele kwele. Pa veci zhɛrenyɛ ɗɛke ɗɛke kala zlave kwa ɗɛkeɗɛ, pa tere zhɛrenyɛ ghɛmɛ kala mimi.

¹³ Pa yɛ saseregwa betenji sawa pelɛ ghweme, kala mendahwepələa ya nyi kebete sawa ta dasekwa va sefə.

¹⁴ Pa ghweme zanyɛ ɓɛhwɛ ɓɛhwɛ kala palepa nya peɗe mbeli. Pa pɛtɛa yɛ ghweme ba'a hɛɗi nyi dzeyi te ndərə kekelemte geva seyi te ŋkwa nci.

¹⁵ Pa ka meghea kɛfi nyi te hɛɗi, mbelia jama, mbeli nyi te ghəa ka sewajɛ, ka mcɛləa kɛfi, mbeli nyi berete berete, pɛtɛa ka mavashi ba'a pɛtɛa ka mamzashi wəfərənji dzeyi kwa yɛ zlera ba'a dzeyi mbe yɛ gela.

¹⁶ Ma ke hɛ sha yɛ ghweme ba'a yɛ gela: «Ŋzlaghe mə geva kənəa ghen'yɛ ba'a ntikəakɛ n'yɛ mə va kema ta wəndə nya pelɛ pasla ba'a va hwepe wənə ta Zhɛgwəa təmə.

¹⁷ Kwa nza ŋkɛ nahe vecia hwepe wənəa nci nya wəba kese. Wa nde nza kaghereŋe kwa kema ta ŋkɛ wa?»