Ghena Kelɛŋə 3 - Ghena ta Shala

Palepa ke Jikə ta ka Kriste nya mbe Sarde

¹ Rafete nda ghena nya ke wəndə nya te ghəa Jikə ta ka Kriste nya mbe Sarde: Wa nya ghena nya geze wəndə nya nza sefə nyi kese va Shala mberefaŋe ba'a saseregwa mberefaŋe ve nya: nahe 'ya keɗepe slene ta ŋa, nahe 'ya keɗepe teghweme na zəzə mbeli, ama kemte mte na.

² Feɗeghe ba'a mtsehete nda berete ke wəsə nya takwa takwa kamte, kwa nza ŋkɛ nahe 'ya kenakɛ kaɗema slene nyi menete na kenza tiɗiɗi kwa kema ta Shala ta ɗa.

³ Zəzəte ghena nya kemave na ba'a nya fave na. Keseve ghena shɛ ba'a mpiyi dzeve. Ma keɗema na kefeɗeghe ne, katese 'ya sha gha vəkə kala ghərə, kaɗema na keɗepe və nya tese 'ya kwa.

⁴ Ya tsagha shɛ ŋkɛ ne, nahe kweci mbelia ŋa nyi mbe Sarde kezhɛretema lekwesa ta nci wale wale. Katebeghe ɗa hɛ le lekwesa nyi tɛawetɛa tɛawetɛa, kwa nza ŋkɛ nahe ŋkɛ kehi va hɛ.

⁵ Katenza mbeli nyi kehərəte mpa mbe lekwesa nyi tɛawetɛa tɛawetɛa. Kateshesha sləa nci 'ya seyi te palepa ta mpi we. Kaɗepe hɛ 'ya kwa kema ta Yiteyɛ ɗa ba'a kwa kema ta ka ghwene ta ŋkɛ nyi kaŋa ɗa.

⁶ Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ.

Palepa ke Jikə ta ka Kriste nya mbe Filadɛlfi

⁷ Rafete nda ghena nya ke wəndə nya te ghəa Jikə ta ka Kriste nya mbe Filadɛlfi: Wa nya ghena nya geze wəndə nya keveyi geva tekeleke ba'a nya kegeze Kaganda, gheŋkɛ nya nza wəsə keghwene cɛ ta meghe David ve, nya keghwene ŋkwa kaɗema wəndə shɛ kaŋzlete, nya keŋzle ŋkwa kaɗema wəndə shɛ kaghwenemte nya:

⁸ Nahe 'ya keɗepe slene ta ŋa. Nahe 'ya keɗepe dewə berete ta ŋa, ya tsagha shɛnyɛ ŋkɛ ne, nahe na keyate ghena ta ɗa, keɗepe ɗa ma na we. Nahe 'ya keghwenemte mɛ degha te kema ta ŋa, wəndə shɛ kaŋzlete we.

⁹ Wa nya wəsə nya temene nda 'ya ke jikə ta mbelia Satan, ka tseŋwəa kɛfi nyi keve ghəa nci nyi kaka Zhəwif, ama kaɗema hɛ kaka Zhəwif nya: kateŋka hɛ 'ya le berete kase kagwəɗəŋə kwa kema ta ŋa kezha hawe va gha. Kateɗepe hɛ kaɗe ŋa 'ya.

¹⁰ Ma kwa nza ŋkɛ nahe na keyate ghena ta ɗa megela ne, 'ya perə, kateya ŋa 'ya te vəa ndiremi nya ketedzete hɛɗi lema kezha dzeghe mbeli nyi te hɛɗi.

¹¹ Takwa takwa 'ya kase. Keseyi wəsə nya va gha megela, yitea ɗema kwete wəndə kakelehwe derə meghea ŋa.

¹² Ma wəndə nya kehərəte mpa ne, kaselə nya mbe ghɛa Shala ta ɗa teve ŋkɛ 'ya, katezhɛne ŋkɛ kashave mbe tɛape we. Katerafe sləa Shala ta ɗa ba'a sləa meleme ta Shala ta ɗa, Zhɛrəzalɛm mɛnɛfɛ nya kesawa pelɛ ghweme, nya ghweneke Shala ta ɗa 'ya te wəndəa shɛ. Katerafe sləa ɗa nya kamɛnɛfɛ 'ya te wəndəa shɛ perə.

¹³ Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ.

Palepa ke Jikə ta ka Kriste nya mbe Lawodisɛ

¹⁴ Rafete nda ghena nya ke wəndə nya te ghəa Jikə ta ka Kriste nya mbe Lawodisɛ: Wa nya ghena nya geze Amɛn, nde negha fete nya dɛŋe dɛŋe ba'a nya kaganda, nya kagha ta pɛtɛa wəshi nyi pate Shala nya:

¹⁵ Nahe 'ya keɗepe slene ta ŋa. Nahe 'ya keɗepe kaɗema na lɛnɛake, ya kenefe nefe. Megela ma nza lɛnɛake keɗema kenefe nefe.

¹⁶ Ama kwa nza ŋkɛ ŋ'warake na, kaɗema na kenefe nefe, ya lɛnɛake ne, 'ya katevənəhwe ŋa same kwa mɛa ɗa.

¹⁷ Ma pa na: Nde galɛpi 'ya, kwele kwele wəshi va 'ya, wəsə shɛ kaɗema va 'ya we. Ama keɗepe na tsema tsema nza na mbe ndiremi ba'a yaka we, nahe na kenza kande titikwə, kawəndə nya mederelaŋe ba'a kaghwələ.

¹⁸ Vatse ncɛ ŋa ntsehwele 'ya kezha pave mze kwa tere tere nya keyaɓemte geva le ghwə na va 'ya, kezha nza na kande galɛpi fate fate. Pave lekwesa nyi tɛawetɛa tɛawetɛa kezha dəpə geva ta ŋa, yitea ɗema hawe ta nza mederelaŋe kazhɛ ŋa perə. Pave ghwɛ kezha mene te ntsə ta ŋa nda nza na kanakɛ ŋkwa wɛŋe.

¹⁹ Ma mbeli nyi ɗe 'ya ne, kaŋele hɛ 'ya ba'a ka'yɛ hɛ 'ya. Ma gɛ, ncɛte hwepete ghə ta ŋa ba'a zhɛrete nza ta ŋa.

²⁰ Wa nya 'ya nya meslete mɛa mɛ degha kezha tsa ŋkwa. Ma kefate ŋwələ ɗa wəndə, nda ghwenemte mɛ degha ŋkɛ, katedzeki ghɛa ŋkɛ 'ya, katezeme wəsə kezeme 'ya le ba'a katezeme wəsə kezeme ŋkɛ le 'ya.

²¹ Ma wəndə nya kehərəte mpa ne, kateve nda hweŋkwa 'ya kezha nza pelɛ pasla ta ɗa le 'ya, kala 'ya, kwa sebe ta nya hərəte mpa 'ya ne, nahe 'ya kelə kantishɛ ɗa yitea Yiteyɛ ɗa pelɛ pasla ta ŋkɛ.

²² Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ.»