Ghena Kelɛŋə 22 - Ghena ta Shala

¹ Kwa sebe ta ŋkɛ, pa nde ghwene ta Shala ncɛte ɗa hələa yɛməa mpi, nya keɓayɛ ɓayɛ kala kwacaregesla, nya kegwezha gwezha shave mbe pasla ta Shala ba'a ŋa Zhɛgwə,

² nya kehwɛ dzeyi te tepe ta ŋkwa nya mbe melemea shɛ. Ma te yayata bela ta hələ ne, wəfe ta mpi nya keya meŋe bakeghəmbe zhigə mbe va, kwetɛŋe zhigə mbe tere ya shɛ. Kambe hwelefefi yɛ slekea wəfea shɛ.

³ Katezhɛne bezla ŋkwa kanza shɛ we. Katenza pasla ta Shala ba'a ŋa Zhɛgwə mbe meleme, katehawe ka mene nda slene ke Shala ve.

⁴ Katenewe kema ta ŋkɛ hɛ ba'a katerafe geva sləa ŋkɛ mɛa kema ta nci.

⁵ Katezhɛne viɗi kanza shɛ we, katezhɛne mbeli kaɗe waŋe ta paterela, ya ŋa veci we. Kwa nza ŋkɛ ne, katepele waŋe ta ŋkɛ Mahwətə Shala kənəa hɛ, katenza hɛ kaka meghea kɛfi kaghala ghala.

Se ta Yɛsə

⁶ Kwa sebe ta ŋkɛ ne, ma ke nde ghwene ta Shala sha 'ya: «Nahe ghena nyi kenza kaganda ba'a tiɗiɗi. Nahe Mahwətə Shala nya keve nda Sefəa ŋkɛ ke ka mɛ ŋkwa ta ŋkɛ keghweneke nde ghwene ta ŋkɛ kezha ncɛ nda wəsə nya takwa takwa kase ke ka mene slene ta ŋkɛ.»

⁷ Ma ke Yɛsə: «Fate, takwa takwa 'ya kase. Zlama ya va wəndə nya keyate ghena kelɛŋə nyi mbe palepa nya.»

⁸ Ma 'ya Zhaŋe ne, nahe 'ya kefate ba'a kenakɛ wəshia shɛhɛ. Ma kwa sebe nya fate ba'a nya nakɛ hɛ 'ya ne, nahe 'ya kegwəɗəŋə yitea seɗa ta nde ghwene ta Shala nya kencɛte ɗa hɛ kezha hawe ve.

⁹ Ama ma ke sha 'ya: «Menema na kala nya ma. Nde mene slene ta Shala 'ya kala gha, kala ka kesaka meyɛ ŋa nyi kaka mɛ ŋkwa ba'a kala pɛtɛa mbeli nyi keyate ghena nyi mbe palepa nya fate fate. Shala yahi na kahawe ve.»

¹⁰ Kwa sebe ta ŋkɛ, ma ke sha 'ya: «Wəfərəma ghena kelɛŋə nyi mbe palepa nya na ma, kwa nza ŋkɛ nahe və nya kedzeghete geva kezha pɛtɛa wəshia shɛhɛ kenza takwa takwa.

¹¹ Ma nde ndiremia mehele ne, mene wəsə kwa ndiremia ŋkɛ ŋkɛ zhɛkwa, ma wəndə nya wale wale ne, nza ŋkɛ wale wale zhɛkwa. Ama wəndə ganyɛ ne, mene ganyɛ ŋkɛ zhɛkwa, ma wəndə nya keveyi geva kaŋa Shala ne, ntsə geva ŋkɛ kanza kaŋa Shala.»

¹² Ma ke Yɛsə: «Fate, takwa takwa 'ya kase! Katekele zhɛme keŋki nda ke yayata wəndə kala wəsə nya menete ŋkɛ 'ya kase.

¹³ 'Ya ya kaAlfa ba'a kaOmɛga, nde ghate ba'a nde keɗaŋe, gha ba'a keɗaŋe.

¹⁴ Zlama ya va mbeli nyi ketsewe lekwesa ta nci. Tsagha ne, katenza hweŋkwa va hɛ kazeme ya ta wəfe ta mpi ba'a kadzeki kwa mɛ degha nyi te meleme.

¹⁵ Ama pelɛ te ŋwela nza kelɛa keti ba'a ka mene ghwɛ, ka mene mefətekwə ba'a ka mpə ŋkwa, ka hawe va wəshi nyi zhɛrete mbeli kashala ba'a pɛtɛa mbeli nyi keɗe ba'a nyi kesla tseŋwə.

¹⁶ Ma 'ya Yɛsə ne, nahe 'ya keghwenakɛ nde ghwene ta ɗa kezha ncɛ ŋayɛ ghena nya te ghəa yɛ Jikə ta ka Kriste. 'Ya ya kahwelefe ta David, kasaseregwa kwa kiɗi ŋkwa.»

¹⁷ Ma ke Sefəa Shala ba'a Makwa sha geze: «Nde.» Ma ke yayata wəndə nya kefa ghena shɛ sha geze perə: «Nde.» Ma wəndə nya shewə va ndere ne, se ŋkɛ. Ma wəndə nya keɗe yɛməa mpi ne, kaŋ'we ŋkɛ gəmə.

Keɗaŋe ta ghena

¹⁸ Ma 'ya Zhaŋe ne, ma 'ya gheci gheci sha yayata wəndə nya kefa ghena kelɛŋə nyi mbe palepa nya: ma kemtseheyite wəsə wəndə yite ne, kamtsehe nda ndiremi nyi jama jama nyi keɓelate geva mbe palepa nya Shala kadzeyitea ɗa nya te.

¹⁹ Ma kentamte wəsə wəndə shave hwa ghena kelɛŋə nyi mbe palepa nya ne, katentamte ŋa ŋkɛ bela ta ya ta wəfe ta mpi ba'a meleme nya keveyi geva tekeleke nyi keɓelate geva mbe palepa nya Shala.

²⁰ Ma ke wəndə nya kenegha fete yitea ghena shɛhɛ: «Kaganda ne, takwa takwa 'ya kase.» Amɛn! Se Nde sleke ŋkwa Yɛsə.

²¹ Pa zlaɓa ta Nde sleke ŋkwa Yɛsə nza le gheyɛ pɛtɛ.