Ghena Kelɛŋə 2 - Ghena ta Shala

Palepa ke Jikə ta ka Kriste nya mbe Ɛfɛze

¹ Rafete nda ghena nya ke wəndə nya te ghəa Jikə ta ka Kriste nya mbe Ɛfɛze: Wa nya ghena nya geze wəndə nya nza saseregwa mberefaŋe mbe dzeve kwa zeme ta ŋkɛ ba'a nya kedzeghwa dzeyi hwa yɛ paterela mze kwa tere tere mberefaŋe nya:

² Nahe 'ya keɗepe slene ta ŋa, yaka nya sahwe na ba'a zereghe ghena ta ŋa. Nahe 'ya keɗepe kaɗema na kasəwəte ka 'yaghwa mehele. Nahe na kedzeghakɛ mbeli nyi keveyi ghəa nci kaka ghwene ta Yɛsə, ama kaɗema hɛ kaghenci. Nahe na kentsate tseŋwəa nci.

³ Nahe na kenza kande zereghe ghena, nahe na kesahwe yaka tewəmbəreke 'ya, kewənə ŋa na va 'ya we.

⁴ Ama kaŋele ŋa 'ya yitea wəsə kwetɛŋe: nahe na kewəfəyite kwa ghate ta ɗe ta ŋa.

⁵ Zəzəte ŋkwa nya teɗe ŋa na te: zhɛrete nza ta ŋa ba'a mene slene kala nya se na kamene vəashi. Ma keɗema na kazhɛre nza ta ŋa ne, katese 'ya sha gha ba'a katekele paterela ta ŋa 'ya seyi te ŋkwa ŋkɛ.

⁶ Ama megela kwete ghena ta ŋa: kaɗe wəshi nyi mene mbelia Nikolas na, kala 'ya we.

⁷ Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ. Ke yayata wəndə nya kehərəte mpa shɛ ne, kateve nda zeme ya ta wəfe ta mpi nya kwa ntsa ta Shala 'ya.

Palepa ke Jikə ta ka Kriste nya mbe Smirne

⁸ Rafete nda ghena nya ke wəndə nya te ghəa Jikə ta ka Kriste nya mbe Smirne: Wa nya ghena nya geze wəndə nya kande ghate ba'a nya kande keɗaŋe, nya kese kemte mte ba'a nya kezhɛne kanza teghweme nya:

⁹ Nahe 'ya keɗepe yaka nya sa na ba'a titikwə nya te gha, ndagwara nahe na kenza kande mcɛlə. Nahe 'ya keɗepe ghena kwa ndiremi nya geze mbeli nyi keveyi ghəa nci kaka Zhəwif te gha, ama kenza hɛ kaka Zhəwif we, nahe hɛ kenza katsene ta mbelia Satan.

¹⁰ Ghazlənəma na va yaka nya tesa na ma. Fate: katekese kweci mbelia ŋayɛ gətəli kadzawa daŋgayɛ kezha dzeghe ŋayɛ, katesa yaka yɛ kahɛ meŋe. Ama nza kawəndə nya dɛŋe dɛŋe te 'ya hwa'a te mte, tagha gɛ, kateve ŋa mpi 'ya kazhɛme.

¹¹ Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ. Ma wəndə nya kehərəte mpa ne, katezhɛne ŋkɛ kaghazlənə va mte kwa bake we.

Palepa ke Jikə ta ka Kriste nya mbe Pɛrgame

¹² Rafete nda ghena nya ke wəndə nya te ghəa Jikə ta ka Kriste nya mbe Pɛrgame: Wa nya ghena nya geze wəndə nya nza kafayɛ nya lɛmelɛ, nya nza mɛ bake te nya:

¹³ nahe 'ya keɗepe ŋkwa nya nza na te: te ŋkwa nya nza pasla ta Satan. Ama nahe na kenza dɛŋe dɛŋe te 'ya, keɗema ɗa na ya te və nya peslekɛ Antipas, nde negha fete ta ɗa nya dɛŋe dɛŋe te 'ya mbeli te hɛɗia ŋayɛ, te ŋkwa nya nza Satan we.

¹⁴ Ama kaŋele ŋa 'ya yitea kwete ghena: mbeli nyi kezele ghena ta Balam ya shɛ hwa mbelia ŋa. Nahe Balam kese kancɛ nda ntsehwele ke Balak kezha ŋa nda keleŋa ke ka Israyɛl laka ghwete hɛ kazeme sli nya dzeghekɛ nda melɛ mbeli le ke wəshi nyi zhɛrete mbeli kashala ba'a kazhɛre nda wəmbə ke Shala nya kaganda.

¹⁵ Ɓiyitsa ne, mba mbeli nyi kezele ghena nya tekete mbelia Nikolas hwa gheyɛ.

¹⁶ Zhɛrete nza ta ŋa fate fate. Ma keɗema ŋkɛ tsagha ne, katese 'ya sha gha temə vireɗi ba'a katempa 'ya le mbelia shɛhɛ le kafayɛ nya kesame kwa mɛa ɗa.

¹⁷ Ma wəndə nya nza sleme ve ne, fa ghena nya geze nda Sefəa Shala ke Jikə ta ka Kriste ŋkɛ. Ke wəndə nya kehərəte mpa shɛ ne, kateve nda mane nya tewəfərə 'ya. Kateve nda pelɛ nya tɛawetɛa nya rafete geva slə mɛnɛfɛ te 'ya. Wəndə shɛ keɗema sləa shɛ, keɗema wəndə nya kekemave we.

Palepa ke Jikə ta ka Kriste nya mbe Tiyatire

¹⁸ Rafete nda ghena nya ke wəndə nya te ghəa Jikə ta ka Kriste nya mbe Tiyatire: Wa nya ghena nya geze Wəzege ta Shala nya, wəndə nya slesla ntsə kala ghwə ba'a nya nza yɛ seɗa ta ŋkɛ kala mze kwa ghwə nya shɛanɛa nya:

¹⁹ Nahe 'ya keɗepe slene ta ŋa, ɗe ta ŋa, nza ta ŋa dɛŋe dɛŋe, ntsə geva ta ŋa yitea slene ba'a zereghe ghena ta ŋa. Tsetsenya ne, za ma mene slene na ke nya kaghate.

²⁰ Ama kaŋele ŋa 'ya yitea wəsə kwetɛŋe: kasərə Zhɛzabɛl, nya keve ghəa nta kakwa mɛ ŋkwa ta Shala na kamene wəsə nya ɗe nde. Ama kamene slene ta ɗa yaghwete nde, kateke nda wəfə Shala nya kaganda ba'a zeme wəshi keseɗa nyi dzeghekɛ nda melɛ mbeli le hɛ ke wəshi nyi zhɛrete mbeli kashala nde ke hɛ.

²¹ Nahe 'ya kendeke nda və kezha mpi dzeve, ama kaɗe nde kasərə mefətekwə ta nta we.

²² Vatse gɛ, 'ya katenegha ŋkɛ te gezle ta yaka zlaɓe le mbeli nyi kemenete vale tahe le, keɗema hɛ kempiyi dzeve te slene nyi ndiremi ndiremia nci.

²³ Ɓiyitsa ne, katempə ŋwalea nta 'ya kezha baŋe pɛtɛa yɛ Jikə ta ka Kriste kaɗepe nahe 'ya kenza kande ɗepe yɛ zəzə ba'a yɛ mawe ta mbeli. Katemene nda 'ya ke yayata wəndəa ŋayɛ kala slene nya menete ŋkɛ.

²⁴ Ma gheyɛ kweci mbeli nyi kezele ɗa mbe Tiyatire ne, kese gheyɛ kazele ghena tseŋwə nya tekete nda mbelia shɛhɛ ke mbeli we, kese yɛ kazele ɗepe wəsə nya heka hɛ kawəshi nyi dzawe dzawe ta Satan we. Ma 'ya sha gheyɛ gɛ: kazhɛne 'ya katərənə ŋayɛ kamene kwete wəsə we.

²⁵ Ama keseyi mə wəsə nya va gheyɛ le berete hwa'a te və nya tezhɛne geva 'ya kase.

²⁶ Ke wəndə nya kehərəte mpa, nya keyate slene nyi menete 'ya hwa'a te keɗaŋe ta və ne, kateve nda berete 'ya te ghəa hwelefefi.

²⁷ Kateya hɛ ŋkɛ le geta lɛ ba'a katempə hɛ ŋkɛ kala yɛ ghwelepe rekɛ,

²⁸ tsagha kemave berete 'ya le ghəa ɗa va Yiteyɛ ɗa. Tagha gɛ, kateve nda saseregwa kwa kiɗi ŋkwa 'ya ke hɛ.

²⁹ Ma wəndə nya nza sleme ve ne, fa ghena nya geze nda Sefəa Shala ke yɛ Jikə ta ka Kriste ŋkɛ.