Ghena Kelɛŋə 12 - Ghena ta Shala

Yɛ male le shishi meŋele

¹ Pa kwete wəsə nya wəba ncɛte geva pelɛ ghweme: male nya keseɗete veci kala lekwesa, nya nza tere mbe hwəa seɗa ta nta ba'a nya nza derə meghe nya le saseregwa meŋe bakeghəmbe mbe ghəa nta.

² Takwa takwa nde kateya wəzege, ntake nde katsa lewela va zhɛ ta wəzege.

³ Kwa sebe ta ŋkɛ, pa kwete wəsə ncake geva pelɛ ghweme: shishi meŋele nya wəba. Nahe ŋkɛ kenza gheme kala ghwə, ghə mberefaŋe ba'a tereme meŋe ya te, derə meghe ya mbe yayata ghə.

⁴ Le sheghe ta ŋkɛ ne, pa ŋkɛ tsalemte kwa maheke ta bela ta saseregwa nyi pelɛ ghweme ba'a betakawa hɛ kadzete hɛɗi. Pa shishi meŋelea shɛ ghereŋenyɛ kwa kema ta male nya keteya wəzege, kezha mpeɗe wəzege yama ta ŋkɛ.

⁵ Pa malea shɛ yake wəzege teza, nya keteya pɛtɛa hwelefefi le geta lɛ. Ama pa wəzegea shɛ keleghe geva kadzeme sha Shala ba'a sha pasla ta ŋkɛ.

⁶ Tagha gɛ, pa malea shɛ hwɛnyɛ kadzete ɓerama nya hite nda ŋkwa Shala te, kezha zeme wəsə kezeme nda te kahɛ 1.260.

⁷ Tagha gɛ, pa mpa menete geva pelɛ ghweme. Pa Mishɛl ba'a ka ghwene ta ŋkɛ mpate mpa le shishi meŋelea shɛ. Pa shishi meŋelea shɛ ba'a ka ghwene ta ŋkɛ mpate mpa le perə.

⁸ Ama hərə shishi meŋelea shɛ ba'a mbelia ŋkɛ, mba ŋkwa kenza ta nci shɛ pelɛ ghweme we.

⁹ Pa shishi meŋele nya wəba shɛ neghakave geva te ŋwela. Gheŋkɛ ya kashishi nya vəashi, nya heka mbeli kagətəli keɗema Satan, nya keghwete hɛɗi lema. Pa ŋkɛ neghakawa geva kasawa te hɛɗi zlaɓe le ka ghwene ta ŋkɛ.

¹⁰ Kwa sebe ta ŋkɛ, pa 'ya fate gaka ta ŋwələ le berete pelɛ ghweme, ma ke ŋwələa shɛ: «Tsetsenya ne, nahe vəa mbele ŋkwa ta Shala kese. Tsetsenya ne, nahe Shala ta ɓəmə kencɛte berete ta ŋkɛ ba'a meghea ŋkɛ. Tsetsenya ne, nahe kwele kenza mbe dzeve ta Mɛsi. Kwa nza ŋkɛ ne, nahe nde ndeke nda fete ke ka kesaka meyɛ ɓəmə, wəndə nya keve nda fete ke hɛ viɗi le veci kwa kema ta Shala ta ɓəmə keneghamte geva sawa pelɛ ghweme.

¹¹ Nahe ka kesaka meyɛ ɓəmə kehərəte ŋkɛ te zlaɓa ta mimia Zhɛgwəa təmə ba'a te zlaɓa ta ghena nya neghate fete hɛ yite. Nahe hɛ kezamte ghə yitea mpia nci hwa'a te mte.

¹² Vatse gɛ, zlama mə, gha ghweme le mbelia ŋa. Ama yaka ya te ndərə ba'a hɛɗi. Kwa nza ŋkɛ nahe gətəli kesawa sha gheyɛ, le wənə tehwepe kwele kwele, va nya ɗepe ŋkɛ ɓɛhwɛ tene vəa ŋkɛ.»

¹³ Ma kwa ɗepe shishi meŋelea shɛ nahe ŋkɛ keneghakawa geva kasawa te hɛɗi ne, tereŋe ŋkɛ yitea male nya keyake wəzege teza.

¹⁴ Ama pa malea shɛ kemave bidzəa zele nya wəba bake kezha zlə kalə kadzete ŋkwa nya kehite nda geva te ɓerama, cakeɗake yitea shishi. Tagha ne, kaŋ'we wəsə kezeme nde kava mahekene ba'a tere ŋkwaŋe.

¹⁵ Pa shishia shɛ vənəhwəke yɛmə same kwa mɛa ŋkɛ kala ghwa kwa sebe ta nta kezha kelehwe ŋkɛ.

¹⁶ Ama pa hɛɗi kemanakɛ malea shɛ: pa hɛɗia shɛ ghwenemte geva ba'a sahwe hələ nya vənəhwəke shishi meŋele.

¹⁷ Kwele kwele zhɛ nda wənəa shishi meŋele va malea shɛ, ntake ŋkɛ kampa le ŋwale nyi ketene va malea shɛ, mbeli nyi keyɛ nda fete ke ghena nyi gezete Shala ba'a nyi dɛŋe dɛŋe te kaganda nya ncɛte Yɛsə.

¹⁸ Pa shishi meŋelea shɛ sletenyɛ mɛa ndərə.