Ghena Kelɛŋə 10 - Ghena ta Shala

Nde ghwene ta Shala ba'a palepa nya ɓɛhwɛ

¹ Pa 'ya nakɛ kwete nde ghwene ta Shala nya berete kasawa pelɛ ghweme. Nahe ləmbə kedəpəaghe geva kənə kala lekwesa, maɓelɛaŋe ya dzeyi yitea ghə ve. Nahe kema ta ŋkɛ kenza kala veci ba'a nahe yɛ seɗa ta ŋkɛ kenza kala geɗeɗe ta ghwə.

² Palepa nya ɓɛhwɛ ya tepele yitea dzeve ve. Pa ŋkɛ ŋkeɗeyi seɗa kwa zeme te ndərə ba'a seɗa kwa gwela te hɛɗi.

³ Kɛake ŋkɛ sha lewela le berete kala nivɛrə nya keghwəghwə. Ma kwa tsate lewela ŋkɛ ne, pa berazlɛ ta va mberefaŋe gakate gaka le berete.

⁴ Ma kwa gezemte ghena berazlɛ ta va nyi ne, nahe 'ya kehite geva kezha rafe hɛ. Ma vəa ŋkwa shɛ ne, ma ke kwete ghena gezete ɗa geva sawa pelɛ ghweme: «Wəfərəakɛ ghena nya gezete berazlɛ ta va nyi mberefaŋe nyi, rafema ghena shɛ na ma.»

⁵ Tagha gɛ, pa nde ghwene ta Shala nya nakɛ nya 'ya meslete te ndərə ba'a te hɛɗi kafete dzeve kwa zeme kadzeme yitea ghweme.

⁶ Pa ŋkɛ zemete fela le sləa Shala nya kaghala ghala, nya kepate ghweme ba'a wəshi nyi pelɛ, hɛɗi ba'a wəshi nyi te, ndərə ba'a wəshi nyi kwa. Ma ke nde ghwene ta Shala shɛ: «Mba və nya kesleyi geva shɛ tsetsenya we.

⁷ Ma vəa ŋkwa nya tevɛ veke nde mberefaŋe ta nde ghwene ta Shala ne, kateyipə zəzə ta ŋkɛ nya tewəfərə Shala kadzawa, kala nya gezete nda ŋkɛ ke ka mene slene ta ŋkɛ nyi kaka mɛ ŋkwa.»

⁸ Ma ke ŋwələ nya fate nya 'ya sawa pelɛ ghweme zhɛne kagezete ɗa ghena: «Kwiɗi kelete palepa nya ɓɛhwɛ nya tepele mbe dzeve ta nde ghwene ta Shala nya meslete te ndərə ba'a te hɛɗi.»

⁹ Pa 'ya hendave nda geva ke nde ghwene ta Shala ba'a 'yɛwete ve kezha ve ɗa palepa shɛ. Ma ke zhɛnete ɗa: «Kelete shɛ na zehwe: 'yaghwake tenza ŋkɛ kwa hwəa ŋa, ama ghɛnike kala mze tenza ŋkɛ kwa mɛa ŋa.»

¹⁰ Pa 'ya kelete palepa nya ɓɛhwɛa shɛ mbe dzeve ta ŋkɛ ba'a zehwe. Ma kwa mɛa ɗa ne, ghɛnike ŋkɛ kala yɛməa mze, ama kwa ndahwe 'ya ne, 'yaghwake zhɛrenyɛ ŋkɛ kwa hwəa ɗa.

¹¹ Tagha gɛ, ma ke mbeli sha 'ya: «Nda na kazhɛne kageze ghena kelɛŋə te mbeli, yɛ hɛɗi, yɛ ghena ba'a ka meghea kɛfi kwele kwele.»