Ghena Kelɛŋə 1 - Ghena ta Shala

Gha ta ghena

¹ Wəshi nyi tewəfərə nyi ncɛte Yɛsə Kriste dazhɛ dazhɛ ya mbe palepa nya. Nahe Shala kencɛte nda wəshia shɛhɛ kezha ncɛ nda wəsə nya takwa takwa kase ŋkɛ ke ka mene slene ta ŋkɛ. Nahe Kriste keghweneghe nda nde ghwene ta ŋkɛ ke nde mene slene ta ŋkɛ Zhaŋe kezha ncɛ nda wəsəa shɛ.

² Nahe Zhaŋe keneghate fete tsema tsema nza pɛtɛa wəshi nyi nakɛ ŋkɛ kaghena ta Shala ba'a kakaganda nya ncɛte nya ncɛte Yɛsə Kriste.

³ Zlama ya va wəndə nya kejaŋga palepa nya, zlama ya va mbeli nyi keve sleme yitea ghena kelɛŋə nya ba'a nyi kehawe va ghena nyi kerafete geva teke. Kwa nza ŋkɛ takwa takwa və nya kesleyi geva kezha wəshia shɛhɛ.

Njiŋwe ke Jikə ta ka Kriste mberefaŋe

⁴ Se va Zhaŋe, ke Jikə ta ka Kriste mberefaŋe te sla ta hɛɗia Azi: Pa zlaɓa ba'a kwelɛŋe nya kese va Shala nya tsetsenya, nya vəashi, nya ketese ndeke ŋayɛ geva, laka sefə nyi mberefaŋe kwa kema ta pasla ta ŋkɛ,

⁵ ba'a ne, laka Yɛsə Kriste, nde negha fete nya dɛŋe dɛŋe, nya kaTezhɛa wəzege, nde ghate ta wəndə kasame kwa kwele le mpi hwa mbeli nyi kempə mpə, wəndə nya te ghəa ka meghea kɛfi nyi te hɛɗi lema. Kaɗe ɓəmə Kriste, nahe ŋkɛ kembeɗeke ɓəmə shave mbe jaɗafa ta ɓəmə laka mimia ŋkɛ.

⁶ Nahe ŋkɛ kezhɛrete ɓəmə kawəvəsəa ka dzeghe Shala kezha mene nda slene ke Shala nya kaYitenyɛ. Ŋa ŋkɛ nza zləvə ba'a berete kaghala ghala. Amɛn.

⁷ Newe ma mə: sawa yasawa ŋkɛ mbe ləmbə. Katenewe ŋkɛ pɛtɛa mbeli, pa le mbeli nyi kempahwemte ŋkɛ. Kateŋgaɗe ghə pɛtɛa hwelefefi nyi te hɛɗi te ghəa ŋkɛ. Kaganda ne, katenza ŋkɛ kala nya! Amɛn.

⁸ Ma ke Shala Mahwətə: «'Ya ya kaAlfa, 'ya ya kaOmɛga, nde ghate ba'a nde keɗaŋe. 'Ya ya kawəndə nya tsetsenya, nya vəashi ba'a nya ketese, 'ya ya kaNde berete.»

Zhaŋe kanewe Kriste laka kelɛŋə

⁹ 'Ya ya kaZhaŋe, wəza meyɛ ŋayɛ nya kesa yaka kala gheyɛ. Jikə le gheyɛ ne, nahe 'ya kenza kaŋa Meghea Shala, kazereghe ghena 'ya mbe nza jikə le Yɛsə. Nahe mbeli kekeleghe ɗa kadzete hɛɗi nya te tepe ta yɛmə, nya nza sləa ŋkɛ kaPatmos, va nya nza 'ya dɛŋe dɛŋe te ghena ta Shala ba'a te kaganda nya ncɛte Yɛsə.

¹⁰ Ma te vecia Nde sleke ŋkwa ne, pa Sefəa Shala keseve ɗa, pa 'ya fate ŋwələ nya kegaka le berete kala gaka ta veke kwetere wəmbəa ɗa.

¹¹ Ma ke ŋwələa shɛ: «Ma wəsə nya nakɛ nya na ne, rafete mbe palepa ba'a ghweneghe nda palepa shɛ ke Jikə ta ka Kriste nyi mberefaŋe nyi: mbe Ɛfɛze, Smirne, Pɛrgame, Tiyatire, Sarde, Filadɛlfi ba'a Lawodisɛ.»

¹² Tewətelɛwe 'ya sha geva kanewe wəndə nya kegeze ɗa ghena. Tagha gɛ, dəkwə 'ya te yɛ paterela mze kwa tere tere mberefaŋe.

¹³ Ma te tepe ta paterela shɛhɛ ne, kwete wəsə nya kala wəndə ŋelɛ ya shɛ meslete. Lekwesa nya kenza hwa'a te wəmbəa seɗa ya kənə ba'a zewe mze kwa tere tere ya hwa hwə ve.

¹⁴ Nahe shintia ghəa ŋkɛ kenza tɛawe tɛawe kala shintia təmə keɗema kala kwacakelɛ. Kaslesla yɛ ntsə ta ŋkɛ kala ghɛnia ghwə.

¹⁵ Nahe yɛ seɗa ta ŋkɛ kenza kala mze kwa ghwə nya shɛanɛa, kagaka ŋwələa ŋkɛ kala gaka ta mewədzərə ta yɛmə.

¹⁶ Saseregwa mberefaŋe ya mbe dzeve kwa zeme ta ŋkɛ, kafayɛ nya lɛmelɛ, nya nza mɛ bake te nde same kwa mɛa ŋkɛ. Kaɓele kema ta ŋkɛ kala nza ta veci talala kwa ghə.

¹⁷ Ma kwa nakɛ 'ya ne, terərəmə 'ya teɗe ɗa yitea seɗa ta ŋkɛ kala wəndə kemte mte. Pa ŋkɛ dapeyi ɗa dzeve kwa zeme ta ŋkɛ kwa ghə, ma ke sha 'ya: «Ghazlənəma na ma, 'ya ya kande ghate ba'a kande keɗaŋe.

¹⁸ Nahe 'ya kenza teghweme. Nahe 'ya kese kemte mte, ama tsetsenya ne, teghweme 'ya kaghala ghala. Berete ya va 'ya te mte ba'a te ghɛa mbelia kwahɛɗi.

¹⁹ Rafe wəsə nya newe nya na, wəsə nya kemene geva nya tsetsenya ba'a nya ketese kwa sebe.

²⁰ Wa nya ghena nya tewəfərə mbe saseregwa nyi mberefaŋe nyi newe nyi na mbe dzeve kwa zeme ta ɗa ba'a paterela mze kwa tere tere nyi mberefaŋe nyi nya: nahe saseregwa nyi mberefaŋe kenza kambeli nyi te ghəa Jikə ta ka Kriste mberefaŋe, nahe paterela nyi mberefaŋe kenza kaJikə ta ka Kriste mberefaŋe.