Ɛsdras 5 - Ghena ta Shala

¹ Ma te kwete hɛ, pa yɛ Azhɛ le Zakari, wəzege ta Ido nyi kaka mɛ ŋkwa ta Shala gezete nda ghena ta Shala ta ka Israyɛl nya kaShala ta nci ke ka Zhəwif nyi mbe Zhɛrəzalɛm ba'a nyi mbe Zhəwda.

² Tagha gɛ, pelɛhetɛme yɛ Zorobabɛl, wəzege ta Shɛyaltiyɛl le Yɛshəwa, wəzege ta Yosadak sate te ŋkwa yitea slene ta ŋa ta ghɛa Shala pelɛ Zhɛrəzalɛm, zlaɓe hɛ le ka mɛ ŋkwa ta Shala nyi kekemane hɛ.

³ Ma mbe vəa shɛ, pɛkwe Tatenay, ŋgwamna nya te bela ta hɛɗi nya laka ŋkwa kepəkwə ta veci yitea Efrate, zlaɓe le Shetar-Boznay ba'a kweci mbelia nci, ma ke hɛ sha hɛ: «Wa nde ndeke ŋayɛ hweŋkwa kezha ŋa ghɛa Shala zhɛkwa ba'a kezha zlaŋele sheghwə nyi wa?

⁴ Ka'yɛwe ghen'yɛ va gheyɛ kezha ndeke n'yɛ sləa mbeli nyi keŋa ŋkwa shɛ yɛ.»

⁵ Ama mbe newe ghweme Shala te mbelia jama ta ka Zhəwif. Kese mbeli kafɛa hɛ kejive mbe kema le slenea shɛ nda tedzeva Dariyəs ghena nya rafete nda mbeli ba'a nda tese zhɛne ta ŋkɛ te we.

Ka Zhəwif nyi ncɛte nda mbeli ke meghe Dariyəs

⁶ Wa nya ghena nya te palepa nya ghweneghe nda yɛ Tatenay, ŋgwamna nya te bela ta hɛɗi nya laka ŋkwa kepəkwə ta veci yitea Efrate, Shetar-Boznay le kweci mbelia nci nyi te ghəa hɛɗia shɛ nya ke meghe Dariyəs.

⁷ Wa nya kala nya rafete geva ŋkɛ: «Ke meghe Dariyəs, pa Shala ndeke ŋa kwelɛŋe!

⁸ Meghea n'yɛ, kaɗe ghen'yɛ kageze ŋa nahe ghen'yɛ kese te hɛɗia Zhəwda nya nza ghɛa Shala nya wəba mbe. Ŋa yaŋa ka Zhəwif zhɛkwa le pelɛ kwa tsehe tsehe ba'a sheghwə nyi zlaŋele mbeli mbe dewe. Tiɗiɗi mene geva slenea shɛ ba'a kahe kahe jive ŋkɛ mbe kema.

⁹ Nahe ghen'yɛ kese ka'yɛwe ghena va mbelia jama ta nci, ma ke ghen'yɛ sha hɛ: ‹Wa nde ndeke ŋayɛ hweŋkwa kaŋa ghɛa Shala zhɛkwa ba'a kazlaŋele sheghwə nyi wa?›

¹⁰ Zhɛne ne, nahe ghen'yɛ kese ka'yɛwe sləa nci kezha ncɛ ŋa ba'a kezha rafave ŋa sləa mbeli nyi te ghəa nci.

¹¹ Ma zhɛnete n'yɛ hɛ: ‹Ka mene slene ta Shala nya kepate yɛ ghweme le hɛɗi ghen'yɛ. Ghɛa Shala nya ŋate ba'a nya kiɗimte kwete meghea ka Israyɛl nya wəba vəashi yazhɛne ghen'yɛ kaŋa.

¹² Ama kwa bezemte nda wənə ka shihɛ n'yɛ ke Shala tehwə ghweme ne, pa vame hɛ mbe dzeve ta nde Kaldɛ Nabəkodonozor nya kameghea ka Babilone, pa ŋzlakawa ghɛa Shala shɛ ba'a fəghe mbeli kajive Babilone.

¹³ Ndagwara te kwa ghate ta va nya se Sirəs te meghe mbe Babilone ne, nahe ŋkɛ kendeke nda hweŋkwa ke mbeli kezha zhɛne mbeli kaŋa ghɛa Shala shɛ.

¹⁴ Nahe meghe Nabəkodonozor kefəhwe wəshi nyi le mze kwa tere tere ba'a nyi le mze kwa tɛawetɛa nyi kese mbe ghɛa Shala pelɛ Zhɛrəzalɛm, kezha fəyi ki ghɛa shala ta ka Babilone. Nahe meghe Sirəs kefəakave hɛ shave ki ghɛa shala ta ka Babilone, kedapate nda hɛ te dzeve ke wəndə nya nza sləa ŋkɛ kaShɛshebasar nya ntave ŋkɛ kaŋgwamna ta ka Zhəwda.

¹⁵ Ma ke shɛ: Fəte wəshi nyi shɛ na zhɛneyi mbe ghɛa Shala nya mbe Zhɛrəzalɛm, nda mbeli kaŋeyi ghɛa Shala te ŋkwa nya se ŋkɛ.

¹⁶ Tagha gɛ ne, pɛkwe Shɛshebasar mbe Zhɛrəzalɛm kagha yɛ shihəa ghɛa Shala. Se te vəa shɛ pa ɓeshi ne, ŋa yaŋa geva ŋkɛ, ama kekiɗi ŋkɛ we.›

¹⁷ Ma tsetsenya kenza nde kaɗe meghe ne, dzeghakɛ mbeli kanewe mbe palepa ta wəshi nyi menete ka meghea ka Babilone vəashi kezha ɗepe kenza nde kaganda ndeke nda hweŋkwa keŋa ghɛa Shala mbe Zhɛrəzalɛm meghe Sirəs ke mbeli zhɛkwa. Kwa sebe ta ŋkɛ ne, pa mbeli gezete n'yɛ zəzə nya tarete meghe.»