Ɛzɛkiyɛl 7 - Ghena ta Shala

Mahwətə kageze kwa keɗaŋe ta nza ta Israyɛl

¹ Ma ke Mahwətə sha 'ya:

² «Wəndə ŋelɛ, fate ghena nya geze nda 'ya, 'ya Shala Mahwətə ke ka Israyɛl: Wa nya kwa keɗaŋe ta və nya kaŋa bela ta hɛɗi nyi wəfaɗe nyi gɛ!

³ Tsetsenya gɛ ne, nahe ŋa ŋayɛ: 'ya kateve hwepe wənəa ɗa te gheyɛ. 'Ya katemeha ghwə te gheyɛ yipə yipə le dzeghwa ta ŋayɛ ba'a 'ya kateve wəshi nyi ndiremi ndiremi kashasha ta ŋayɛ kwa ghəa ŋayɛ.

⁴ Katezhɛ heli 'ya ba'a katepele ntsə 'ya yitea gheyɛ we. Kateŋki ŋayɛ dzeghwa ta ŋayɛ 'ya ba'a darahwe tencɛ geva slene nyi ndiremi ndiremi kashasha ta ŋayɛ. Ma tsagha, kateɗepete yɛ 'ya ya kaMahwətə.

⁵ Wa nya ghena nya geze Shala Mahwətə nya: Ndiremi nya ɗema nya keyipə shɛ nde se!

⁶ Kwa keɗaŋe ta və nde se, se yase ŋkɛ. Katese ŋkɛ kezha me kənəa gheyɛ!

⁷ Se yase kwa keɗaŋe ta və kadzeghəa gheyɛ mbeli nyi te hɛɗi. Se yase vəa shɛ, takwa takwa vecia meha ghwə kase. Medada ya te ŋkwa zlama dzeyi hwa yɛ ghweme.

⁸ Tsetsenyanyɛ teve hwepe wənəa ɗa 'ya kənəa gheyɛ, waɗe tepele nda hweŋkwa 'ya kadzeghəa gheyɛ. 'Ya katemeha ghwə te dzeghwa ta ŋayɛ ba'a 'ya kateŋki ŋayɛ pɛtɛa slene nyi ndiremi ndiremi kashasha ta ŋayɛ.

⁹ Katezhɛ heli ba'a katepele ntsə 'ya yitea gheyɛ we. Kateŋki ŋayɛ zhɛme 'ya kala dzeghwa ta ŋayɛ. Darahwe tencɛ geva slene nyi ndiremi ndiremi kashasha ta ŋayɛ. Ma tsagha, kateɗepete yɛ 'ya Mahwətə nde ɗa ŋayɛ.

¹⁰ Wa nya vecia meha ghwə nya. Wa nya kwa keɗaŋe ta və nya kwa hweŋkwa kase. Ya yaya geva mene berete, mtsehe yamtsehe geva kele ghə.

¹¹ Kala geta nya kekafete geva kezha mene wəsə kwa ndiremi mene berete. Wəsə shɛ katetene va gheyɛ we, ya zlama ta ŋayɛ, ya nza kwele kwele ta ŋayɛ, ya wəba ta ŋayɛ.

¹² Nahe və kemenete geva, takwa takwa hɛa shɛ kase. Mba nde pa wəshi kezlama, mba mehele ta nde pamte wəshi ketaze, kwa nza ŋkɛ nahe hwepe wənəa ɗa keme te mcɛlə nyi te hɛɗi pɛtɛ.

¹³ Mba nde zhɛre dzeve katezhɛne kadzemɛa wəshi nyi pamte ŋkɛ, ya gheŋkɛ nza mba teghweme we, kwa nza ŋkɛ katezhɛremte geva ɗa nya keteme te wəshi nyi te hɛɗi we. Yayata wəndə katenza mbe fete ta ŋkɛ, vatse ɗema kwete wəndə katekemave berete.

¹⁴ Katevɛ ghwekwəlekwə mbeli kezha hi geva, ama wəndə shɛ katedzemte mpa, va nya nza hwepe wənəa ɗa te mcɛlə nyi te hɛɗi pɛtɛ we.

¹⁵ Katenza mpa dzeyi kwa yɛ hweŋkwa, katenza ba ba'a ma dzeyi ki yɛ ghɛ. Katempə mbeli kwamte mpa, katempə mbeli dzeyi mbe meleme va ma ba'a ba.

¹⁶ Katehwɛ mbeli nyi mba teghweme dzeme hwa yɛ ghweme. Kateŋələvə yayata wəndə va fete ta ŋkɛ kala gaka ta ghwəɗəŋkwə.

¹⁷ Pɛtɛ tenza dzeve ta nci kempə mpə ba'a kaderali tenza seɗa ta nci.

¹⁸ Katehwepe wəsə hɛ hwa hwə, katebare bare hɛ va ghazlənə. Kanewe newe hawe mbeli kwa kema ta nci, pɛtɛ tenza ghəa nci keŋsə ŋsə.

¹⁹ Katebete mze kwa tɛawetɛa ta nci hɛ dzeyi kwa yɛ hweŋkwa, katenewe mze kwa tere tere ta nci hɛ kala kəsə. Kwa nza ŋkɛ, ya yɛ mze kwa tɛawetɛa le mze kwa tere tere ne, katembelete hɛ hɛ te vecia hwepe wənəa Mahwətə we. Katezhɛne ŋwələa nci kabehe, ya hwəa nci kaviɗi we, kwa nza ŋkɛ, yɛ mze kwa tɛawetɛa le mze kwa tere tere ka kesame hɛ mbe jaɗafa.

²⁰ Wəshia nci nyi nza shɛ zləvə te ka kelete nda ghə ke hɛ, le wəshia shɛhɛ vɛsəte wəshi ndiremi ndiremi kashasha ta nci, wəshia kwadanjia shala ta nci nyi hɛ. Vatse tezhɛre hɛ 'ya kakəsə kwa kema ta nci.

²¹ Katepele nda hweŋkwa 'ya ke ka mentiɓə kafə mcɛləa nci shɛhɛ ba'a ke ka 'yaghwa mehele kafə hɛ kawəshi nyi hwa mpa. Katezhɛre hɛ hɛ wale wale.

²² Katezhɛre nda wəmbə 'ya ke hɛ vəa ŋkwa nya zhɛre wəsəa ɗa nya nza zləvə te mbeli wale wale. Katese ka mefətekwə kadzembe ba'a katezhɛre ŋkɛ wale wale.

²³ Gezlate zewe lɛ, kwa nza ŋkɛ rayɛ hɛɗi va ka mpə ŋkwa ba'a viɗi meleme va mene berete.

²⁴ Kateheka hwelefefi nyi 'yaghwa 'yaghwa mehele 'ya kase. Katefəhwe yɛ ghɛa nci hɛ. Kateza sebe 'ya te kele ghəa ka berete berete ba'a katezhɛre ŋkwa nci nyi keveyi geva tekeleke mbeli wale wale.

²⁵ Katese heɗe kema. Katezele nza kwelɛŋe hɛ, ama katesləyi ŋkɛ hɛ we.

²⁶ Katese yɛ ndiremi mɛ mɛ ba'a ghena nyi ndiremi ndiremi tagha tagha. Kate'yɛwe wəshi nyi ncɛte nda Shala ke nde mɛ ŋkwa mbeli, katezhɛne nde dzeghe Shala kateke nda wəshi ke mbeli ba'a mbelia jama kancɛ nda ntsehwele ke mbeli we.

²⁷ Katenehwene meghe, kwetɛ kwetɛŋe tenza mehele ta wəndə nya te ghə ba'a pɛtɛ tebare bare mbeli nyi te hɛɗi va ghazlənə. Katemene nda 'ya ke hɛ kala dzeghwa ta nci ba'a katemeha ghwə 'ya te hɛ kala nya hi ŋkɛ va hɛ. Ma tsagha, kateɗepete hɛ 'ya ya kaMahwətə.»