Ɛzɛkiyɛl 47 - Ghena ta Shala

Ntsə ta ghwa nya keshave mbe ghɛa Shala

¹ Pa wəndəa shɛ zhɛneke ɗa kadzemɛa ŋkwa kedzembe ghɛa Shala. Newe 'ya ne, kagwezha gwezha yɛmə same yitea zeweve ta ŋkwa kedzeki nya laka ŋkwa kesame ta veci, va nya nza ŋkɛ laka ŋkwa shɛ kema ta ghɛa Shala. Dzawa laka bela kwa zeme hwɛ yɛməa shɛ va ghɛa Shala, dzeyi laka bela kwa zeme va reghwetɛ.

² Cape wəndəa shɛ kelakave ɗa kashave kwa mɛa cɛ nya laka bela kwa gwela. Kwa sebe ta ŋkɛ, jasle ŋkɛ jaslete ŋkwa nya pelɛ pelɛ le 'ya hwa'a mɛa ŋkwa kadzeki nya laka ŋkwa kesame ta veci. Tagha ne, kagwɛ'a gwɛ'a yɛmə dzawa laka bela kwa zeme va mɛa cɛa shɛ.

³ Hende wəndəa shɛ hendakɛ geva dzeyi laka ŋkwa kesame ta veci. Zewe ya yitea dzeve ve, pa dzeghete ŋkwa kadzeghe slibə. Kwa sebe ta ŋkɛ ne, pa keseghe ɗa jive te yɛməa shɛ: hwa'a yitea daŋwela nde va 'ya.

⁴ Kwetere wəmbəa ŋkɛ ne, pa dzeghete ŋkwa kadzeghe slibə, pa keseghe ɗa jive te: ghala ghəa shene yɛməa shɛ va 'ya. Zhɛne ne, pa dzeghete ŋkwa kadzeghe slibə, pa keseghe ɗa jive te: hwa'a yitea yitə nde va 'ya.

⁵ Kakwa keɗaŋe ne, pa dzeghete ŋkwa kadzeghe slibə ɓiyitsa. Tagha gɛ ne, nahe ŋkɛ kenza kahələ nya kehwɛ le berete kaɗema 'ya kajive ɗa te, lɛame ŋkwəɗə yite gare jive wəndə te le bamba. Kahələ nya ɗema wəndə kajivenyɛ te nde.

⁶ Ma ke sha 'ya: «Nahe na kemareve ndeɗekə tse na wəndə ŋelɛ?» Hende ŋkɛ hendemte ɗa seyi mɛ ɓɛhwɛ, kwetere wəmbəa ŋkɛ, zhɛne ŋkɛ zhɛneke ɗa kadzemɛa hələa shɛ.

⁷ Ma newe 'ya, kwa zhɛneke ɗa ŋkɛ ne, kwele kwele wəfe dzate mɛa yayata hələbəa ŋkɛ.

⁸ Ma ke sha 'ya: «Ma hələ nya ne, dzawa laka ŋkwa kesame ta veci dzawa nde va hɛɗi, dzawa kwa zlərəa Zhəwrdɛŋe dzawa nde nda tentsehe nde kwa ndərə kwa Ghwənəghwə. Ma nahe kentsehe nde kwa ndərəa shɛ ne, kayɛmə nya zeɗe tenza yɛməa ŋkɛ.

⁹ Ma te yayata ŋkwa nya telə hələa shɛ ne, katenza mama ta wəshi keseɗa nyi nza mpi hwe teghweme. Kwele kwele teya kelepe kwa, va nya nza ŋkɛ, kayɛmə nya zeɗe zhɛre yɛmə nya kwa ndərə nde. Ma te yayata ŋkwa nya telə nde ne, nda ya yaya wəshi.

¹⁰ Se mbe Ɛn-Gɛdi hwa'a mbe Ɛn-Ɛglayim ne, dandelaŋe tenza ka kese kelepe mɛ. Mɛa ndərəa shɛ teghwele zamba ta nci hɛ. Kala nya kwa ndərəa Mɛditɛranɛ tenza mama ta kelepe kwa.

¹¹ Ama kweci bela ta yɛmə nyi daghelɛake daghelɛake vare ndərə ne, keghwənəghwəa ghwənəghwəanji tenza hɛ, yitea mene ghwene mbeli same kwa hɛ.

¹² Ma te yayata hələbəa hələa shɛ ne, katepese mama ta wəfe nyi keya. Kategheme slekea nci tɛape we, nda ya yateya wəfea shɛhɛ kevə kevə. Ketere ketere tenda ya mbeli te hɛ, va nya shave yɛməa shɛ mbe ŋkwa nya keveyi geva tekeleke. Kawəsə kezeme tenza ya ta nci ba'a kaghwɛ tenza slekea nci.»

Mahwətə kamɓe yɛ ghala ta hɛɗia Israyɛl

¹³ Wa nya ghena nya geze Shala Mahwətə nya: «Wa nyi ghala ta hɛɗi nya tenehe nda yɛ ke hwelefefia Israyɛl nyi meŋe bakeghəmbe nyi. Ma hwelefe ta Zhozɛf ne, bela bake yateŋ'we nde.

¹⁴ Yipə yipə tenehe hɛɗi yɛ kwelɛ ghəa ŋayɛ, va nya nza ŋkɛ, nahe 'ya kezemete kafela kave nda ke ka shihɛ ŋayɛ, kawəsə kezeme ghɛa ŋayɛ tenza ŋkɛ.

¹⁵ Ma laka bela kwa gwela ne, mɛa ndərəa Mɛditɛranɛ teslə ghala shɛ, kajive kwa hweŋkwa nya kajive mbe Hɛtlon, Lebo-Hamat, Sedad,

¹⁶ kwetere wəmbəa ŋkɛ, jive mbe yɛ meleme ta Berota ba'a Sibrayim nyi kwelɛ yɛ hɛɗia Damas le hɛɗia Hamat ba'a jive mbe Hasɛr-Tikon nya dekwe vare ghala ta Hawran.

¹⁷ Ma tsagha, kwa teslə ghala shɛ mɛa ndərəa Mɛditɛranɛ ne, hwa'a tenza nde yitea hɛɗia Hasar-Ɛnan, yɛ hɛɗia Damas le Hamat nya laka bela kwa gwela. Nya ya kaghala nya laka bela kwa gwela.

¹⁸ Ma laka ŋkwa kesame ta veci, ghala teslə nde te kwete ŋkwa kwelɛ yɛ Damas le Hawran ne, dzawa kwa zlərəa Zhəwrdɛŋe nya kwelɛ yɛ hɛɗia Gala'ad le hɛɗia Israyɛl tedzawa ŋkɛ, hwa'a mbe Tamar nya mɛa ndərə kwa Ghwənəghwə tezhigə nde. Nya ya kaghala nya laka ŋkwa kesame ta veci.

¹⁹ Ma laka bela kwa zeme ne, mbe Tamar teslə ghala shɛ hwa'a yitea ɗaslea Mɛriba nya mbe Kadɛs. Dzawa kwa hələa Ɛzhipte tedzawa nde, hwa'a mɛa ndərəa Mɛditɛranɛ. Nya ya kaghala nya laka bela kwa zeme.

²⁰ Ma laka ŋkwa kepəkwə ta veci ne, ndərəa Mɛditɛranɛ nde tenza kaghala nya kwa bela kwa zeme hwa'a mbe Lebo-Hamat nya pelɛ bela kwa gwela. Nya ya kaghala nya laka ŋkwa nya kepəkwə ta veci.

²¹ Katenehe hɛɗia shɛ yɛ kwelɛ hwelefefia Israyɛl.

²² Le kwasheghediɗi tenehe hɛɗia shɛ yɛ kwelɛ ghəa ŋayɛ ba'a kwelɛ ka se se nyi hwa gheyɛ, nyi keyake ŋwale hwa gheyɛ. Yipə yipə le ka Israyɛl tenewe ghweme mbeli te hɛ, katenta ŋa nci hɛ bela ta wəsə kezeme ghɛ le kwasheghediɗi hwa hwelefefia Israyɛl.

²³ Yayata nde se se katekemave ŋa ŋkɛ hɛɗi mbe hwelefe nya nza ŋkɛ. 'Ya Shala Mahwətə nde gezete.»