Ɛzɛkiyɛl 27 - Ghena ta Shala

Nehwene kənəa meleme ta Tir

¹ Ma ke Mahwətə sha 'ya:

² «Wəndə ŋelɛ, gha nehwene kənəa meleme ta Tir.

³ Mɛa ndərə melemea shɛ ba'a kwele kwele mene fəli ŋkɛ le mbeli nyi te hɛɗi nyi dzeyi te ndərə. Ma pa na sha tegeze nda: Wa nya ghena nya geze Shala Mahwətə nya: Ma gha Tir, kwele kwele zlama na te ganyɛa ŋa.

⁴ Te tepe ta ndərə hɛɗia ŋa, keganyɛ ŋate ŋa mbeli nyi keŋate ŋa.

⁵ Le sheghwəa vɛ nyi kesawa pelɛ ghweme ta Senir baŋete ŋkwa nyi dzeyi mɛa mɛa ŋa hɛ, le sheghwəa lekeleke nyi kesawa pelɛ Liban menete seləa kwambeləa ŋa hɛ.

⁶ Le sheghwə nyi kese mbe Bashan menete sheghwə kezleɗe ŋa hɛ. Le sheghwəa lekeleke nyi te hɛɗi nyi te ndərəa ka Grɛk baŋete ŋkwa kentishɛ nyi kwa gha hɛ, pa hɛ pesakɛ le yɛ slene ta cewe.

⁷ Zlave pawa kwa tsa tsa nya kese mbe Ɛzhipte yamenete zlave nya tsəkwə kwambeləa nci sefə le hɛ. Gheŋkɛ yanewe mbeli te se cakeɗake. Zlave nyi kefi fi le yirə kwa ndereme ndereme ba'a kwa ghɛmɛ nyi kese te hɛɗia Shipre ya kənəa wəshi kepamte ta ŋa.

⁸ Mbeli nyi mbe Sidon ba'a nyi mbe Arva ya kaka zleɗe ŋa kwambelə. Ka Tir nyi kecaŋa caŋa ya kambeli nyi te ghəa kwambelə.

⁹ Ka Biblos nyi keɗepe mene wəshi ba'a nyi kecaŋa caŋa ka zleraɗe ɗəkə kwelɛ perawe nyi te. Pɛtɛa kwambelə nyi kedzeghwa te ndərə kaghereŋe mbe gha kapa wəshi nyi pamte na.

¹⁰ Ka sewajɛ ka Pɛrse, ka Ləwd ba'a ŋa ka Pəwt ya kaka sewajɛa ŋa. Mbe gha tseɓa yɛ geləa nci ba'a kwenəa nci hɛ. Ghenci ya kaberete ta ŋa.

¹¹ Ka sewajɛa ka Arva zlaɓe le ŋa ŋa ya dzeyi te zlia ŋa kezha ŋa. Ka Gamad ka ya cɛa ŋa nyi bebiya bebiya. Dzeme vare zli nya yitea gha seɗe geləa nci hɛ. Tsagha terekete ganyɛa ŋa hɛ.

¹² Kambeɗe mama ta wəshi ka Tarsis mbe gha. Kapa wəshia ŋa hɛ te mze kwa tɛawetɛa, lɛ, kwekwərə ba'a dalema.

¹³ Pa le ka Grɛk, ka Təwbal ba'a ka Mɛshɛk mbeɗe wəshi na le hɛ. Kambeɗe ŋa ka mavashi ba'a wəshi nyi kamze kwa ghwə ghwə hɛ te wəshia ŋa.

¹⁴ Kapamte ŋa gədəwəa lɛmə kemene slene, gədəwəa lɛmə kezleɗe ba'a gədəwə kwara lɛmə ka Bɛt-Togarma.

¹⁵ Kambembeɗe wəshi yɛ le ka Dɛdan perə. Kase mbeli nyi te kweci hɛɗi nyi te ndərə kapa wəshia ŋa. Te yɛ slene ta cewe ba'a te yɛ sheghwəa hentse pa wəshi hɛ va gha.

¹⁶ Kambeɗe wəshi nyi menete na ka Ɛdom kwele kwele va gha te pelɛ nyi nza zləvə te hɛ, zlave ganji nyi gheme gheme ba'a nyi ketsa tsa, zlave nyi shɛanɛa shɛanɛa, yɛ gatsahwepa ba'a pelɛ nyi ghɛmɛa ghɛmɛa.

¹⁷ Pa le ka Zhəwda ba'a ka Israyɛl kese kambeɗe wəshi va gha. Yɛ marəwrə, ha, yɛməa mze, n'yi ba'a ŋ'wa ta wəfe nyi kezəŋwə yase hɛ kafə ŋa.

¹⁸ Ka Damas ka se kambeɗe wəba ta wəshi nyi menete na ba'a mama ta mcɛləa ŋa. Te tɛ nya kese mbe Hɛlbon ba'a te shintia timɛti nya kese mbe Sahar mbeɗe hɛ hɛ va gha.

¹⁹ Se mbe meleme ta Əwzal ne, kaŋki ŋa wəshia ŋa nyi hwa hɛ hwelefe ta Dan ba'a ŋa Yavan le lɛ kwa gezla gezla, yɛ zlapələa wəfe nyi kezəŋwə ba'a gwəzə nyi kezəŋwə kala 'wərdə.

²⁰ Kambeɗe gwada kepelake te wəmbəa gədəwə ka Dɛdan va gha.

²¹ Kambeɗe wəshi ka Arab ba'a mbeli nyi te ghə mbe Kɛdar va gha. Te zhɛgwəa lɛməa timɛti, gamea lɛmə ba'a te kwi mbeɗe hɛ hɛ va gha.

²² Pa le ka zhɛre dzeve nyi mbe Saba ba'a nyi mbe Ragma kambeɗe wəshi va gha. Te yɛ 'wərdə ganji, mama ta pelɛ nyi nza zləvə te hɛ ba'a te mze kwa tere tere mbeɗe hɛ hɛ va gha.

²³ Kambeɗe wəshi meleme ta Haran, ŋa Kanɛ, ŋa Ɛdɛn, ka zhɛre dzeve nyi mbe Saba, nyi mbe Asiri ba'a nyi mbe Kilmad va gha.

²⁴ Lekwesa ganji yambeɗe wəshi hɛ te va gha: yɛ karalame, yɛ lekwesa nyi gheme, yɛ lekwesa nyi ketsa tsa, yɛ lekwesa nyi galawe galawe ba'a zewe nyi neghate mbeli megela.

²⁵ Kwambeləa ka Tarsis ka fə wəshi kepamte ta ŋa. Kwele kwele fəyi geva wəshi kwa gha, ɗaŋe ɗaŋe fəyi wəshi mbeli kwa gha kala kwambelə nya te tepe ta ndərə.

²⁶ Kadzeyi te ŋkwəɗəa ndərə keleghe ŋa ka zleɗe ŋa. Ama katepesle ŋa sefə nya kesame kwa zeweve ta ghweme te tepe ta ndərə.

²⁷ Bətə tenza mcɛləa ŋa, wəshi nyi menete na, wəshi kepamte ta ŋa, ka mene slene ta ŋa, ka zleɗe ŋa, ka zleraɗe ŋa, ka pamte wəshia ŋa, ka sewajɛa ŋa ba'a mbeli nyi kwa gha kwa ndərə, vəa ŋkwa nya tendahwe ŋa yɛmə.

²⁸ Va gaka ta lewela ta ka zleɗe ŋa ne, katebare bare mbeli nyi dzeyi mɛa ndərə.

²⁹ Tagha gɛ, katesawa ka zleɗe kwambelə pelɛ kwambeləa nci. Katesawa kamene slene ba'a mbeli nyi te ghə te hɛɗi.

³⁰ Kateŋgaɗe ghə hɛ va ghena nya te gha ba'a katetsa lewela hɛ kwele kwele. Katekərə hɛɗi hɛ kənəa ghəa nci ba'a katedevələ geva hɛ hwa pəsəɗə.

³¹ Tewəmbəreke gha ne, kateŋsə ghə hɛ ba'a katehwepe wəshi hɛ hwa hwə. Kwele kwele tenehwene ŋa hɛ ba'a kwele kwele teŋgaɗe ghə hɛ yitea gha.

³² Ma mbe yaka ta nci ne, kategha nehwene hɛ kənəa gha, ma ke hɛ sha tegha nehwene kənəa gha: ‹Wa nde se kala Tir, meleme nya keza za nya kwa ndərə wa?›

³³ Ma kwa fəakame wəshi kepamte ta ŋa mbeli same kwa yɛ kwambelə ne, kwele kwele mbeli nyi ketekɛ na. Laka wəshia ŋa nyi kwele kwele ba'a wəshi kepamte ta ŋa ne, nahe ka meghe nyi te hɛɗi kezhɛrenji kaka mcɛlə.

³⁴ Ama kwa pesle ŋa na te ndərə ne, kwa zeweve ta yɛmə betenji wəshi kepamte ta ŋa ba'a pɛtɛa mbeli nyi kwa gha.

³⁵ Pɛtɛ mehele ta mbeli nyi te hɛɗi nyi te ndərə ketazenji tewəmbəreke gha. Pɛtɛ helia ka meghea kɛfi kesleslanji, pɛtɛ kema ta nci teheɗe.

³⁶ Figwə yavɛ ka zhɛre dzeve ta kweci hwelefefi va ghena nya te gha, nahe na kezhɛre ŋa kawəsə kedake ŋkwa. Bətə tenza na kaghala ghala!»