Ɛzɛkiyɛl 24 - Ghena ta Shala

Kala shaga nya kedene dene Zhɛrəzalɛm

¹ Ma te kwa mesli ta va kwa sebe ta nya fəhwe ŋkwa mbeli, mbe hɛ meŋe te kwa meŋe ta tere ne, ma ke Mahwətə sha 'ya:

² «Wəndə ŋelɛ, rafete veci nya ɓeshi nya, kwa nza ŋkɛ ɓeshi nya teha nda mpa meghea ka Babilone ke Zhɛrəzalɛm.

³ Gezete nda ghena ŋela nya ke ka Israyɛl nyi ntɛaŋentɛa ghə nyi. Ma pa na sha hɛ: Wa nya ghena nya geze Shala Mahwətə nya: veyi shaga te ghwə, shekawa yɛmə kwa.

⁴ Beteyi sli nyi kesla sla kwa, sli nyi ganji ganji: slia seɗa ba'a ŋa pehwepe. Viɗikɛ le 'yɛ'yɛ nyi ganji ganji.

⁵ Kelete slia təmə ganyɛ, tseneyi 'yɛ'yɛa ŋkɛ kwa zeweve ta shaga, takɛ kanya kwetɛŋe, kwa nza ŋkɛ pa le yɛ 'yɛ'yɛ kateta.

⁶ Vatse gɛ, wa nya ghena nya geze Shala Mahwətə nya: Ɗa ya te meleme nya kempə ŋkwa nya! Yipə yipə nde le shaga kwa dene dene nya keɗema kayaɓe. Fəakame sli nyi kwa kwete kwete, kwete shɛ katetene ya laka kwasheghediɗi we.

⁷ Mba mimi nya keshekeyi geva mbe melemea shɛ. Te keleɓa nya ɓerayɛ shekeyi geva nde. Keshekeyi geva te hɛɗi keɗema kedzeghənyɛ keləwə we.

⁸ Kezha mtsehe hwepe ta wənəa ɗa ba'a kezha ɗepe wa dewa 'ya ne, nahe 'ya kesərəakɛ mimi te keleɓa nya ɓerayɛ nya ɗema nde kanza tewəfərə.

⁹ Vatse gɛ, wa nya ghena nya geze Shala Mahwətə nya: Ɗa ya te meleme nya kempə ŋkwa nya, kwa nza ŋkɛ 'ya katemeha ghwə nya wəba le sheghwə.

¹⁰ Tsenete sheghwə təɗəmə, meheyite ghwə yite, takɛ sli te, mtseheyite zlɛampəli yite ba'a teremte yɛ 'yɛ'yɛ hɛmɗɛke.

¹¹ Kwa sebe ta ŋkɛ, veyi shaga hwayaŋe te laɗe ta ghwə yitea nefe nde ba'a yitea nza ŋkwa nya kwa ghɛmɛ. Ma tsagha, katerɛɗɛ reɗa nyi kwa ba'a katetere dene nya kwa.

¹² Gəmə leɓe ta mbeli! Katetere dene nya kwa shaga nya va ghwə we.

¹³ Zhɛrəzalɛm, nahe na kezhɛrete ghəa ŋa wale wale laka gwaya ta ŋa. Nahe 'ya keɗe kapɛmte ŋa wɛŋe, ama kezhɛre na wɛŋe we. Mba na kanza wɛŋe pa te veci nya teme 'ya kənəa gha le hwepe wənəa ɗa gɛ we.

¹⁴ Ma kegezete ghena 'ya Mahwətə ne, kateyipə geva ŋkɛ kadzawa. Katezhɛne geva 'ya te sebe keɗema katezhɛ heli 'ya we. Wəsə shɛ katezəzə 'ya we. Katemeha ghwə 'ya te dzeghwa ta ŋa ba'a te slene ta ŋa Zhɛrəzalɛm. 'Ya Shala Mahwətə nde gezete.»

Mte ta male ta nde mɛ ŋkwa

¹⁵ Ma ke Mahwətə sha 'ya:

¹⁶ «Wəndə ŋelɛ, 'ya katekelehwe male nya ɗehwe ntsə ta ŋa vəkə. Ama kateŋgaɗe ghə na we, katenehwene na ba'a katesawa nehwene yitea ntsə ta ŋa we.

¹⁷ Mba mbeli kefa ŋələvə ta ŋa, mba na kemene wəshi nyi mene mbeli kemte wəndə. Ama peɗeyite zlave yitea ghəa ŋa, seɗete tsahwa ta ŋa. Mba na kedəpə wəsə kənəa kema ta ŋa ba'a mba na kezeme wəshi nyi takɛ mbeli yitea nehwene.»

¹⁸ Ma masheke ne, pa 'ya gezete nda ghena ke mbeli, ama kwa tɛhwɛɗi, mtiwə male ta ɗa. Ma te hendɛ ta ŋkwa ne, pa 'ya menete kala nya gezave ɗa Mahwətə.

¹⁹ Ma ke mbeli 'yɛwete va 'ya: «Wa wəsə nya ɗe na kancɛ n'yɛ le wəsə nya menete nya na kala nya wa?»

²⁰ Ma 'ya zhɛnete nda ke hɛ: «Wa nya ghena nya gezete ɗa Mahwətə kageze ŋayɛ,

²¹ gheyɛ nyi kaka Israyɛl nyi: 'Ya Shala Mahwətə ne, katesərə mbeli 'ya kakelemte zləvə te ghɛa ɗa nya zlama nya yɛ te, nya mawe nya ntsə ta ŋayɛ ba'a vate mehele ta ŋayɛ nya yɛ te. Katempə ŋwale tezhili ba'a ŋwalea kwɛa ŋayɛ nyi sərəakɛ nyi yɛ mbe Zhɛrəzalɛm va kafayɛ.

²² Ma tsagha ne, katemene yɛ kala nya menete nya 'ya. Katedəpə wəsə yɛ kənəa kema ta ŋayɛ ba'a katezeme wəshi kezeme nyi takɛ mbeli yitea nehwene yɛ we.

²³ Katesərə yɛ zlave yɛ yitea ghə ba'a yɛ tsahwa mbe seɗa. Kateŋgaɗe ghə yɛ ba'a katenehwene yɛ we. Ama katempə yɛ va jaɗafa ta ŋayɛ ba'a kateŋeŋələvə yɛ kwelɛ ghəa ŋayɛ.

²⁴ Ɛzɛkiyɛl ya kawəsə kencɛ ŋayɛ wəsə nya ketemene geva. Ma yayata wəsə nya menete ŋkɛ ne, tsagha temene yɛ. Ma vəa ŋkwa nya tese wəsəa shɛ ne, kateɗepete yɛ 'ya ya kaMahwətə Shala.»

²⁵ Ma ke Mahwətə sha 'ya: «Wəndə ŋelɛ, ma te kwete veci ne, kakelehwe ghɛa ɗa nya kaŋkwa kewəfərə ta nci, wəsə nya mawe ntsə ta nci, wəsə nya vate mehele ta nci hɛ te, ŋwale tezhilia nci ba'a ŋwalea kwɛa nci 'ya.

²⁶ Ma te vecia shɛ ne, katese wəndə nya ketene teghweme sha gha le ghena shɛ.

²⁷ Ma te vecia shɛ ne, katenza na kaɓeɓə we, kategeze ghena na ba'a katesla nda ghena na ke wəndə nya ketene nya teghweme. Katenza na kawəsə kencɛ wəshi nyi ketemene sha ka Israyɛl. Ma tsagha, kateɗepete hɛ 'ya ya kaMahwətə.»