Ɛzɛkiyɛl 23 - Ghena ta Shala

Nahe Samari kemenete mefətekwə

¹ Ma ke Mahwətə sha 'ya:

² «Wəndə ŋelɛ, pa kweci mi bake, kaŋwalea kwɛa male nya kwetɛŋe.

³ Ma kwa nza hɛ mba kadeghelɛshi ne, ntake hɛ kamene mefətekwə kwa Ɛzhipte. Kwagha ghate mbeli kafafela hate ta nci, kwagha keɓemte ŋ'wa mbeli te hɛ.

⁴ Ma sləa kwa ghate ne, Ohola, ma ŋa kwa bake ne, Oholiba. Samari ya kakwa ghate, Zhɛrəzalɛm kwa bake. Pa 'ya wəmeve hɛ bake nci, pa hɛ yake ɗa ŋwale tezhili ba'a ŋwalea kwɛ.

⁵ Ntəŋə Ohola yitea mene mefətekwə, ya ghenta nza kamale ta ɗa. Pa nde mawehwe ka ghedəkwəa nci nyi kaka Asiri, pa nde zhɛrete hɛ kaka meghwateshia nta.

⁶ Lekwesa kwa gheme nyi ganji ganji ya kənəa hɛ, va nya nza hɛ kaka ŋgwamna ba'a kaka meha ghwə. Pɛtɛ hɛ kaka mempɛhwetɛti, kambeli nyi mawe mbeli ba'a kaka zleɗe gədəwə ganji.

⁷ Pa nde menete mefətekwə le mbeli nyi te ghə mbe Asiri. Ma mbe yayata və nya mawehwe kwete nde hwa hɛ ne, ghəa nta yazhɛre nde wale wale laka hawe va wəshi nyi zhɛrete hɛ kashala.

⁸ Kesərəakɛ mene mefətekwəa nta nya ghate nde kwa Ɛzhipte nde we, kwa nza ŋkɛ ka Ɛzhipte ka ghate kaɓelahe le ghenta mba nde kadegheli, kakeɓe ŋ'wa deghelia nta ba'a kaghwetame ŋkɛ mbe mefətekwəa nci.

⁹ Vatse vame ŋkɛ 'ya mbe dzeve ta ka meghwateshia nta, mbe dzeve ta ka Asiri nyi mawehwe nde.

¹⁰ Pa hɛ seɗemte lekwesa derelɛŋe lɛŋe kənə ba'a peslekɛ le kafayɛ. Pa hɛ fəhwe ŋwale tezhilia nta ba'a ŋwalea kwɛa nta. Pa Ohola zhɛrenyɛ kaɗa nya kese kawəsə keyipə pa kaŋa kweci mi.

¹¹ Nahe Oholiba kenakɛ pɛtɛa wəshia shɛhɛ, ama beze ma ba'a gwaya ma se nde. Za ma menete mefətekwə nde ke wəzha ta meghekɛ.

¹² Pa nde mawehwe ka ŋgwamna ba'a ka meha ghwə ta ka Asiri nyi keseɗete lekwesa ganji. Kaka zleɗe gədəwə ganji, kaka mempɛhwetɛti ba'a kambeli nyi mawe mbeli se hɛ.

¹³ Newe 'ya shɛ ne, nahe nde kezhɛrete ghəa nta wale wale perə: hweŋkwa nya kwetɛŋe yakelete hɛ bake nci.

¹⁴ Pa Oholiba mtsehete mene mefətekwəa nta zhɛkwa. Ma te kwete hɛ ne, dəkwə nde te mbeli nyi rafeyi mbeli ba'a nyi fikɛ mbeli le yirə kwa ghɛmɛ dzeme vare dewe. Ka Babilone yancɛ hɛ.

¹⁵ Hətə ya hwa hwə va hɛ ba'a zlave ya yitea ghə va hɛ. Yipə yipə le ka sewajɛ ganji nza ta nci. Pa ta ka Babilone kala nya nza hɛ te hɛɗia nci yancɛ hɛ.

¹⁶ Ma kwa nakɛ hɛ nde ne, pa nde mawehwe hɛ taghanyɛ ba'a ghweneghe mbeli kadzete hɛɗia nci.

¹⁷ Tagha gɛ, ntake ka Babilone kase kaɓelahe le. Pa hɛ zhɛrete ŋkɛ wale wale laka mefətekwəa nci. Ma kwa zhɛrete nza ta nta nde wale wale le hɛ ne, pa nde ɗema ghena ta nci.

¹⁸ Pa nde ncɛte ghəa nta kakwa mefətekwə kwa kema ta mbeli pɛtɛ, pɛtɛ nde ncɛmte zeweve ta nta. Tagha gɛ, ntake 'ya kaɗema ghena ta nta kala nya ɗema ŋa wəzha ta meghekɛ 'ya.

¹⁹ Pa nde mbakete mene mefətekwəa nta kala nya se nde kwa Ɛzhipte, vəa ŋkwa nya nza nde kadegheli.

²⁰ Kwagha ne, kwele kwele mawehwe mbeli nyi wale wale nde. Kala wəshi keseɗa vale mbelia shɛhɛ. Kala kwara lɛmə ba'a gədəwəa lɛmə, kaɗema kala mbeli.»

Kateme Mahwətə te Zhɛrəzalɛm

²¹ Oholiba, nahe na keghate gwaya ta ŋa nya te və nya se na kadegheli, vəa ŋkwa nya keɓe ŋ'wa ta ŋa ba'a nya fafela hate ta ŋa ka Ɛzhipte.

²² Vatse gɛ Oholiba, wa nya ghena nya geze Shala Mahwətə nya: 'Ya kateheɗe ka meghwateshia ŋa, mbeli nyi ɗema ghena ta nci na kadzeyi yitea gha. Katetsene hɛ 'ya se te yayata ŋkwa kadzeyitea gha.

²³ 'Ya katetseneke ka Babilone, ka Kaldɛ pɛtɛ, mbeli nyi mbe Pekod, mbe Showa ba'a nyi mbe Kowa, zlaɓe le hɛ tese ka Asiri. 'Ya katetsene ka mempɛhwetɛti ba'a mbeli nyi mawe nyi mbeli, ka ŋgwamna ba'a ka meha ghwə, ka sewajɛ ba'a mbelia jama nyi kaka zleɗe gədəwə ganji.

²⁴ Katesawa hɛ kadzeghəa gha sawa laka bela kwa gwela le yɛ wəmata gədəwə, yɛ mama ta wəmata ba'a ka sewajɛ kwele kwele. Yɛ gelə ba'a yɛ kwenə yateya ghəa nci hɛ le. Katedzasle ŋa hɛ se laka yayata bela. Nahe 'ya kevate nda ŋa te dzeve ke hɛ, ghenci ka temeha ghwə te gha kala wəshi mahalegəa nci.

²⁵ Ma va hwepe ta wənəa ɗa ne, katesərə hɛ 'ya kamene berete te gha. Katesla ŋshi ba'a yɛ sleme hɛ te gha ba'a katempə mbelia ŋa nyi ketetene hɛ le kafayɛ. Katefə ŋwale tezhili ba'a ŋwalea kwɛa ŋa hɛ, katetere mbeli nyi ketene teghweme hɛ le ghwə

²⁶ Kateseɗe lekwesa hɛ kənəa gha ba'a katefə wəshi nyi kepesa geva ta ŋa hɛ.

²⁷ Katekiɗi gwaya ta ŋa ba'a mene mefətekwəa ŋa nyi ghate na kwa Ɛzhipte 'ya. Katezhɛne na kamawe wəndə ba'a katezəzə ka Ɛzhipte we.

²⁸ Kwa nza ŋkɛ ne, wa nya ghena nya geze 'ya Shala Mahwətə nya: Kateve ŋa 'ya mbe dzeve ta mbeli nyi ɗema ntsə ta nci na, mbeli nyi ɗema ghəa ŋa yite hɛ.

²⁹ Le zlɛ le zlɛ tenza hɛ laka gha. Pɛtɛ tefə wəshia ŋa hɛ ba'a derelɛŋe lɛŋe tesərə ŋa hɛ. Katepele zeweve mbeli yitea gwaya ta ŋa, wəshi hawe ta ŋa ba'a mefətekwəa ŋa.

³⁰ Tsagha temene ŋa mbeli va nya menete mefətekwə na le kweci hwelefefi ba'a va nya zhɛrete ghəa ŋa na wale wale laka hawe va wəshi nyi zhɛrete hɛ kashala.

³¹ Nahe na kezelete hweŋkwa ta wəzha ta meyɛ ŋa Ohola. Vatse tesa ŋa zlerekwea hwepe wənə ɗa 'ya kala ghenta.

³² Wa nya ghena nya geze 'ya, 'ya Shala Mahwətə nya: zlerekwe nya kwetɛŋe yatesa na le wəzha ta meyɛ ŋa, kewəbanyɛ ba'a kehwəɗakwənyɛ zlerekwea shɛ. Kateŋ'wəshi ŋa ba'a kateyiɗə ŋa mbeli va nya nza zlerekwea shɛ paca paca.

³³ Kateghwəyi ŋa nde le yaka. Zlerekwea ghazlənə ba'a yirə ta mehele nde, nahe wəzha ta meyɛ ŋa Samari kesahwe.

³⁴ Ɓɛrɛawe tesa ŋkɛ na, kateɓatse ŋkɛ na le slene ta ŋa, katepeperawe yɛ ŋ'wa ta ŋa na le 'yɛmbea ŋkɛ. 'Ya Shala Mahwətə nde gezete.

³⁵ Wa nya ghena nya geze 'ya, 'ya Shala Mahwətə nya: Ma va nya zaghəyite ɗa ba'a neghamte ɗa na dzawa kwetere ghə ne, katenza zhɛme nyi mbe gwaya ta ŋa ba'a mefətekwəa ŋa kwa ghəa ŋa.

Shala kameha ghwə te yɛ Samari le Zhɛrəzalɛm

³⁶ Ma ke Mahwətə sha 'ya: «Wəndə ŋelɛ, kaɗe na kameha ghwə te yɛ Ohola le Oholiba na? Ɓelate nda wəshi nyi ndiremi ndiremi kashasha ta nci ke hɛ.

³⁷ Mi nyi kevale tahe ba'a nyi kempə ŋkwa hɛ. Nahe hɛ kemenete vale tahe laka hawe va wəshi nyi zhɛrete mbeli kashala ba'a kempəmte ŋkwa laka dzeghe nda melɛ ke hɛ le ŋwale nyi yake ɗa hɛ.

³⁸ Wa nya wəsə nya menete ɗa hɛ nya ɓiyitsa: mbe hɛ kwetɛŋe ne, nahe hɛ kezhɛrete ŋkwa ɗa nya keveyi geva tekeleke wale wale ba'a kekelemte zləvə te veci kezhɛne mpi ta ɗa.

³⁹ Ma vəa ŋkwa nya dzeghekɛ nda melɛ hɛ ke wəshi nyi zhɛrete hɛ kashala le ŋwalea nci ne, nahe hɛ kese mbe ŋkwa nya keveyi ɗa geva tekeleke, ki ghɛa ɗa. Tsagha zhɛremte ŋkɛ hɛ wale wale.

⁴⁰ Ɓiyitsa ne, nahe hɛ ghweneghe mbeli kaheka zhili te hɛɗi nyi cakeɗa cakeɗa. Fatema ta nci ke ghena shɛ ne, hwa'a hɛ sha hɛ. Kezha zhilia shɛhɛ ne, nahe hɛ kepɛmte pɛ, kefiyite wəshi yitea ntsə ba'a kepesakɛ geva le wəshi kepesa geva kezha hɛ.

⁴¹ Kwa sebe ta ŋkɛ, sheshɛrɛayɛ hɛ ɓelahenji te gezle ganji. Pa hɛ veyi tabele nya veyi 'wərdəa ɗa ba'a n'yia ɗa hɛ te kwa kema ta nci.

⁴² Pa mbeli kwele kwele senji sha hɛ, kafefa gaka ta mbeli nyi kegezleŋema ghə mbeli. Tagha kweci pɛtɛa mbeli nyi kese te ŋkwa nyi te ɓerama. Pa hɛ seɗeyi nda yɛ takase kwa dzeve ke ŋwalea kwɛa ma nyi bake nyighɛ ba'a veyi derə meghe mbe ghəa nci.

⁴³ Tagha ne, ma 'ya sha ghə ɗa: Pa le male nya kehalenyɛ nya mbe vale tahe kazhɛne kamene mefətekwə!

⁴⁴ Kala nya dzeki zhili sha male nya kemene mefətekwə ne, tsagha dzeki zhili sha yɛ Ohola le Oholiba, mi nyi keɓelahe le yayata wəndə.

⁴⁵ Ama katemeha ghwə zhili nyi tiɗiɗi te mi nyi kala nya meha ghwə mbeli te male nya kemene vale tahe ba'a nya kempə ŋkwa, kwa nza ŋkɛ nahe hɛ kemenete vale tahe ba'a bətə dzeve ta nci mbe mimi.

⁴⁶ Wa nya ghena nya geze 'ya, 'ya Shala Mahwətə nya: Ghweneyite mə mbeli yitea hɛ, dakete hɛ mbeli ba'a fəhwe wəshia nci mbeli pɛtɛ!

⁴⁷ Ŋkweŋkwape mə hɛ le pelɛ, nzenzere mə hɛ mbe le kafayɛ, mpə mə ŋwale tezhili ba'a ŋwalea kwɛa nci, ndə mə ghwə yitea ghɛa nci.

⁴⁸ Tsagha ne, katekiɗi gwaya 'ya te hɛɗi. Katenza nde kawəsə keyipə pa sha pɛtɛa mi ba'a katezhɛne hɛ kateke gwaya ta ŋwalea kwɛa ma nyi bake nyi we.

⁴⁹ Ohola ba'a Oholiba, kwa ghəa ŋayɛ tenza wəshi nyi wale wale nyi menete yɛ. Gheyɛ ka tezereghe zhɛme nyi mbe hɛ, va nya se yɛ kahawe va kweci shala. Ma tsagha, kateɗepete yɛ 'ya ya kaMahwətə Shala.»