Ɛzɛkiyɛl 21 - Ghena ta Shala

Ghena kwa ndiremi kezha ka Israyɛl

¹ Ma ke Mahwətə sha 'ya:

² «Wəndə ŋelɛ, newe pa sha ŋkwa laka bela kwa zeme ta hɛɗi nya shɛ na ɓelate ɗa nyi teve 'ya te mbeli nyi mbe ghɛa wəfe ta Nɛgɛv.

³ Kategeze nda na ke hɛ kafa ghena nyi geze nda 'ya Shala Mahwətə ke ghɛa wəfe ta Nɛgɛv: 'Ya katemeha ghwə nya ketetere yɛ wəfe nyi menjaɓa le nyi keghwele ghwele ta ŋa. Katemte tse ta ghwəa shɛ we, pɛtɛ tetere mbeli ŋkɛ se kwa Nɛgɛv hwa'a pelɛ bela kwa gwela.

⁴ Pɛtɛa mbeli katenakɛ 'ya Mahwətə nde ndəte ghwəa shɛ, katemte ŋkɛ we.»

⁵ Ma 'ya, 'ya nde mɛ ŋkwa zhɛnete: «Shala Mahwətə yawe, ‹Ashɛ gheŋkɛ ya kande geze ghena ŋela wəka?›, ke hɛ sha geze ɗa tsetsenya.»

⁶ Ma ke Mahwətə sha 'ya:

⁷ «Wəndə ŋelɛ, newe pa sha ŋkwa laka Zhɛrəzalɛm, gezete ghena nyi kese va gha te ghəa ŋkwa nyi keveyi geva tekeleke, gezete ghena ta ɗa te hɛɗia Israyɛl.

⁸ Ma pa na sha hɛɗia Israyɛl: Wa nya ghena nya geze Mahwətə nya: ‹Kateme 'ya te gha, katenteɗe kafayɛa ɗa 'ya shave mbe kwəɓə kezha mpə mbeli nyi tiɗiɗi ba'a nyi 'yaghwa 'yaghwa mehele.

⁹ Va nya ɗe 'ya kazamte sebe te mbeli nyi tiɗiɗi ba'a nyi 'yaghwa 'yaghwa mehele nda nteɗakave kafayɛa ɗa 'ya shave mbe kwəɓə, slə kwa Nɛgɛv hwa'a pelɛ bela kwa gwela.

¹⁰ Ma tsagha ne, kateɗepete mbeli pɛtɛ 'ya Mahwətə nde nteɗakave kafayɛa ɗa shave mbe kwəɓə nya ɗema ŋkɛ mba kazhɛneyi geva mbe.›

¹¹ Wəndə ŋelɛ, ŋələvə, gwəɗəŋə ŋa va taze ta mehele ta ŋa, ŋələvə kwa kema ta nci.

¹² Ma ke'yɛwete hɛ va gha va wa va wa ŋələvə na ne, ma pa na sha zhɛne nda ke hɛ: ‹Nahe 'ya kefate kwete ghena kwa ndiremi, kateyipə geva ŋkɛ kadzawa. Wətiɗike wətiɗike teslesla yɛ heli, pɛtɛ tempənji yɛ dzeve, pɛtɛ tetaze yɛ mehele ba'a pɛtɛ tenza yɛ ŋeli keta ta. Nahe və kese! Wa nya kateyipə geva kadzawa. 'Ya Shala Mahwətə nde gezete.›»

Kala kafayɛ nya nale nale nzere ŋkwa Mahwətə

¹³ Ma ke Mahwətə sha 'ya:

¹⁴ «Wəndə ŋelɛ, gezete ghena ta ɗa. Ma pa na sha geze: Wa nya ghena nya geze Mahwətə nya: Wa nya kafayɛ nya, kafayɛ nya nale nale ba'a nya keslesla.

¹⁵ Kezha mpə ŋkwa mɗɛte geva ŋkɛ, kezha slesla njehemte geva ŋkɛ.

¹⁶ 'Ya nde gezete kanjɛhe mbeli kezha keseve dzeve megela. Nahe ŋkɛ kemɗɛte geva ba'a kenjɛhemte geva kezha ve nda ke nde mpə ŋkwa.

¹⁷ Wəndə ŋelɛ, tsa lewela ba'a nehwene! Ma kafayɛ nya ne, kezha ɗa mbelia ɗa ba'a pɛtɛa mbeli nyi te ghə mbe Israyɛl. Zlaɓe le mbelia ɗa betate geva hɛ te kafayɛ. Tsa hate ta ŋa va taze ta mehele ta ŋa.

¹⁸ Dzeghe ŋkwa nya dzawe ŋkɛ. 'Ya Shala Mahwətə nde gezete.

¹⁹ Wəndə ŋelɛ, gezete ghena nya kese va 'ya. Pɛawete dzeve kezha ɗa ŋkwa kafayɛ kwetɛŋe zhigə, bake zhigə, mahekene zhigə. Nahe ŋkɛ kenza kakafayɛa mpə ŋkwa, kakafayɛ nya kempə mbeli pɛtɛ, nya keɗa ŋkwa te yayata bela.

²⁰ Kwele kwele sla heli ŋkɛ hwa mbeli ba'a bete mbeli kadzete hɛɗi ve. Nahe 'ya keveyi kafayɛa mpə ŋkwa mɛa yayata degha. Kezha slesla njehekɛ geva ŋkɛ ba'a kezha mpə ŋkwa mɗɛte geva ŋkɛ.

²¹ Tsasle ŋkwa laka bela kwa zeme ba'a laka bela kwa gwela kafayɛ nya nale nale. Zhɛre mɛa ŋa laka yayata bela.

²² Ma 'ya le ŋa ɗa gɛ, katepɛawe dzeve 'ya, katetereke hwepe wənəa ɗa 'ya. 'Ya Mahwətə nde gezete.»

Ɗa nya te Zhɛrəzalɛm

²³ Ma ke Mahwətə sha 'ya:

²⁴ «Wəndə ŋelɛ, ɗahete hweŋkwa bake nyi tese meghea ka Babilone kwa le kafayɛa ŋkɛ. Slə te hɛɗi nya kwetɛŋe ɗahe hɛ na bake nci. Ma te ŋkwa nya gha geva yayata ŋkɛ ne, menete wəsə kencɛ meleme nya telə ŋkɛ.

²⁵ Kwete hweŋkwa shɛ ne, kadzembe meleme ta Raba ta ka Amon kele ka sewajɛa ka Babilone ŋkɛ. Kadzembe Zhɛrəzalɛm nya nza zli yite te hɛɗia Zhəwda dzembe kwete.

²⁶ Pa meghea ka Babilone ghereŋenyɛ kwa baŋwa ta hweŋkwa, te ŋkwa nya gha geva hweŋkwa nyi bake nyighɛ kezha sla kwasheghediɗi. Pa ŋkɛ heyite have yitea ghweme, 'yɛwakɛ ghena va wəshi nyi zhɛrete ŋkɛ kashala ba'a neweve yɛ mene ta wəshi keseɗa.

²⁷ Laka kwa zeme ta ŋkɛ menyɛ have nya kencɛ Zhɛrəzalɛm. Kategeze ŋkɛ kajive kampə ŋkwa pelɛagha laka tsa kaka mpa. Katebete wəmata kempa ŋkɛ dzeyi mɛa yɛ mɛ degha nyi te meleme. Katetsene hɛɗi ŋkɛ dzeme vare zli ba'a katela yɛ ki ŋkɛ.

²⁸ Ma newe ka Zhɛrəzalɛm ne, gəmə tenza ghena nya gezete nya kwasheghediɗi, kwa nza ŋkɛ nahe mbeli kemeɗeyi nda ke hɛ kaɗema wəsə katekwaɗe hɛ. Ama pa meghea ka Babilone zəzəte nda fete ta nci ke hɛ ba'a gezete nda ke hɛ tsema tsema tefə hɛ mbeli kaka mavashi.

²⁹ Vatse gɛ, wa nya ghena nya geze Shala Mahwətə nya: Ma va nya ɗema yɛ kezaghəyite fama ghena ta ŋayɛ, vəa ŋkwa nya ncɛte geva fete ta ŋayɛ, nya ncɛte geva jaɗafa ta ŋayɛ darahwe mbe pɛtɛa wəshi nyi mene yɛ ba'a va nya keseke mehele ta mbeli yɛ kadzete gheyɛ ne, katenza yɛ mbe dzeve ta ka ghema ta ŋayɛ.

³⁰ Ma gha le ŋa ŋa gɛ wəndə nya te ghəa ka Israyɛl nya kehawema va Shala ba'a nya 'yaghwa mehele, katese vecia ŋa vəa ŋkwa nya tekiɗi jaɗafa ta ŋa.

³¹ Wa nya ghena nya geze 'ya, 'ya Shala Mahwətə nya: katekelehwe yɛ zlave kepeɗe ghəa ŋa le derə meghea ŋa mbeli. Katenza wəshi kala nyi vəashi we. Katenza ka gwedəa kɛfi te ŋkwa ganyɛ, kateshifəmte geva ka berete beretea kɛfi.

³² Kakwəfi, kakwəfi lagana tezhɛre Zhɛrəzalɛm 'ya. Ghwəpə tenza meleme te hɛɗi, ama kamenete geva ŋkɛ nda tese wəndə nya ndeke nda berete 'ya kezha me te we.»

Ɗa nya te ka Amon

³³ Ma ke Shala Mahwətə sha 'ya zhɛkwa: «Wəndə ŋelɛ, gezete nda ghena ta ɗa ke ka Amon. Nahe hɛ keŋelekɛ Israyɛl. Ma pa na sha geze: Nya kafayɛ nya, nahe kafayɛ keshave mbe kwəɓə kampə ŋkwa, kanzere ŋkwa ba'a kaslesla.

³⁴ Ma vəa ŋkwa nya dambeghə ŋayɛ yɛ yitea yɛ wəshi tseŋwə ba'a yɛ ghena ghwete ŋkwa ne, ɗeke ɗeke ŋkɛ kasla ghə te mbeli nyi ndiremi ndiremia mehele ba'a nyi 'yaghwa 'yaghwa mehele, kwa nza ŋkɛ və nya tekiɗi fete ta nci kwa nya.

³⁵ Ma tsetsenya gɛ, zhɛneyi mə kafayɛa ŋayɛ mbe kwəɓə. Te ŋkwa nya pate geva yɛ temeha ghwə 'ya te gheyɛ, te hɛɗi nya yake geva yɛ.

³⁶ Kateve hwepe wənəa ɗa 'ya te gheyɛ, kateve ghwə ta hwepe wənəa 'ya te gheyɛ ba'a kateve ŋayɛ 'ya mbe dzeve ta mbeli nyi ghyana ghyana, nyi keɗepe mpə ŋkwa.

³⁷ Kawəsə kezeme ta ghwə tenza yɛ ba'a katehwɛ mimia ŋayɛ dzeyi te yayata ŋkwa nya te hɛɗi. Ma kwa sebe ta ŋkɛ, wəndə shɛ katezhɛne kazəzə ŋayɛ we. 'Ya Shala Mahwətə nde gezete.»