Ɛzɛkiyɛl 20 - Ghena ta Shala

Kweci shala mbe nza ta ka Israyɛl

¹ Ma mbe va kwa mberefaŋe, mbe hɛ kwa meŋe te tere kwa mcɛfe kwa sebe ta nya fəhwe ŋkwa mbeli ne, pa kweci mbelia jama ta ka Israyɛl se kantishɛnji kwa kema ta ɗa kezha fa ghena ta Mahwətə.

² Ma ke Mahwətə sha 'ya:

³ «Wəndə ŋelɛ, geze nda ghena ke mbelia jama ta ka Israyɛl nyi. Ma pa na sha hɛ: Wa nya ghena nya geze Shala Mahwətə nya: Ashɛ kezha fa ghena nya kese va 'ya se yɛ wəka? Kageze ŋayɛ 'ya, 'ya Shala Mahwətə kaɗema 'ya kasərə ŋayɛ kafa ghena nya kese va 'ya.

⁴ Katemeha ghwə na te hɛ, kaganda temeha ghwə na te hɛ tse na wəndə ŋelɛ? Ɓelate nda wəshi nyi ndiremi ndiremi kashasha nyi menete ka shihɛ nci ke hɛ.

⁵ Ma pa na sha geze nda ke hɛ: Wa nya ghena nya geze Shala Mahwətə nya: Ma te veci nya ntave ka Israyɛl 'ya ne, nahe 'ya kegezete nda gheci gheci ke hwelefe ta Zhakob. Nahe 'ya kencɛte nda ghəa ɗa ke hɛ kwa Ɛzhipte, nahe 'ya kegezete nda gheci gheci ke hɛ, ma 'ya sha hɛ: 'Ya ya kaMahwətə Shala ta ŋayɛ.

⁶ Ma te vecia shɛ ne, nahe 'ya kegezete nda gheci gheci ke hɛ kezha fə hɛ shave mbe hɛɗia Ɛzhipte kadzete hɛɗi nya ntave 'ya kezha hɛ: hɛɗi ganyɛ nya mene wəshi te, nya ganyɛ ma hwa hɛɗi pɛtɛ.

⁷ Ma 'ya gezete nda ke hɛ: Betemte wəshi nyi ndiremi ndiremi kashasha ta ŋkɛ yayata wəndəa ŋayɛ. Mba yɛ kezhɛne kazhɛre ghəa ŋayɛ wale wale le wəshi nyi zhɛrete ka Ɛzhipte kashala. 'Ya ya kaMahwətə Shala ta ŋayɛ.

⁸ Ama pa hɛ menete ntɛaŋentɛa ghə ba'a ɗema fa ɗa ghena. Wəndə shɛ kese kanegha wəshi nyi ndiremi ndiremi kashasha nyi mawe ŋkɛ ba'a kasərə wəshi nyi zhɛrete ka Ɛzhipte kashala we. Tagha gɛ, ma 'ya: Bətə tenza hɛ mbe hwepe wənəa ɗa, ndɛkwe tenza hwepe wənəa ɗa te hɛ te hɛɗia Ɛzhipte.

⁹ Ama kemenete 'ya tsagha va nya teɓelama sləa ɗa kweci hwelefefi nyi nza hɛ hwa hɛ we. Pa 'ya ncɛte nda ghəa ɗa ke hɛ kwa ntsə ta hwelefefia shɛhɛ, laka fə hɛ shave mbe Ɛzhipte.

¹⁰ Pa 'ya fəmte hɛ seyi te hɛɗia Ɛzhipte ba'a begheghe hɛ kadzete ɓerama.

¹¹ Pa 'ya ndeke nda wəshi mahalegəa ɗa ba'a ncɛte nda wəshi nyi gezete 'ya ke hɛ, yitea nza mbeli nyi kehawe va hɛ teghweme.

¹² Pa 'ya ndeke nda veci kezhɛne mpi ke hɛ kawəsə kencɛ wəsə nya kwelɛ 'ya le hɛ, kezha ɗepete mbeli 'ya Mahwətə nde veyi hɛ tekeleke kezha slene ta ɗa.

¹³ Ama kwamte te ɓerama ne, pa ka Israyɛl ɗema ghena ta ɗa. Pa hɛ peleyite se yitea wəshi nyi gezete 'ya ba'a ɗema ɓela wəshi mahalegəa ɗa. Keveci keveci se hɛ kakele zləvə te veci kezhɛne mpi. Zhɛkwa ne, nahe 'ya ketarete kave hwepe wənəa ɗa kənəa hɛ kwamte te ɓerama kezha za sebe te hɛ.

¹⁴ Ama kemenete 'ya tsagha va nya teɓelama sləa ɗa hwelefefi nyi fəakave hɛ 'ya shave mbe Ɛzhipte te ntsə ta nci we.

¹⁵ Ɓiyitsa ne, pa 'ya gezete nda gheci gheci ke hɛ kwamte te ɓerama kezha ɗema kafə hɛ kadzete hɛɗi nya ndeke nda 'ya ke hɛ, hɛɗi ganyɛ nya mene wəshi te, nya ganyɛ ma hwa hɛɗi pɛtɛ.

¹⁶ Ma nda zemete nda fela 'ya ke hɛ ne, va nya ɗema hɛ kese kahawe va wəshi mahalegəa ɗa, nya peleyite se hɛ yitea wəshi nyi gezete 'ya ba'a va nya ɓelama veci kezhɛne mpi hɛ. Ke wəshi nyi zhɛrete hɛ kashala ndeke nda wənəa nci hɛ.

¹⁷ Ama kwele kwele zhɛte ɗa heli yitea hɛ, keɗe 'ya kampə hɛ we, kezamte sebe 'ya te hɛ kwamte te ɓerama we.

¹⁸ Ma 'ya sha ŋwalea nci kwamte te ɓerama: ‹Hawema yɛ va wəshi mahalegəa ka shihɛ ŋayɛ ma, yama wəshi keshia nci yɛ ma, zhɛrema ghəa ŋayɛ yɛ wale wale le wəshia nci nyi zhɛrete nyi hɛ kashala ma.

¹⁹ 'Ya ya kaMahwətə Shala ta ŋayɛ: zele mə wəshi nyi gezete 'ya, hawe mə va wəshi mahalegəa ɗa ba'a mene mə slene le hɛ.

²⁰ Veyi ɗa mə veci kezhɛne mpi tekeleke, gheŋkɛ ya kawəsə kencɛ wəsə nya kwelɛ 'ya le gheyɛ: ma tsagha, kateɗepete yɛ 'ya ya kaMahwətə Shala ta ŋayɛ.›

²¹ Ama pa ŋwalea nci ɗema ghena ta ɗa. Kese hɛ kahawe va wəshi mahalegəa ɗa ba'a kaɓela wəshi nyi gezete 'ya nyi keve mbeli nyi kemene slene le hɛ teghweme we. Kese hɛ kave zləvə te veci kezhɛne mpi we. Nahe 'ya ketarete kave hwepe wənəa ɗa kənəa hɛ, ndɛkwe tenza beze ta wənəa ɗa te hɛ kwamte te ɓerama.

²² Ama kemenete nda 'ya tsagha va nya teɓelama ɗa hwelefefi nyi fəakave hɛ 'ya mbe Ɛzhipte kwa ntsə ta nci we.

²³ Ɓiyitsa ne, pa 'ya zemete nda fela ke hɛ le slete dzeve yitea ghweme kwamte te ɓerama kezha taze hɛ dzeyi hwa kweci hwelefefi nyi te kweci hɛɗi.

²⁴ Ma nda zemete nda fela 'ya ke hɛ ne, va nya ɗema hɛ kese kahawe va wəshi nyi gezete 'ya, nya peleyite se hɛ yitea wəshi mahalegəa ɗa, nya kelemte zləvə hɛ te veci kezhɛne mpi ba'a nya vate ntsə hɛ te wəshi nyi zhɛrete ka shihɛ nci kashala.

²⁵ Ɓiyitsa ne, nahe 'ya kendeke nda wəshi mahalegə nyi keɗema megela ba'a wəshi keshi nyi keɗema kaveyi ŋkwa teghweme le ghəa ɗa ke hɛ.

²⁶ Pa 'ya sərəakɛ hɛ kanza wale wale laka wəshi gəməa nci, vəa ŋkwa nya tere tezhɛa kɛfia ŋwalea nci hɛ te ghwə. Ma nda menete 'ya tsagha ne, kezha ve ndiremi te hɛ yitea ɗepete hɛ 'ya ya kaMahwətə.

Kateza kweci shala Mahwətə hwa ka Israyɛl

²⁷ Vatse gɛ wəndə ŋelɛ, gezete nda ghena ke ka Israyɛl. Ma pa na sha geze nda ke hɛ: Wa nya ghena nya geze Shala Mahwətə nya: Nahe ka shihɛ ŋayɛ kezhɛne kaŋelekɛ ɗa laka nzama dɛŋe dɛŋe te ghena ta ɗa.

²⁸ Nahe 'ya kekeleghe hɛ kadzete hɛɗi nya zemete 'ya kafela le slete dzeve yitea ghweme kave nda ke hɛ. Ama te hɛɗia shɛ ne, pa hɛ vate ntsə te yɛ kələŋə ba'a wəfe nyi jama jama kezha dzeghe nda melɛ ke hɛ. Tagha ne, pa hɛ hwepete ɗa wənəa ɗa laka fə wəshi gəmə, yɛ 'wərdə ba'a tɛ keɓasle kase.

²⁹ Ma 'ya 'yɛwete va hɛ: Wa sləa kələŋə nyi dzeme nyi yɛ wa? Se mɛa vəa shɛ ne, yɛ kələŋə kedzeghe melɛ heka ŋkwa shɛhɛ mbeli.

³⁰ Vatse gɛ, ma pa na sha ka Israyɛl: Wa nya ghena nya geze Shala Mahwətə nya: Zhɛrema ghəa ŋayɛ yɛ wale wale kala ka shihɛ ŋayɛ ma. Hawema yɛ va wəshi nyi ndiremi ndiremi kashasha ta nci ma.

³¹ Pa ɓeshi nya, vəa ŋkwa nya fə wəshi gəməa ŋayɛ yɛ kase ne, nahe yɛ kezhɛrete ghəa ŋayɛ wale wale laka tere nda ŋwalea ŋayɛ ke wəshi nyi zhɛrete yɛ kashala. Ma kala nya ŋkɛ ne, katesərə ghəa ɗa 'ya ka'yɛwe ghena yɛ va 'ya na ka Israyɛl? Kazeme ŋayɛ 'ya Shala Mahwətə kafela kaɗema 'ya katesərə ghəa ɗa ka'yɛwe ghena yɛ va 'ya.

³² Ma zəzə yɛ ne, wərə yɛ kanza kala mbeli nyi te kweci hɛɗi laka hawe va yɛ wəfe ba'a yɛ gela, ama katemene geva ŋkɛ we.

³³ Kazeme ŋayɛ 'ya Shala Mahwətə kafela kateme berete ta ɗa nya wəba kənəa gheyɛ, kateve hwepe wənəa ɗa 'ya kənəa gheyɛ. Tsagha tesleke ŋayɛ 'ya.

³⁴ Katetsene ŋayɛ 'ya shave hwa kweci hwelefefi ba'a se te hɛɗi nyi tazeyi geva yɛ. Laka ncɛ ŋayɛ berete ta ɗa nya wəba ba'a hwepe wənəa ɗa tetsene ŋayɛ 'ya.

³⁵ Katefə ŋayɛ 'ya kadzete ɓerama, cakeɗake le kweci hwelefefi. Ma tagha ne, katemeha ghwə 'ya te gheyɛ kwa ntsə kwa ntsə.

³⁶ Kala nya mehate ghwə 'ya te ka shihɛ ŋayɛ te ɓerama ta hɛɗia Ɛzhipte ne, tsagha temeha ghwə 'ya te gheyɛ. 'Ya Shala Mahwətə nde gezete.

³⁷ Katenewe ghweme 'ya te gheyɛ megela ba'a katezhɛre ŋayɛ 'ya kaka hawe va jikə geva ta ɗa le gheyɛ.

³⁸ Kateŋkamte ka fama ghena ba'a ka ɗema ghena ta ɗa 'ya shave hwa gheyɛ. Katefəmte hɛ 'ya shave mbe hɛɗi nyi nza nyi hɛ kaka se se, ama katedɛape seɗa hɛ te hɛɗia Israyɛl we. Ma tsagha, kateɗepete yɛ 'ya ya kaMahwətə Shala.

³⁹ Wa nya ghena nya geze 'ya Shala Mahwətə nya: Ka Israyɛl, kwiɗi mə kalə kahawe va wəshi nyi zhɛrete yɛ kashala, ama kwa sebe ta ŋkɛ ne, katehawe yɛ va 'ya le berete. Ma tsagha ne, katezhɛne yɛ kakele zləvə te sləa ɗa laka fə nda wəshi gəmə ke wəshi nyi zhɛrete yɛ kashala we.

⁴⁰ Kwa nza ŋkɛ pelɛ ghweme nya keveyi ɗa geva tekeleke, ghweme ta ka Israyɛl nya biya, tehawe pɛtɛa ka Israyɛl nyi te hɛɗi va 'ya. 'Ya Shala Mahwətə nde gezete. Pelɛagha tekemaneve ŋayɛ 'ya ba'a te'yɛwe 'ya va gheyɛ kafə ɗa wəshi nyi keveyi ɗa geva tekeleke, yɛ wəshi gəmə le wəshi nyi za ma hwa wəshi nyi ve ɗa yɛ.

⁴¹ Kwa sebe ta nya tseneke ŋayɛ 'ya shave hwa kweci mbeli ba'a se te hɛɗi nyi tazeyi geva yɛ ba'a kwa sebe ta nya tetsenete ŋayɛ 'ya ne, katefa zəŋwəa wəshi gəməa ŋayɛ 'ya megela. Ma laka wəshi nyi menete ŋayɛ 'ya tsagha gɛ ne, katencɛ nda 'ya ke kweci hwelefefi 'ya ya kaShala nya kaganda.

⁴² Ma laka ŋa ŋayɛ bela ne, kateɗepete yɛ 'ya ya kaMahwətə vəa ŋkwa nya tefəghe ŋayɛ 'ya kadzete hɛɗia Israyɛl, nya zemete 'ya kafela le slete dzeve yitea ghweme kave nda ke ka shihɛ ŋayɛ.

⁴³ Ma ketedzete yɛ ne, katezəzə dzeghwa ta ŋayɛ ba'a wəshi nyi ndiremi ndiremi nyi kezhɛrete ŋayɛ wale wale yɛ. Katenewe ghəa ŋayɛ yɛ kaka beze beze va wəshi nyi ndiremi ndiremi nyi menete yɛ.

⁴⁴ Ka Israyɛl, kateɓela dzeghwa ta ŋayɛ ba'a wəshi nyi ndiremi ndiremia ŋayɛ 'ya we. Ama katemene ŋayɛ ganyɛ 'ya kezha ve zləvə yɛ te sləa ɗa. Ma tsagha, kateɗepete yɛ 'ya ya kaMahwətə. 'Ya Shala Mahwətə nde gezete.»