Ɛzɛkiyɛl 2 - Ghena ta Shala

Shala kaghwene nda Ɛzɛkiyɛl ke ka Israyɛl

¹ Ma ke sha 'ya: «Wəndə ŋelɛ, sate meslete, kwa nza ŋkɛ 'ya kategeze ŋa ghena.»

² Ma mbe geze ɗa ghena nyagha ŋkɛ ne, pa sefə Shala dzembe 'ya ba'a kesakate ɗa te ŋkwa. Tagha gɛ, ntake 'ya kafa ghena ta wəndə nya kegeze ɗa geva.

³ Ma ke sha 'ya: «Wəndə ŋelɛ, 'ya kaghwene ŋa sha ka Israyɛl, sha ka fama ghena nyi kezhɛrave ɗa wəmbə nyi. Nahe hɛ le ka shihɛ nci kezhɛrave ɗa wəmbə pa ɓeshi nya.

⁴ Kalə sha mbeli nyi nza nyi ghəa nci ba'a wənəa nci ntɛaŋe ntɛaŋe ghwene ŋa 'ya. Ma pa na sha tegeze nda ke hɛ: ‹Wa nya ghena nya geze Shala Mahwətə nya.›

⁵ Ma tsagha gɛ, ya hɛ fate ŋa ghena, ya hɛ ɗema kefate ŋa va nya nza hɛ kaka fama ghena ne, kateɗepete hɛ nde mɛ ŋkwa ya hwa hɛ.

⁶ Ma gha le ŋa ŋa gɛ wəndə ŋelɛ, ghazlənəma na va hɛ, ya va ghena ta nci ma, kwa nza ŋkɛ hwa njɛlɛanjɛwa ba'a hwa tigə na, hwa yite ntishɛ ŋa na. Ghazlənəma na va ghena ta nci ba'a dakema na va kema ta nci ma, kwa nza ŋkɛ ka fama ghena mbelia shɛhɛ.

⁷ Ghena nyi tegeze ŋa 'ya yategeze nda na ke hɛ, ya hɛ nza kafa ŋa, ya hɛ ɗema kafa ŋa, va nya nza hɛ hɛ kaka fama ghena.

⁸ Ma gha le ŋa ŋa gɛ wəndə ŋelɛ, fate ghena nya geze ŋa 'ya: nzama na kande fama ghena kala hɛ ma. Ghwenemte mɛ shɛ na zehwe wəsə nya teve ŋa 'ya.»

⁹ Ma newe 'ya sha ŋkwa ne, dəkwə 'ya te dzeve nya kehake ɗa geva. Palepa kwa peɗe peɗe ya mbe.

¹⁰ Werete pelemte kwa kema ta ɗa: ghena ta yɛ nehwene, yɛ ŋələvə ba'a ŋa yɛ lewela ka rafate geva te laka bela bake nci.