Ɛzɛkiyɛl 18 - Ghena ta Shala

Kala dzeghwa ta wəndə meha ghwə Shala te

¹ Ma ke Mahwətə sha 'ya:

² «Va wa nda gegeze geva ghena ŋela nya te hɛɗia ka Israyɛl: ‹Mbeli nyi keyake ŋwale ka mpeɗehwe mendahwepələa rɛzɛŋe ne, ama ŋwale yaghelamenji slene kwa mɛ va hɛ› wa?

³ Kazeme kafela 'ya, 'ya Shala Mahwətə le ghəa ɗa kaɗema mbeli mba kategegeze ghena ŋela nya hwa ka Israyɛl.

⁴ Kaganda ne, pɛtɛ mpia mbeli kaŋa ɗa. Ŋa ɗa mpia yɛ yita le wəzege bake nci. Ma wəndə nya kemenete jaɗafa ne, gheŋkɛ nde temte.

⁵ Ya kwete pa kenza wəndə nya kemene slene ganyɛ, wəsə nya tiɗiɗi ba'a nya le hweŋkwa ta ŋkɛ shɛ.

⁶ Kazeme wəshi nyi dzeghekɛ melɛ mbeli le hɛ hwa ghweme ŋkɛ we, kagwəɗəŋə ŋkɛ kwa kema ta wəshi nyi zhɛrete ka Israyɛl kashala we. Kaɓelahe ŋkɛ le male ta kwete wəndə ba'a le male nya zhɛ nda wəshi we,

⁷ kazeme berete ta wəndə ŋkɛ we, kave wəsə ŋkɛ kənəa wəsə nya nzəɓə nda ŋkɛ ke mbeli we, kaghərə wəsəa wəndə ŋkɛ we, kaɗa nda wəshi kezeme ŋkɛ ke wəndə nya shewə va ma, kaseɗe nda lekwesa ŋkɛ ke wəndə nya ɗema ŋkɛ ve.

⁸ Kave nda təmə ŋkɛ ke wəndə le yɛmə yite we, wəsə shɛ kave ŋkɛ yite we. Wəmbə yazhɛre nda ŋkɛ ke wəsə kwa ndiremi ba'a fete ganyɛ yanegha ŋkɛ.

⁹ Kayɛ fete ŋkɛ yitea ghena nyi gezete 'ya ba'a yitea wəshi mahalegəa ɗa, kamene slene ŋkɛ le kaganda. Wəndəa shɛ ya kawəndə nya tiɗiɗi, teghweme tenza ŋkɛ. 'Ya Shala Mahwətə nde gezete.

¹⁰ Ya kwete pa kenza wəzege nya kefə wəshia mbeli, nya kempə ŋkwa ba'a nya kemene mama ta wəshi nyi kala nyighɛ va wəndəa shɛ.

¹¹ Kaɗema kenza kala yitenyɛ ne, kazeme wəshi nyi dzeghekɛ melɛ mbeli le hɛ hwa yɛ kələŋə ŋkɛ, kavale mia kweci mbeli ŋkɛ.

¹² Kazeme berete ta ka titikwəa kɛfi ba'a ka dewə ŋeli ŋkɛ, kaghərə wəshia mbeli ŋkɛ, kanzəɓə nda təmə ŋkɛ ke mbeli le yɛmə. Kagwəɗəŋə ŋkɛ kwa kema ta wəshi nyi zhɛrete mbeli kashala ba'a kamene wəshi nyi ndiremi ndiremi kashasha ŋkɛ.

¹³ Kave nda təmə ŋkɛ le yɛmə ke mbeli ba'a kwele kwele kele wəshi ŋkɛ yite. Teghweme tenza wəndəa shɛ na? Ewə! Wəshi nyi ndiremi ndiremi kashasha yamenete ŋkɛ, katemte ŋkɛ ba'a kwa ghəa ŋkɛ tenza mte ta ŋkɛ.

¹⁴ Ya kwete pa keyake ŋa ŋkɛ ŋkɛ wəzege nya kenakɛ jaɗafa nyi menete yitenyɛ pɛtɛ, ama kaɗema ŋkɛ kese kamene kala gheŋkɛ.

¹⁵ Kazeme wəshi nyi dzeghekɛ melɛ mbeli le hɛ hwa kələŋə ŋkɛ we, kagwəɗəŋə ŋkɛ kwa kema ta wəshi nyi zhɛrete ka Israyɛl kashala we, kazele male ta wəndə ŋkɛ we,

¹⁶ kazeme berete ta wəndə ba'a kave wəsə ŋkɛ kwa jiŋgina we, kaghərə wəsəa wəndə ŋkɛ we, kaɗa nda wəshi kezeme ŋkɛ ke wəndə nya shewə va ma ba'a kaseɗe nda lekwesa ŋkɛ ke wəndə nya ɗema ŋkɛ ve,

¹⁷ kazhɛre nda wəmbə ŋkɛ ke wəsə kwa ndiremi, kave nda wəsə ŋkɛ ke mbeli le yɛmə we, kayɛ fete ŋkɛ yitea wəshi mahalegəa ɗa ba'a yitea wəshi nyi gezete 'ya. Katemte ŋkɛ te fete nyi menete yitenyɛ we. Teghweme tenza ŋkɛ kaganda.

¹⁸ Yitenyɛ nde se kasa nda yaka ke mbeli, kaghərə ba'a kamene nda wəsə kwa ndiremi ke hwelefe ta ŋkɛ. Gheŋkɛ nde temte va fete ta ŋkɛ.

¹⁹ Ma pe yɛ sha 'yɛwe: ‹Va wa ɗema fete ta yitenyɛ kanza kwa ghəa wəzegea shɛ?› Va nya menete wəsə nya tiɗiɗi ba'a nya le hweŋkwa ta ŋkɛ ŋkɛ. Nahe ŋkɛ kehawete nda hawe ke wəshi mahalegəa ɗa ba'a keyipəyi hɛ kwa: kaganda tenza ŋkɛ teghweme.

²⁰ Ma wəndə nya kemenete jaɗafa ne, gheŋkɛ nde temte. Kanza fete ta mbeli nyi keyake ŋwale kwa ghəa ŋwalea nci keɗema ŋa ŋwale kwa ghəa mbeli nyi keyake hɛ we. Ma wəndə nya kemenete ganyɛ ne, ke ghəa ŋkɛ menete nda ŋkɛ, kwa ghəa nde 'yaghwa mehele tenza 'yaghwa mehele ta ŋkɛ.

Heka ŋkwa kamene wəsə ganyɛ

²¹ Ma kesərəakɛ wəshi nyi ndiremi ndiremi nde 'yaghwa mehele, keyate wəshi mahalegəa ɗa ŋkɛ ba'a kemenete slene ŋkɛ tiɗiɗi ba'a le hweŋkwa ta ŋkɛ, ghəpə yite katenza ŋkɛ teghweme we.

²² Katezhɛne mbeli kazəzə fete nyi menete ŋkɛ we, kwa nza ŋkɛ katenza ŋkɛ teghweme tewəmbəreke wəsə ganyɛ nya menete ŋkɛ.

²³ Ma zəzə yɛ ne, katezlama 'ya yitea mte ta nde 'yaghwa mehele na? Ma 'ya, 'ya Shala Mahwətə sha gheyɛ: ma wəsə nya ɗe 'ya ne, zhɛre geva ta ŋkɛ same kwa hweŋkwa nya ndiremi yitea nza ŋkɛ teghweme.

²⁴ Ama kesərəakɛ mene wəsə kwa ganyɛ wəndə nya tiɗiɗi kezha mene wəsə kwa ndiremi, ma kelənyɛ ŋkɛ yitea mene wəshi nyi ndiremi ndiremi kashasha pɛtɛ nyi mene ka 'yaghwa mehele ne, katenza ŋkɛ teghweme zəzə yɛ na? Ewə! Katezəzə wəshi ganji nyi menete ŋkɛ mbeli we. Katemte ŋkɛ va nya sema ŋkɛ dɛŋe dɛŋe te ghena ta ɗa ba'a va jaɗafa ta ŋkɛ.

²⁵ Ama pe yɛ sha geze: ‹Kehi wəsə nya mene nya Mahwətə kala nya we!› Gheyɛ ka Israyɛl, fa mə: Kaganda hitema geva wəsə nya mene 'ya na? Ŋa ŋayɛ wəshi nyi mene yɛ ka hitema geva.

²⁶ Ma kesərəakɛ mene ganyɛ wəndə nya tiɗiɗi, kamenete wəsə kwa ndiremi nya mtenyɛ ŋkɛ ve ne, va wəsə kwa ndiremi nya menete ŋkɛ mte ŋkɛ.

²⁷ Ama kesərəakɛ wəsə kwa ndiremi nde 'yaghwa mehele kamenete wəsə nya tiɗiɗi ba'a nya kehi ne, katembele mpia ŋkɛ ŋkɛ.

²⁸ Ma keɗepete wəshi nyi ndiremi ndiremi nyi menete ŋkɛ ba'a kezhɛrave nda wəmbə ŋkɛ ke hɛ ne, kaganda tenza ŋkɛ teghweme, katemte ŋkɛ we.

²⁹ Ama ma ke gheyɛ ka Israyɛl sha geze: ‹Kehi wəsə nya mene nya Mahwətə kala nya we.› Gheyɛ ka Israyɛl, fa mə: Kaganda hitema geva wəsə nya mene 'ya na? Ŋa ŋayɛ wəshi nyi mene yɛ ka hitema geva.

³⁰ Vatse gɛ ka Israyɛl, katemeha ghwə 'ya, 'ya Shala Mahwətə te yayata wəndəa ŋayɛ kala dzeghwa ta ŋkɛ. Zhɛre mə nza ta ŋayɛ, zhɛre nda mə wəmbə ke pɛtɛa wəshi nyi ndiremi ndiremi nyi mene yɛ, sərəma fete yɛ ya kwetɛŋe kaza ŋayɛ ma.

³¹ Sərəakɛ mə wəshi nyi ndiremi ndiremi nyi mene yɛ, zhɛrete mə wənəa ŋayɛ ba'a mehele ta ŋayɛ. Yitea wa ɗe yɛ kampə wa, ka Israyɛl?

³² Kazlama 'ya te mte ta wəndə nya kemte we. 'Ya Shala Mahwətə nde gezete. Zhɛrave nda mə wəmbə ke wəshi nyi ndiremi yitea nza yɛ teghweme!»