Ɛzɛkiyɛl 14 - Ghena ta Shala

Ɗema wəshi nyi zhɛrete mbeli kashala

¹ Ma te kwete hɛ ne, pa kweci mbelia jama ta ka Israyɛl se kantishɛnji kwa kema ta ɗa.

² Tagha, ma ke Mahwətə sha 'ya:

³ «Wəndə ŋelɛ, ma mbeli nyi ne, wəshi nyi zhɛrete mbeli kashala yandeke nda wənəa nci hɛ. Wəshi nyi kenza kakesame hɛ mbe jaɗafa yamawe hɛ keveci keveci. Kapelakɛ ghəa ɗa 'ya ka'yɛwe ghena hɛ va 'ya na?

⁴ Vatse gɛ, ma pa na sha hɛ: Wa nya ghena nya geze Shala Mahwətə nya: Ma yayata nde Israyɛl nya kendeke nda wənəa ŋkɛ ke wəshi nyi zhɛrete ŋkɛ kashala, nya keɗema kekelemte ntsə ta ŋkɛ te wəsə nya kekese ŋkɛ kadzembe jaɗafa ba'a nya kese kafa ghena va nde mɛ ŋkwa ne, 'ya Mahwətə le ghəa ɗa nde tezhɛne nda. Ma vəa ŋkwa nya tese ŋkɛ ne, yipə yipə le wəshia ŋkɛ nyi zhɛrete ŋkɛ kashala tezhɛne nda 'ya.

⁵ Ma tsagha ne, katedzawa wənəa ka Israyɛl nyi keslənji cakeɗake le 'ya yitea wəshi nyi zhɛrete hɛ kashala ghena ta ɗa.

⁶ Vatse gɛ, ma pa na sha ka Israyɛl: Wa nya ghena nya geze Shala Mahwətə nya: Mpi mə dzeve, sərəakɛ mə wəshi nyi zhɛrete yɛ kashala ba'a zhɛrave nda mə wəmbə ke wəshi nyi shɛma mbeli newe.

⁷ Ma kewəfəyite ɗa nde Israyɛl keɗema nde se se nya te hɛɗia Israyɛl, kendeke nda ghəa ŋkɛ ŋkɛ ke wəshi nyi zhɛrete ŋkɛ kashala, kevate ntsə ta ŋkɛ ŋkɛ te wəsə nya kekese ŋkɛ kadzembe jaɗafa, kwa sebe ta ŋkɛ, hwa'a ŋkɛ sha nde mɛ ŋkwa kezha fa ghena ta ɗa ne, 'ya Mahwətə le ghəa ɗa nde tezhɛne nda.

⁸ Kateme 'ya kənəa wəndəa shɛ, katezhɛre ŋkɛ 'ya kaghena keyipə pa nya ketenza kaghena ŋela, katekelemte ŋkɛ 'ya shave hwa mbelia ɗa. Ma tsagha, kateɗepete yɛ 'ya ya kaMahwətə.

⁹ Ma keghwetete ghəa ŋkɛ nde mɛ ŋkwa laka zhɛne ghena le ghəa ŋkɛ ne, 'ya Mahwətə nde tsəkwəte kamene kala nyagha. Kateɗa ŋkɛ 'ya le dzeve ta ɗa ba'a katekelemte ŋkɛ 'ya shave hwa ka Israyɛl nyi kambelia ɗa.

¹⁰ Ma nde mɛ ŋkwa nya kala nyagha ba'a wəndə nya kese nya ka'yɛwe ghena ve ne, fete nya kwetɛŋe ya kwa ghəa nci ba'a katekemave zhɛmea ŋkɛ hɛ.

¹¹ Ma tsetse ŋkɛ ne, katezhɛne ka Israyɛl kalə cakeɗake le 'ya we, katezhɛne hɛ kazhɛre ghəa nci wale wale laka fama ghena ta nci we, ama katenza hɛ kambelia ɗa ba'a katenza 'ya kaShala ta nci.» Nya ya kaghena nya gezete Shala Mahwətə.

Wəsə shɛ kafɛake meha ghwə ta Shala we

¹² Ma ke Mahwətə sha 'ya:

¹³ «Wəndə ŋelɛ, nda kwete pa kemenete ɗa jaɗafa mbeli nyi te kwete hɛɗi laka nzama dɛŋe dɛŋe te ghena ta ɗa. Katencɛ berete ta ɗa 'ya te hɛ, kateza wəshi kezeme ta nci 'ya, kateghwene nda ma 'ya ke hɛ ba'a kateza sebe 'ya te mbeli ba'a wəshi keseɗa nyi te hɛɗia shɛ.

¹⁴ Ya mbeli nyi mahekene nyi: Nowɛ, Daniyɛl ba'a Job nza te hɛɗia shɛ ne, deke ghenci ka tembele mpia nci laka nza tiɗiɗia nci. 'Ya Shala Mahwətə nde gezete.

¹⁵ Ma keghwename wəshi keseɗa nyi ghyana ghyana 'ya mbe hɛɗia shɛ, kezha nza ŋkɛ kaɓerama, kaɗema ŋwale mbe, kaɗema mbeli kadzeghwa mbe va wəshi keseɗa shɛhɛ ne,

¹⁶ ya mbeli nyi mahekene nyi gezete sləa nci nyi mə nza te hɛɗia shɛ, kageze ŋayɛ 'ya Shala Mahwətə kaɗema hɛ katembelete ŋwale tezhilia nci ba'a ŋwalea kwɛa nci. Deke ghenci ka tembele, ama hɛɗi ne, kaɓerama tenza ŋkɛ.

¹⁷ Keɗema kekeleke mpa 'ya kadzete hɛɗia shɛ ne, katepele nda hweŋkwa 'ya ke ka sewajɛ kaza sebe te hɛɗia shɛ ba'a kampə mbeli ba'a wəshi keseɗa nyi mbe.

¹⁸ Ya mbeli nyi mahekene nyighɛ nza hwa mbeli nyi te hɛɗia shɛ ne, kageze ŋayɛ 'ya Shala Mahwətə kaɗema hɛ katembelete ŋwale tezhilia nci ba'a ŋwalea kwɛa nci. Deke ghenci ka tembelete mpia nci.

¹⁹ Keɗema keghwenate ba 'ya te hɛɗia shɛ, kevate ghwə ta hwepe wənəa ɗa 'ya te laka ndiremi nya wəba nya keteza sebe te mbeli ba'a wəshi keseɗa,

²⁰ ya Nowɛ, Daniyɛl ba'a Job nza hwa mbeli nyi te hɛɗia shɛ ne, kageze ŋayɛ 'ya Shala Mahwətə kaɗema hɛ katembelete ŋwale tezhilia nci ba'a ŋwalea kwɛa nci. Deke ghenci ka tembelete mpia nci.

²¹ Kwa nza ŋkɛ wa nya ghena nya geze Shala Mahwətə nya: Ya 'ya ghwenate ndiremi nyi dzawe dzawe wəfaɗe te Zhɛrəzalɛm: mpa, ma, wəshi keseɗa nyi ghyana ghyana ba'a ba kaza sebe te yɛ mbeli le wəshi keseɗa ne,

²² katetene mbeli nyi teghweme mbe, zhili ba'a mi. Katefə hɛ mbeli shave mbe meleme, katese hɛ sha gheyɛ. Ma vəa ŋkwa nya tenakɛ dzeghwa ta nci ba'a slene ta nci yɛ ne, kategwegweɗakwe ghəa ŋayɛ yɛ va ndiremi nyi vate 'ya te Zhɛrəzalɛm.

²³ Katezhɛremte nza ta ŋayɛ yɛ, kwa nza ŋkɛ katenakɛ dzeghwa ta nci ba'a slene ta nci yɛ. Ma tsagha, kateɗepete yɛ kaɗema gəmə menete nda 'ya tsagha ke melemea shɛ. 'Ya Shala Mahwətə nde gezete.»