Ɛzɛkiyɛl 11 - Ghena ta Shala

Katemeha ghwə Shala te Zhɛrəzalɛm va fete ta ŋkɛ

¹ Pa Sefəa Shala keleghe ɗa kadzeme yitea ghweme ba'a veyi ɗa mɛa ŋkwa kedzembe ghɛa Mahwətə nya laka ŋkwa kesame ta veci. Ma mɛa ŋkwa kedzeki ne, pa 'ya nakɛ zhili bakemsə mcɛfeghəmbe ba'a ɗepete yɛ Yazaniya, wəzege ta Azəwr le Pelatiya, wəzege ta Benaya nyi kambeli nyi bake te ghəa mbeli hwa hɛ.

² Ma ke Sefəa Shala sha 'ya: «Wəndə ŋelɛ, wa nyi mbeli nyi kezəzə mene jaɗafa ba'a nyi ketsa ghena nyi ndiremi ndiremi mbe meleme nya nyi.

³ Ma ke hɛ sha geze: ‹Kenaka və gare ŋa yɛ ghɛ n'yɛ teke we, shaga meleme nya, sli nya kwa ghen'yɛ.›

⁴ Vatse gɛ wəndə ŋelɛ, nza kande mɛ ŋkwa shɛ na zlapete nda ghena ke hɛ.»

⁵ Taghanyɛ, pa sefəa Mahwətə dzeghənyɛ kənəa 'ya, ma ke sha 'ya: «Wa nya ghena nya geze Mahwətə nya: Nahe 'ya keɗepe ghena nyi geze yɛ, gheyɛ ka Israyɛl, nahe 'ya kefave wəshi nyi zəzə yɛ!

⁶ Kwele kwele mpəmte mbeli gheyɛ mbe meleme nya, rayɛ hweŋkwa nyi dzeyi mbe va mbeli nyi kempə mpə.

⁷ Vatse gɛ ne, wa nya ghena nya geze ŋayɛ 'ya, 'ya Shala Mahwətə nya: Ma mbeli nyi mpəmte nyi yɛ mbe meleme ne, ghenci ya kasli, meleme ya kashaga. Ama gheyɛ ne, kateŋkamte ŋayɛ 'ya shave mbe.

⁸ Kaghazlənə yɛ va mpa na? Kateghwene mpa 'ya kase kadzehwa gheyɛ. 'Ya Shala Mahwətə nde gezete.

⁹ Kateŋkamte ŋayɛ 'ya shave mbe meleme ba'a kateve ŋayɛ 'ya mbe dzeve ta kweci hwelefefi, katemeha ghwə 'ya te gheyɛ.

¹⁰ Te hɛɗia Israyɛl nya temeha ghwə 'ya te gheyɛ laka mpə ŋayɛ le kafayɛ. Ma tsagha, kateɗepete yɛ 'ya ya kaMahwətə.

¹¹ Katenza meleme kashaga kezha gheyɛ we, katenza yɛ kasli nya kwa we. Te hɛɗia Israyɛl nya temeha ghwə 'ya te gheyɛ.

¹² Ma tsagha, kaɗepete yɛ 'ya ya kaMahwətə nya ɗema yɛ kese kahawe va wəshi mahalegəa ɗa ba'a kayɛ wəshi nyi gezete 'ya, kwa nza ŋkɛ wəshi keshia kweci hwelefefi nyi dzeyi yitea gheyɛ yazelete yɛ.»

¹³ Ma vəa ŋkwa nya nza 'ya kageze ghena nya kese va Shala ne, mtiwə Benaya, wəzege ta Pelatiya mtenyɛ. Gwəɗəŋə 'ya ntiŋə ghə mbe hɛɗi, ma 'ya le berete: «Shala Mahwətə yawe, gha ɗe kampəmte ka Israyɛl nyi ketene pɛtɛ na?»

Katetseneke ka Israyɛl nyi ketazemte geva Shala

¹⁴ Ma ke Mahwətə sha 'ya:

¹⁵ «Wəndə ŋelɛ, 'ya kageze ŋa ghena te ghəa hwelefe ta ŋa, ka menəhɛ ŋa ba'a te ghəa ka Israyɛl nyi kefəhwe geva pɛtɛ. Ma ke mbeli nyi mbe Zhɛrəzalɛm sha ncɛte nda ntsehwele ke hɛ: ‹Nza ŋayɛ mə cakeɗake le Mahwətə, kwa nza ŋkɛ kaŋa n'yɛ ndeke n'yɛ hɛɗi nya ŋkɛ.›

¹⁶ Ma pa na sha hɛ gɛ: Wa nya ghena nya geze Shala Mahwətə nya: Ya 'ya ŋkaghe hɛ kalə hwa kweci hwelefefi ba'a tazeyi hɛ te kweci hɛɗi ne, nahe 'ya kese kala ŋkwa nya keveyi geva tekeleke kezha hɛ te hɛɗi nyi se hɛ.

¹⁷ Ma pa na sha hɛ gɛ: Wa nya ghena nya geze Shala Mahwətə nya: ‹Katetsene ŋayɛ 'ya se hwa kweci hwelefefi ba'a se te kweci hɛɗi nyi tazeyi ŋayɛ 'ya. Kwa sebe ta ŋkɛ, katezhɛne 'ya kave ŋayɛ hɛɗia Israyɛl.

¹⁸ Ma vəa ŋkwa nya tentsehe yɛ te ne, kateza sebe yɛ te pɛtɛa wəshi nyi zhɛrete mbeli kashala ba'a wəshi nyi ndiremi ndiremi kashasha pɛtɛ nyi te.

¹⁹ Kateve nda wənə mɛnɛfɛ 'ya ke yayata wəndəa ŋayɛ. Kateve mehele ganyɛ 'ya mbe gheyɛ. Katekelemte wənə nya ntɛaŋentɛa nya kala pelɛ 'ya shave mbe gheyɛ kezha ve ŋayɛ nya kweɗekwe.

²⁰ Ma tsagha ne, katezele wəshi mahalegəa ɗa yɛ, kateya wəshi nyi gezete 'ya yɛ ba'a katemene slene yɛ le hɛ. Katenza yɛ kambelia ɗa ba'a katenza 'ya kaShala ta ŋayɛ.

²¹ Ama kaŋa mbeli nyi kendeke nda wənəa nci ke wəshi nyi zhɛrete mbeli kashala ba'a wəshi nyi ndiremi ndiremi kashasha ne, katezhɛne nda dzeghwa ta nci 'ya kadzawa ghə ke hɛ.› Shala Mahwətə nde gezete.»

²² Tagha gɛ, pa ka shɛrəbɛŋe pelete bidzəa nci, ntəŋə wəshi nyi kala seɗa ta wəmata nyi yitea hɛ. Pa zləvəa Shala ta ka Israyɛl nzanyɛ kənəa hɛ.

²³ Kwa sebe ta ŋkɛ, ntəŋə zləvəa Mahwətə slənyɛ kənəa tepe ta meleme kalə kanza kənəa ghweme nya laka ŋkwa kesame ta veci yite.

²⁴ Ma mbe wəsə nya nakɛa shɛ 'ya ne, laŋe Sefəa Shala keleghe ɗa kadzeme yitea ghweme ba'a zhɛneghe ɗa kajive sha mbeli nyi fəhwe mbeli pelɛ Babilone. Ma tagha gɛ, pa wəshi nyi nakɛ nyi 'ya zanji.

²⁵ Pa 'ya ɓelate nda wəshi nyi ncɛte ɗa Mahwətə kala shiwə pɛtɛ ke mbeli nyi fəhwe mbeli.