Ɛzɛkiyɛl 10 - Ghena ta Shala

Shala kazhɛne ncɛ nda ghəa ŋkɛ ke Ɛzɛkiyɛl

¹ Newe 'ya ne, dəkwə 'ya te kwete wəsə kala lemba kənəa ghəa ka shɛrəbɛŋe. Pa kwete wəsə kala pelɛ kwa lɛa lɛa ghweme nya nza zləvə te ncake geva. Kala pasla pa ta ŋkɛ.

² Ma ke Shala sha wəndə nya nza lekwesa pawa mbe: «Dzawa ŋa kwelɛ wəshi nyi kala seɗa ta wəmata nyi yitea ka shɛrəbɛŋe nyi, ntave laɗe ta ghwə nya kwelɛ ka shɛrəbɛŋe nya pɛre te dzeve shɛ na betaghe kənəa meleme.» Pa wəndəa shɛ dzawanyɛ kwelɛ te ntsə ta ɗa.

³ Ma vəa ŋkwa nya dzeki wəndə nyagha ne, laka bela kwa zeme ta ghɛa Shala sha ka shɛrəbɛŋe, pa meləkwə ləkwə viɗikɛ ŋwela nya ki.

⁴ Pa zləvəa Mahwətə slə kənəa shɛrəbɛŋe kalə mɛa ŋkwa kedzembe ghɛa Shala. Pa meləkwə ləkwə nyagha viɗikɛ ŋwela nya ki ghɛ vəa ŋkwa nya ɓele ŋwela nya mɛ va zləvəa Mahwətə.

⁵ Kafefa gaka ta bidzəa ka shɛrəbɛŋe mbeli pa te ŋwela nya pelɛke pelɛke kala gaka ta ŋwələa Shala nde berete kenza ŋkɛ kageze ghena.

⁶ Pa wəndə nya mbe lekwesa pawa shɛ lə kasletenyɛ vare wəsə nya kala seɗa ta wəmata. Tagha sletenyɛ ŋkɛ nda gezave nda Shala kanta laɗe ta ghwə kwelɛ wəshi nyi kala seɗa ta wəmata nyi kwelɛ ka shɛrəbɛŋe.

⁷ Pa kwete wəndəa ka shɛrəbɛŋe nyighɛ haghe dzeve dzawa laka ghwə nya dekwe yite. Pa ŋkɛ ntave ba'a pɛrekɛ nda dzeve le ke wəndəa shɛ. Laŋe wəndəa shɛ te kashave.

⁸ Pa kwete wəsə kala dzeve ta wəndə ŋelɛ ncake geva shave mbe bidzəa ka shɛrəbɛŋe.

⁹ Newe 'ya ne, dəkwə 'ya te wəshi kala yɛ seɗa ta wəmata wəfaɗe vare ka shɛrəbɛŋe, kwete kwete vare yayata shɛrəbɛŋe. Kala pelɛ kwa sleke sleke nya nza zləvə te slesla wəshi nyi kala seɗa ta wəmata shɛhɛ.

¹⁰ Kanya kwetɛŋe pa ta wəshi nyi kala seɗa ta wəmata nyi wəfaɗe nyighɛ ba'a kala wəsə nya nza kwete wəndəa nci kwa kwete.

¹¹ Wərə hɛ kalə laka yayata bela kaɗema kazhɛre geva te ghəa nci. Nda lə yalə hɛ laka ŋkwa nya nza kema ta ka shɛrəbɛŋe kaɗema kazhɛre geva te ghəa nci.

¹² Pɛtɛa geva, wəmbə, yɛ dzeve ba'a yɛ bidzəa ka shɛrəbɛŋe shɛhɛ ne, rayɛ va wəshi nyi keslesla kala ntsə, tsagha wəshi nyi kala seɗa ta wəmata nyi wəfaɗe nyi.

¹³ Kafefa 'ya nda ndeke nda slə mbeli “kawəshi nyi kezhɛre geva” ke wəshi nyi kala seɗa ta wəmata shɛhɛ.

¹⁴ Kema wəfaɗe ya kwa yayata shɛrəbɛŋe: kema ta shɛrəbɛŋe ya kwa nde ghate, ŋa wəndə ŋelɛ ya kwa nde bake, ŋa nivɛrə ya kwa nde mahekene ba'a ŋa zele ya kwa nde wəfaɗe.

¹⁵ Pa ka shɛrəbɛŋea shɛhɛ zlənji dzeme yitea ghweme. Kala wəshi nyi nza nyi mpi hwe nyi nakɛ nyi 'ya mɛa hələa Kɛbar pa ta nci.

¹⁶ Ma vəa ŋkwa nya dzeghwa ka shɛrəbɛŋe ne, kadzeghwa wəshi nyi kala seɗa ta wəmata nyi yitea hɛ. Ma vəa ŋkwa nya pele bidzəa nci hɛ kazlə ne, kaslə wəshi nyi kala seɗa ta wəmata nyi yitea hɛ we.

¹⁷ Ma vəa ŋkwa nya ghereŋe hɛ ne, kaghereŋe wəshi nyi kala seɗa ta wəmata shɛhɛ. Ma vəa ŋkwa nya zlə hɛ ne, kazlə hɛ perə, kwa nza ŋkɛ sefəa wəshi nyi nza nyi mpi hwe ya mbe hɛ.

Mahwətə kaslə shave ki ghɛa ŋkɛ

¹⁸ Pa zləvəa Mahwətə slənyɛ mɛa ŋkwa kedzembe ghɛa Shala kalə kanza kənəa ka shɛrəbɛŋe.

¹⁹ Pa ka shɛrəbɛŋe pelete bidzəa nci kazlə kanya kwetɛŋe le wəshi nyi kala seɗa ta wəmata kanewe newe 'ya. Pa hɛ ghereŋenji mɛa ŋkwa kedzembe ghɛa Shala nya laka ŋkwa kesame ta veci. Pa zləvəa Shala ta ka Israyɛl nzanyɛ kənəa hɛ.

²⁰ Ma mɛa hələa Kɛbar ne, nahe 'ya kegha kanakɛ wəshi nyi nza mpi hwe yitea hwəa Shala ta ka Israyɛl kala nyighɛ. Nahe 'ya keɗepete kaka shɛrəbɛŋe hɛ.

²¹ Kema wəfaɗe, bidzə wəfaɗe ba'a kweci wəshi kala dzeve ta wəndə ŋelɛ shave mbeyitere bidzə ya te yayata wəndəa nci.

²² Ma kema ta nci ne, tɛfɛa tɛfɛa kala ŋa wəshi nyi nza nyi mpi hwe nyi nakɛ nyi 'ya mɛa hələa Kɛbar. Yayata wəndəa nci kadzeghwa tiɗiɗi te kema ta ŋkɛ.