Ɛstɛr 1 - Ghena ta Shala

Gəsəkəa meghe Sɛrsɛs

¹ Wa nya wəsə nya kemenete geva nya te vəa Sɛrsɛs. Gheŋkɛ ya kameghe te sla ta hɛɗi gwəmsə ba'a bakemsə mberefaŋeghəmbe, slə mbe Ɛnde hwa'a te hɛɗia Ɛtiyopi.

^2-3 Ma mbe kwa maheke ta va ta ŋkɛ mbe meghe, kwa ntishɛ ŋkɛ pelɛ pasla meghe mbe ŋkwa nya berete mbe Səze ne, pa takɛ gəsəkə kezha ka mene slene ta ŋkɛ nyi jama jama pɛtɛa ba'a mbelia ŋkɛ nyi te ghə. Pa tsenete mbelia jama ta ka sewajɛ nyi mbe Pɛrse ba'a nyi mbe Mɛdi, ka ŋgwamna ba'a mbeli nyi te ghəa yɛ sla ta hɛɗi yitea ghəa ŋkɛ.

⁴ Ntake kancɛ nda zləvəa ŋkɛ nya kawəsə meŋele ke hɛ, tsema tsema kwelea meghea ŋkɛ. Hɛ kwele kwele menete gəsəkəa shɛ! Tere ŋkwaŋe pɛtɛa ŋkɛ.

⁵ Ma kwa kiɗi vəa shɛ ne, pa ŋkɛ menete wəshi kezeme ke mbeli nyi mbe ŋkwa nya berete mbe Səze, ke mbelia jama le nyi ɓɛhwɛ pɛtɛ kwa ntsa nya yitea ghɛa meghe, kahɛ mberefaŋe menete geva ŋkɛ.

⁶ Pa hwepeyi yɛ mayafe kwa tɛawetɛa le kwa ndereme ndereme te zewe kwa ɗeke gheme, le yɛ ŋgwedɛba mze kwa tɛawetɛa tendɛaŋe te yɛ selə nyi ŋate mbeli le kwacaregesla. Pa mbeli vɛsəyi mze kwa tere tere ba'a mze kwa tɛawetɛa te diɓere nya sleɓete mbeli le pelɛ nyi ketsehe tsehe, nyi kakwa rəghwə rəghwə, ghwaba ghwaba ba'a nyi nɛnɛa nɛnɛa ba'a nyi ɗɛkeɗɛa ɗɛkeɗɛa.

⁷ Kasa wəshi kesa mbeli kwa zlerekwe mze kwa tere tere nyi nza pa ta nci keghə keghə. Kwele kwele fəave nda tɛ meghe ke mbeli laka vele nya vele meghe

⁸ Pa meghe gezave nda ke mbeli nyi kemene slene ta wəshi kesa, yagha hɛ kaŋka mbeli yitea zeme wəsə ba'a sa wəsə kesa le berete, kala nya ɗe ŋkɛ yayata wəndə mene ŋkɛ.

⁹ Ma Vasti nya kamale ta meghe perə ne, nahe ŋkɛ kemenete nda wəshi ke mi nyi ki ghɛ meghe Sɛrsɛs.

Hawe nya pate nda Vasti ke meghe

¹⁰ Ma te kwa mberefaŋe ta hɛ ne, fare fare wənəa meghe va tɛ, pa gezave nda ke Mɛhəwman, Bizta, Harbona, Bigta, Abagta, Zɛtar ba'a Karkas, ka mene nda slene mberefaŋe nyi ketsewe tsewe.

¹¹ Pa geze nda ke hɛ kezha hekake Vasti male ta meghe hɛ kase kwa kema ta mbelia jama le derə meghea nta mbe ghə. Meghe kaɗe kancɛ nda ke mbelia jama le kweci mbeli nyi tagha tsema tsema ndeɗea malea shɛ. Va nya nza nde kendeɗe nda tsape.

¹² Pa ka tsewe tsewe gezete nda ghena nya gezeke meghe, ama pa Vasti, male ta meghe ɗema se, pa wənəa meghe bezenyɛ kwele kwele.

¹³ Pa meghe fakɛ ghena va ka ncɛ nda ntsehwele nyi yite, kwa nza ŋkɛ tsagha seneve meghe kanewe ghena le mbeli nyi te ghəa slene kaba, mbeli nyi keɗepemte ghena ta nza le wəshi nyi mene mbeli ghalanza.

¹⁴ Hwa mbeli nyi kencɛ nda ntsehwele ke meghe yɛ Karshena le Shɛtar le Admata le Tarsis le Mɛrɛs, Marsena le Meməwkan, nyi jama jama te hɛɗia ka Pɛrse le ka Mɛdi, mberefaŋe nyi nza kwa ghate ta ŋkwa va hɛ kadzeyitea meghe. Kagezleŋe ghə meghe va hɛ we, vatse nza ŋkwa nyi jama jama va hɛ.

¹⁵ Ma ke meghe sha hɛ: «Wa ghwə nya meha nda mə ke Vasti, male ta ɗa kwa ɗema nde yɛ ghena nya gezete nda mbeli nyi ghwenakɛ nda 'ya wa?»

¹⁶ Ma ke Meməwkan kwa kema ta meghe le ka mene slene nyi jama jama: «Nahe Vasti, male ta meghe kebezemte ghena kwele kwele, deke ke meghe we, ama ke ka mene slene ta ŋkɛ nyi jama jama ba'a ke mbeli nyi kenza te yayata sla ta hɛɗia ŋkɛ.

¹⁷ Kwa nza nde pɛtɛ teɗepe wəsə nya menete nya nde mi, katehawe hɛ va zhilia nci we. Ma tegeze hɛ: ‹pa meghe nya wəba geze nda ke mbelia ŋkɛ kaheka Vasti kase kwa kema ta ŋkɛ ne, ama pa ɗema se!›

¹⁸ Ɓəshi veci nya kefate wəsə nya menete nya male ta meghe nya wəba nya mia mbelia jama nyi te hɛɗia ka Pɛrse le nyi te hɛɗia Mɛdi ne, tsagha shɛ temene nda hɛ ke zhilia nci, katehwepe nda wənəa nci hɛ ke hɛ.

¹⁹ Ma kenza nde kaɗe na gɛ meghe yawe, gezete ghena kezha fɛa Vasti kedzawa kema ta ŋa kaghala ghala. Zhɛne ne, ndeke nda ŋkwa nta ke kwete male nya za ma ke ghenta. Katerafe ghena ta meghea shɛ mbeli mbe wəshi mahalegəa hɛɗia Pɛrse le ŋa Mɛdi, katezhɛremte geva ghena shɛ we.

²⁰ Ma kwa tefate ghena nya wəba nya mbeli te hɛɗi pɛtɛ ne, pɛtɛa mi katehawe va zhilia nci, nyi jama jama le nyi ɓɛhwɛ ɓɛhwɛ.»

²¹ Zeɗehwe nda ghena shɛ ke meghe ba'a ke mbelia jama ta ŋkɛ, pa meghe menete kala nya gezete Meməwkan.

²² Pa ghweneghe nda palepa kalə ke yayata sla ta hɛɗi meghea ŋkɛ, pa rafete kala nza ta nci keghə keghə le yɛ ghena ta nci. Ma gezete geva ŋkɛ ne, yayata za kanza kande sleke ghɛa ŋkɛ, vatse rafete hɛ le ghena ta nci.