Ka Ɛfɛze 5 - Ghena ta Shala

Nza mbe waŋe

¹ Ma kwa nza nde ŋwalea ŋkɛ nyi ɗe Shala yɛ ne, ntsə mə geva kamene slene kala gheŋkɛ.

² Nza mə kaka ɗe ŋkwa kala Kriste nya keɗehwe ɓəmə laka zamte mpia ŋkɛ kezha gheɓəmə. Nahe ŋkɛ kezhɛrete ghəa ŋkɛ kala wəsə nya ve nda mbeli ke Shala ba'a melɛ nya nza zəŋwəa ŋkɛ zeɗehwe nda ke Shala.

³ Gheyɛ ne, hwa mbelia Shala yɛ. Ma tsagha ne, mba yɛ kemene vale tahe, kenza wale wale keɗema kesla ntsə yitea wəshi.

⁴ Mba yɛ kegeze ghena nyi keɗema kehi, ghena dewə mehele ba'a ghena nyi ndiremi ndiremi. Jara tsa nda hana yɛ ke Shala mbe səkwə.

⁵ Ɗepete mə megela: ma nde vale tahe, nde nza wale wale keɗema nde dzeghwama ntsə, geze ta ŋkɛ, wəsə nya zhɛrete mbeli kashala ne, kadzembe Meghea Kriste ba'a ŋa Shala hɛ we.

⁶ Yagha kwete wəndə kaghwete ŋayɛ le ghena kwadanji, va ghena nyi kala nyi hwepe wənə Shala va mbeli nyi keɗema kayɛ fete yitea ghena ta ŋkɛ.

⁷ Jikəma geva yɛ le mbeli nyi kala nyi ma.

⁸ Ma vəashi ne, mbe ŋkwesle se yɛ. Ama tsetsenya ne, mbe waŋe yɛ mbe nza ta ŋayɛ jikə le Nde sleke ŋkwa. Vatse gɛ, nza mə kaŋwalea waŋe.

⁹ Wəsə nya yake waŋe ne, ndeɗea mehele, nza tiɗiɗi ba'a kaganda.

¹⁰ Sepa mə wəsə nya zeɗehwe nda ke Nde sleke ŋkwa.

¹¹ Mba yɛ kemene slene gəmə nyi mene mbeli mbe ŋkwesle, ama jara ma ncɛ hɛ yɛ.

¹² Kwa nza ŋkɛ ma wəshi nyi mene hɛ tewəfərə ne, kazhɛ wəndə hawe ya va geze hɛ.

¹³ Ama pɛtɛa wəshi nyi kencɛte geva te ŋwela ne, waŋe nde ncɛte hɛ.

¹⁴ Kwa nza ŋkɛ ma yayata wəsə nya kencɛte geva ne, mbe waŋe ŋkɛ. Vatse gɛ, ma ke mbeli sha geze: Feɗeghe, gha wəndə nya te hɛ, sate ŋa hwa mbelia kwahɛɗi, tagha gɛ, katewaŋe ŋa ŋkwa Kriste.

¹⁵ Ya mə ghəa ŋayɛ kwele kwele mbe nza ta ŋayɛ. Mba yɛ kenza kaka gezhia kɛfi, ama nza mə kambeli nyi kentsehwele ntsehwele.

¹⁶ Ya hweŋkwa hweŋkwa kemave və kemene ganyɛ yɛ ne, mene mə, dzawe və nya nza nya gheɓəmə te.

¹⁷ Mba yɛ kenza kaka gezhia kɛfi, ama ntsə mə geva kezha ɗepe wəsə nya ɗe Nde sleke ŋkwa kamene yɛ.

¹⁸ Mba yɛ keghwəyi ghəa ŋayɛ le tɛ, gheŋkɛ nde za ŋkwa. Ama nza mə viɗi va Sefəa Shala.

¹⁹ Kanya kwetɛŋe ne, ntsə nda mə berete ke ghəa ŋayɛ laka yɛ cimə, yɛ cimə ketsahe Shala ba'a kweci cimə nyi kese va Sefəa Shala, gha nda mə cimə ba'a tsahe mə Nde sleke ŋkwa le wənə kwetɛŋe.

²⁰ Tsa nda mə ŋ'wese ke Shala Yita keveci keveci ba'a te yayata ŋkwa, te sləa Nde sleke ɓəmə Yɛsə Kriste.

Nza ta yɛ zhili le mi mbe wəme geva

²¹ Gheyɛ nyi kehawe va Kriste ne, hawe mə kwelɛ ghəa ŋayɛ perə.

²² Gheyɛ mi, fa nda mə ghena ke zhilia ŋayɛ, kala nya fa nda yɛ ke Nde sleke ŋkwa.

²³ Kwa nza ŋkɛ za ya te ghəa male ta ŋkɛ kala nya nza Kriste te ghəa Jikə ta mbelia ŋkɛ. Kriste le ghəa ŋkɛ ya kande mbele Jikə ta mbelia ŋkɛ nyi kageva ta ŋkɛ.

²⁴ Ma kala nya ŋkɛ ne, nahe ŋkɛ kehite geva kezha fa nda ghena mi ke zhilia nci kala nya fa nda ghena Jikə ta mbelia ŋkɛ ke Kriste.

²⁵ Gheyɛ zhili, ɗe mə mia ŋayɛ kala nya ɗehwe Jikə ta mbelia ŋkɛ Kriste nya keyɛhwe mte kezha gheŋkɛ.

²⁶ Ma nda menete ŋkɛ kala nya ne, kezha nza Jikə ta ka Kriste kaŋa Shala, kwa sebe ta nya zhɛrete ŋkɛ wɛŋe laka yɛmə ba'a laka ghena.

²⁷ Nahe Kriste keɗehwe kave Jikə ta mbelia ŋkɛ kwa kema ta ŋkɛ mbe zləvə, wɛŋe, kaɗema beze te, kaɗema reɗa te. Nahe ŋkɛ keɗehwe kanza nde tekeleke ba'a kaɗema ŋele te.

²⁸ Tsagha hi zhili kaɗe mia nci kala nya ɗe ghəa nci hɛ. Ma za nya keɗe male ta ŋkɛ ne, ghəa ŋkɛ yaɗe ŋkɛ.

²⁹ Wəndə shɛ kegha kazlɛ va geva ta ŋkɛ we, ama kasepa nda wəsə kezeme wəndə ŋkɛ ba'a kanewe ghweme ŋkɛ te kala nya mene Kriste kezha Jikə ta mbelia ŋkɛ.

³⁰ Ashɛ gheɓəmə ya kabela nyi te geva ta ŋkɛ wəka?

³¹ Kwa nza ŋkɛ ma ke rafete geva: «Vatse tesərə yɛ yitenyɛ le meghekɛ za kezha jikə geva le male ta ŋkɛ yitea nza hɛ kageva nya kwetɛŋe.»

³² Ghena nya wəba ya tewəfərə mbe ghena shɛ. Ma ɗe 'ya kageze ne, te ghena ta Kriste ba'a Jikə ta mbelia ŋkɛ geze geva ŋkɛ.

³³ Ya tsagha ŋkɛ ne, nda yayata ŋayɛ kaɗe male ta ŋkɛ kala nya ɗe ghəa ŋkɛ ŋkɛ. Male ɓiyitsa ne, nda nde kahawe va za nta.