Zhɛne Ghwelə yitea Wəshi Mahalegə 8 - Ghena ta Shala

Nahe Mahwətə kentsehwelete mbelia ŋkɛ te ɓerama

¹ Katemene slene yɛ le pɛtɛa ghena nyi geze ŋayɛ nyi 'ya ɓeshi. Ma tsagha ne, katenza yɛ teghweme ba'a kateya yɛ kwele kwele. Katekele hɛɗi nya meɗeyi nda Mahwətə ke ka shihɛ ŋayɛ yɛ kaŋa ŋayɛ.

² Zəzəte mə pɛtɛa dzeghwa nya ndeke ŋayɛ Shala Mahwətə ta ŋayɛ te ɓerama kava wəfaɗemsə. Nahe ŋkɛ kedzeghakɛ ŋayɛ le yɛ yaka kezha newe nza ta wənəa ŋayɛ ba'a kezha ɗepete kenza ŋkɛ katehawe yɛ keɗema kaɗema yɛ katehawe va ghena nyi gezete ŋkɛ.

³ Nahe ŋkɛ kesahwe ŋayɛ yaka, kendeke ŋayɛ ma ba'a kezehwe ŋayɛ mane, wəsə kezeme nya ɗepema yɛ ba'a nya ɗepema ka shihɛ ŋayɛ. Tsagha ne, nahe ŋkɛ kencɛte ŋayɛ kaɗema deke ɗafa nde ve ŋkwa teghweme, ama ghena nyi kesame kwa mɛa Shala.

⁴ Kehalenji lekwesa ta ŋayɛ ba'a kese seɗa ta ŋayɛ kakesle mbe va nyi wəfaɗemsə nyi we.

⁵ Ɗepete mə megela, Shala Mahwətə ta ŋayɛ nde ɗe kantsehwele ŋayɛ kala yita nya kantsehwele wəzege ta ŋkɛ.

⁶ Mene mə slene le ghena nyi gezete Shala Mahwətə ta ŋayɛ, dzeghwa mə kala nya ɗe ŋkɛ ba'a hawe mə ve.

Dzeghe ŋkwa nyi te hɛɗi nya kemeɗeyi geva

⁷ Katefə ŋayɛ Shala Mahwətə ta ŋayɛ kadzete hɛɗi nya ganyɛ, hɛɗi nya nza yɛ hələ ba'a yɛ ɗasle kwele kwele te, hɛɗi nya hwɛ yɛmə nyi kesame kwa zeweve ta hɛɗi dzeyi te ŋwela ba'a sawa hwa ghweme te.

⁸ Hɛɗi nya pese ha ba'a megi, rɛzɛŋe, yɛ dasekwa ba'a yɛ kwakweme te ŋkɛ. Hɛɗi nya nza n'yia bekele ba'a yɛməa mze kwele kwele te.

⁹ Hɛɗi nya teɗema yɛ kadzeghe ɗafa dzeghe dzeghe, nya ɗema kwete wəsə kateɗema va gheyɛ te. Hɛɗi nya nza veyizə dzeyi mbe pelɛ ba'a nya mene mze kwa gheme mbeli shave mbe yɛ ghweme te.

¹⁰ Katezeme wəshi kezeme yɛ behe behe ba'a katetsa nda hana yɛ ke Shala Mahwətə ta ŋayɛ kezha hɛɗi ganyɛ nya ndeke ŋayɛ ŋkɛ.

¹¹ Ama yate mə ghəa ŋayɛ megela va zaghə Shala Mahwətə ta ŋayɛ laka hawema va ghena nyi gezete ŋkɛ, va wəshi keshia ŋkɛ ba'a va wəshi mahalegəa ŋkɛ nyi ve ŋayɛ nyi 'ya ɓeshi.

¹² Ma vəa ŋkwa nya tezehwe wəshi kezeme yɛ behe behe, nya teŋate ghɛ ganji yɛ kanza mbe,

¹³ nya tenza sla, timɛti ba'a kwi kwele kwele va gheyɛ, nya tenza mze kwa tɛawetɛa ba'a mze kwa tere tere kwele kwele va gheyɛ ba'a mama ta kweci wəshi va gheyɛ ne,

¹⁴ ntsehwele mə va zhɛre ghəa ŋayɛ kaka kele ghə ba'a va zaghə Shala Mahwətə ta ŋayɛ nya kefəakave ŋayɛ mbe Ɛzhipte nya se yɛ kaka mavashi.

¹⁵ Gheŋkɛ nde fəghe ŋayɛ jive te ɓerama nya wəba ba'a nya ghazlənə mbeli ve, nya nza shishi nyi ghyana ghyana ba'a yɛ yɛte kwele kwele te. Ma te hɛɗi nya keghwele ghwelea shɛ ne, nahe ŋkɛ kentsake ŋayɛ yɛmə shave mbe keleɓa nya ntɛaŋentɛa.

¹⁶ Ma te ɓerama shɛ ne, nahe ŋkɛ kendeke ŋayɛ mane, wəsə kezeme nya ɗepetema ka shihɛ ŋayɛ. Nahe ŋkɛ kedzeghakɛ ŋayɛ le yɛ yaka kezha newe nza ta ŋayɛ ba'a kezha ve ŋayɛ zeɗe nza kwa sebe ta ŋkɛ.

¹⁷ Zəzəma yɛ tɛape nahe yɛ kekemave mcɛlə nyi le ghəa ŋayɛ ba'a laka berete ta ŋayɛ ma.

¹⁸ Ama zəzəte mə Shala Mahwətə ta ŋayɛ nde ndeke ŋayɛ berete kezha kemave mcɛlə nyi, yitea yipə jikə geva ta ŋkɛ nya menete ŋkɛ ka shihɛ ŋayɛ, kala nya mene nya ŋkɛ ɓeshi tse.

¹⁹ Ma kezaghəyite Shala Mahwətə ta ŋayɛ yɛ, kelə ŋayɛ yɛ yitea kweci shala, kenza yɛ kave zləvə te hɛ ba'a kagwəɗəŋə kwa kema ta nci ne, dazhɛ dazhɛ geze ŋayɛ 'ya ɓeshi: rayɛ teza sebe te gheyɛ.

²⁰ Kateza sebe te gheyɛ kala kweci mbeli nyi zamte sebe Mahwətə te hɛ mbe kema ta ŋayɛ, va nya ɗema yɛ kese kafa nda ghena ke Shala Mahwətə ta ŋayɛ.