Zhɛne Ghwelə yitea Wəshi Mahalegə 7 - Ghena ta Shala

Ka Israyɛl, mbeli nyi keveyi geva kaŋa Mahwətə

¹ Ma vəa ŋkwa nya tefəghe ŋayɛ Shala Mahwətə ta ŋayɛ kadzete hɛɗi nya tekele nya yɛ ba'a nya teŋkamte kweci hwelefefi mberefaŋe nyi kwele kwele ma ba'a nyi berete berete ma ke gheyɛ ŋkɛ te kema ta ŋayɛ: ka Hɛt, ka Girgash, ka Amor, ka Kanan, ka Pɛrɛs, ka Hava ba'a ka Zhɛbəs,

² vəa ŋkwa nya tefəame hɛ Shala Mahwətə ta ŋayɛ mbe dzeve ta ŋayɛ ba'a nya tehərəte hɛ yɛ ne, kateza sebe te hɛ pɛtɛ. Katemene jikə geva yɛ le hɛ we, katezhɛ heli yɛ yitea hɛ we.

³ Katejikə geva yɛ le hɛ laka wəme geva we, kateve nda ŋwalea kwɛa ŋayɛ yɛ ke ŋwale tezhilia nci, katewəme nda ŋwalea kwɛa nci yɛ ke ŋwale tezhilia ŋayɛ we.

⁴ Ma ketemenete geva ŋkɛ tsagha ne, kateghwete ŋwalea ŋayɛ hɛ kazhɛre ɗa wəmbə yitea hawe va kweci shala. Katehwepe wənəa Mahwətə va gheyɛ ba'a kateza sebe ŋkɛ te gheyɛ taghanyɛ.

⁵ Ama wa nya tsetse temene nda yɛ ke hɛ: kateŋzla yɛ reghwetɛa nci yɛ, katempə yɛ gɛaŋa ta nci yɛ, katetsasle yɛ seləa nci nyi keveyi geva tekeleke yɛ ba'a kateteremte wəshi nyi zhɛrete hɛ kashala yɛ.

⁶ Kwa nza ŋkɛ ne, mbeli nyi keveyi geva tekeleke kaŋa Shala Mahwətə ta ŋayɛ yɛ. Nahe Shala Mahwətə ta ŋayɛ kentave ŋayɛ tekeleke kaŋa ŋkɛ hwa kweci hwelefefi nyi te hɛɗi lema.

Nza ta Mahwətə dɛŋe dɛŋe te jikə geva ta ŋkɛ

⁷ Ma nda ɗehwe ŋayɛ Mahwətə ba'a nda ntave ŋayɛ ŋkɛ ne, va nya nza yɛ kwele ma ke kweci hwelefefi we, kwa nza ŋkɛ ne, gheyɛ ya ɓɛhwɛ ma hwa pɛtɛa hwelefefi.

⁸ Ama va nya ɗe ŋayɛ Mahwətə ba'a nya ɗehwe ŋkɛ kayipə meɗe mɛ nya menete nda ŋkɛ ke ka shihɛ ŋayɛ nda fəakave ŋayɛ Mahwətə laka berete ta ŋkɛ nya kwele kwele. Nahe ŋkɛ kembeɗeke ŋayɛ shave mbe hɛɗi nya se yɛ kaka mavashi ba'a shave mbe dzeve ta Farawon, meghea ka Ɛzhipte.

⁹ Kateɗepe yɛ deke Shala Mahwətə ta ŋayɛ ya kaShala nya kaganda. Kanza ŋkɛ dɛŋe dɛŋe te jikə geva ta ŋkɛ kaka shihɛ slibə laka mbeli nyi keɗe ŋkɛ ba'a nyi kehawe va ghena nyi gezete ŋkɛ.

¹⁰ Ama kaŋa mbeli nyi keɗema ŋkɛ ne, kahe kahe ve nda zhɛme ta nci ŋkɛ ke hɛ. Kaza sebe ŋkɛ te hɛ.

¹¹ Kateya yɛ ghena, wəshi mahalegə ba'a wəshi keshi nyi geze ŋayɛ nyi 'ya ɓeshi yitea mene slene le hɛ.

¹² Ma kenza yɛ kave sleme yitea wəshi keshi nyi, ma kenza yɛ kamene slene le hɛ ba'a kahawe va hɛ, katenza Shala Mahwətə ta ŋayɛ dɛŋe dɛŋe te jikə geva nya menete ŋkɛ le ka shihɛ ŋayɛ.

¹³ Kateɗe ŋayɛ ŋkɛ, katewəpi ŋayɛ ŋkɛ ba'a kateya ŋayɛ ŋkɛ kwele kwele. Kateve ŋayɛ ŋwale ŋkɛ kwele kwele, tsagha ha, tɛ ba'a n'yi. Katembake wəvəsəa sla, timɛti ba'a kwia ŋayɛ ŋkɛ, vəa ŋkwa nya tenza yɛ te hɛɗi nya teve ŋayɛ ŋkɛ, kala nya meɗeyi nda ŋkɛ ke ka shihɛ ŋayɛ.

¹⁴ Kwele ma ke kweci hwelefefi tewəpi ŋayɛ ŋkɛ. Katenza za nya keɗema kaya keɗema male jɛŋa hwa gheyɛ we, ya wəsə keseɗa nya keɗema kaya hwa wəshi keseɗa ta ŋayɛ we.

¹⁵ Kateya ŋayɛ Mahwətə va yayata zereghwe ba'a va ndiremi nyi dzawe dzawe nyi ɗepe nyi yɛ kese kənəa Ɛzhipte. Kateghwene ŋayɛ hɛ ŋkɛ we, ama ke mbeli nyi keɗema ntsə ta ŋayɛ teghwene nda hɛ ŋkɛ.

¹⁶ Rayɛ teza sebe yɛ te pɛtɛa mbeli nyi teve ŋayɛ Shala Mahwətə ta ŋayɛ mbe dzeve ta ŋayɛ. Katehawe yɛ va shala ta nci we, kwa nza ŋkɛ ne, keleŋa tenza ŋkɛ kaŋa ŋayɛ.

Mahwətə ya kande ya mbelia ŋkɛ

¹⁷ Ya kwete ma pe yɛ sha tezəzə: «Kwele ma hwelefefi nyi ke gheɓəmə, tsema nza gheɓəmə kaŋkamte hɛ wa?»

¹⁸ Ghazlənəma yɛ va hɛ ma! Zəzəte mə wəsə nya menete nda Shala Mahwətə ta ŋayɛ ke Farawon ba'a ke Ɛzhipte pɛtɛ.

¹⁹ Nahe yɛ kenakɛ ndiremi nyi jama jama nyi ghweneghe nda ŋkɛ ke hɛ ba'a wəshi nyi dzawe dzawe ba'a wəshi meŋele nyi menete ŋkɛ laka berete ta ŋkɛ nya wəba, vəa ŋkwa nya fəakave ŋayɛ ŋkɛ shave mbe Ɛzhipte. Ma tsetsenya gɛ ne, tsagha temene nda Shala Mahwətə ta ŋayɛ ke pɛtɛa hwelefefi nyi keve ŋayɛ ghazlənə nyi.

²⁰ Kateghwene nda medeŋwete Shala Mahwətə ta ŋayɛ ke hɛ, pa te və nya tezanji sebe te mbeli nyi ketene teghweme ba'a te mbeli nyi kewəfərənji va gheyɛ.

²¹ Bare barema yɛ va mbelia shɛhɛ ma, va nya nza ŋkɛ ne, hwa gheyɛ Shala Mahwətə ta ŋayɛ, Shala nya wəba ba'a nya ghazlənə mbeli ve ŋkɛ.

²² Ɓahwe ɓahwe teza sebe Shala Mahwətə ta ŋayɛ te mbelia shɛhɛ mbe kema ta ŋayɛ. Kateza sebe yɛ te hɛ te ŋkwa shɛnyɛ we. Ma kemenete geva ŋkɛ tsagha ne, kwele kwele tenza wəshi keseɗa nyi hwa gamba nyi keteɗa ŋayɛ.

²³ Ama kateve mbelia shɛhɛ Shala Mahwətə ta ŋayɛ mbe dzeve ta ŋayɛ. Kateve nda ghazlənə ŋkɛ kwele kwele ke hɛ ba'a kateza sebe ŋkɛ te hɛ.

²⁴ Kateve ka meghea nci ŋkɛ kadzembe dzeve ta ŋayɛ, kateza sebe yɛ te sləa nci te hɛɗi. Wəndə shɛ kateghereŋe kwa kema ta ŋayɛ hwa'a te və nya tezamte sebe yɛ te hɛ we.

²⁵ Katetere wəshi nyi zhɛrete hɛ kashala yɛ. Mawema mze kwa tɛawetɛa keɗema mze kwa tere tere nyi fiyi mbeli kənəa hɛ yɛ ma, fəma wəshia shɛhɛ yɛ kaŋa ŋayɛ, yagha hɛ tezhɛre kakeleŋa yitea gheyɛ ma. Kwa nza ŋkɛ ne, wəsə nya ndiremi kashasha ŋkɛ kaŋa Shala Mahwətə ta ŋayɛ.

²⁶ Kelema wəsə nya ndiremi kashasha yɛ kadzeki ghɛa ŋayɛ ma, kwa nza ŋkɛ ne, kateza sebe te gheyɛ kala gheŋkɛ. Kateza sebe yɛ te ba'a katenewe yɛ kala wəsə nya ndiremi kashasha, va nya nza ŋkɛ kawəsə nya kefɛake geva kekwaɗe.