Zhɛne Ghwelə yitea Wəshi Mahalegə 6 - Ghena ta Shala

Nda na kaɗe Shala Mahwətə ta ŋa

¹ Wa nyi ghena, wəshi mahalegə ba'a wəshi keshi nyi gezete ɗa Shala Mahwətə ta ŋayɛ kezha teke ŋayɛ nyi, yitea mene slene yɛ le hɛ te hɛɗi nya tekele nya yɛ kaŋa ŋayɛ.

² Ma tsagha mbe nza ta ŋayɛ ne, katehawe yɛ va Shala Mahwətə ta ŋayɛ, gheyɛ, ŋwalea ŋayɛ ba'a ŋwalea ŋwalea ŋayɛ. Laka hawe va wəshi mahalegə ba'a ghena nyi gezete ŋayɛ nyi 'ya ne, katetemə yɛ teghweme.

³ Ka Israyɛl, fa mə ghena nyi ba'a mene mə slene le hɛ. Ma tsagha ne, katenza yɛ mbe zeɗe nza ba'a kateya yɛ kala repanja te hɛɗi nya hwɛ nya yɛ ŋ'wa le yɛməa mze, kala nya meɗeyi ŋayɛ Shala Mahwətə ta ka shihɛ ŋayɛ.

⁴ Fa, hwelefe ta Israyɛl, deke Shala Mahwətə ta ɓəmə ya kaMahwətə.

⁵ Ɗe Shala Mahwətə ta ŋa le wənəa ŋa pɛtɛ, mehele ta ŋa pɛtɛ ba'a berete ta ŋa pɛtɛ.

⁶ Ma ghena nyi geze ŋa nyi 'ya ɓeshi ne, katenza hɛ mbe mehele ta ŋa.

⁷ Kateteke nda hɛ na ke ŋwalea ŋa. Kategeze nda hɛ na ke hɛ vəa ŋkwa nya tenza na ki ghɛa ŋa, vəa ŋkwa nya tedzeghwa na kwa hweŋkwa, vəa ŋkwa nya teɓelahe na ba'a vəa ŋkwa nya tesate na te ŋkwa.

⁸ Kezha ɗema kazaghəyite hɛ ne, katehwepe hɛ na kwa dzeve ta ŋa ba'a mɛa kema ta ŋa.

⁹ Katerafe hɛ na dzeme vare yɛ sheghwəa gelembe nya mɛa ghɛa ŋa ba'a dzeyi kənəa ŋkwa nyi kedzembe yɛ meleme ta ŋa.

Katezaghə Shala ta ŋkɛ hwelefe ta Israyɛl we

¹⁰ Ma vəa ŋkwa nya tefəghe ŋayɛ Shala Mahwətə ta ŋayɛ kadzete hɛɗi nya ve ŋayɛ ŋkɛ, kala nya meɗeyi nda ŋkɛ ke ka shihɛ ŋayɛ Abraham, Izak ba'a Zhakob ne, katesləyi meleme nyi jama jama ba'a nyi ndeɗe ndeɗe nyi ɗema yɛ keŋate,

¹¹ ghɛ nyi mpɛafe mpɛafe va mama ta mcɛlə nyi tsenetema yɛ, belageji nyi latema yɛ, yɛ rɛzɛŋe ba'a bekele nyi mɓetema yɛ gheyɛ. Ma vəa ŋkwa tezehwe wəshi kezeme yɛ behe behe gɛ ne,

¹² ya mə ghəa ŋayɛ megela va zaghə Mahwətə nya kefəakave ŋayɛ mbe hɛɗia Ɛzhipte nya se yɛ kaka mavashi.

¹³ Deke Shala Mahwətə ta ŋayɛ yatehawe yɛ ve, gheŋkɛ yategwəɗəŋə yɛ kwa kema ta ŋkɛ ba'a yatezeme fela yɛ te sləa ŋkɛ.

¹⁴ Katezele kweci shala, yɛ shala ta kweci hwelefefi nyi dzeyi yitea gheyɛ yɛ we.

¹⁵ Kwa nza ŋkɛ ma Shala Mahwətə ta ŋayɛ nya hwa gheyɛ nya ne, Shala nya kezlɛ ŋkɛ. Ya mə ghəa ŋayɛ va hwepe nda wənə Shala Mahwətə ta ŋayɛ, yagha ŋkɛ tezamte sebe te gheyɛ te hɛɗi lema.

¹⁶ Katedzeghe Shala Mahwətə ta ŋayɛ yɛ kala nya menete yɛ mbe Masa we.

¹⁷ Kateya yɛ ghena, wəshi keshi ba'a wəshi mahalegəa Shala Mahwətə ta ŋayɛ nyi gezete ŋayɛ ŋkɛ yɛ.

¹⁸ Katemene wəshi nyi tiɗiɗi ba'a nyi zeɗehwe nda ke Mahwətə yɛ. Ma tsagha ne, katenza yɛ mbe zeɗe nza ba'a katekele hɛɗi nya ganyɛ nya meɗeyi nda nya Mahwətə ke ka shihɛ ŋayɛ yɛ.

¹⁹ Kateŋkamte ka ghema ta ŋayɛ yɛ cakeɗake kala nya gezete Mahwətə.

²⁰ Ma te'yɛwe ŋwalea ŋayɛ va gheyɛ te kwete hɛ: «Kezha wa ndeke ŋayɛ ghena nyi, wəshi mahalegə nyi ba'a wəshi keshi nyi Shala Mahwətə ta ɓəmə wa?»

²¹ Ma pe yɛ sha tezhɛne nda ke hɛ: «Kaka mavashia Farawon se n'yɛ mbe Ɛzhipte, nda fəakave n'yɛ Mahwətə shave mbe le berete ta ŋkɛ nya wəba.

²² Nahe Mahwətə kemenete wəshi kencɛ wəshi ba'a wəshi meŋele nyi jama jama kwa ntsə ta n'yɛ kezha ve ndiremi te Ɛzhipte, te Farawon ba'a te mbelia ŋkɛ pɛtɛ.

²³ Ama ghen'yɛ ne, pa fəakave n'yɛ mbe kezha fə n'yɛ kadzete hɛɗi nya ɗe ŋkɛ kave n'yɛ, kala nya meɗeyi nda ŋkɛ ke ka shihɛ n'yɛ.

²⁴ Nahe Mahwətə kegezave n'yɛ kamene slene le wəshi mahalegə nyi ba'a kahawe va Shala Mahwətə ta n'yɛ, kezha nza ghen'yɛ keveci keveci mbe zeɗe nza ba'a kezha ya mpia n'yɛ ŋkɛ kala nya nza nya ghen'yɛ ɓeshi tse.

²⁵ Tiɗiɗi tenza ghen'yɛ kemenete slene ghen'yɛ le pɛtɛa ghena nyi kwa kema ta Shala Mahwətə ta ɓəmə kala nya gezave n'yɛ ŋkɛ.»