Zhɛne Ghwelə yitea Wəshi Mahalegə 5 - Ghena ta Shala

Wəshi mahalegə meŋe

¹ Pa Moyize tsenete ka Israyɛl pɛtɛ, ma ke sha hɛ: «Ka Israyɛl, fa mə wəshi mahalegə ba'a wəshi keshi nyi geze ŋayɛ nyi 'ya ɓeshi. Tekeve mə hɛ ba'a mene mə slene le hɛ.

² Nahe Shala Mahwətə ta ɓəmə kemenete jikə geva le gheɓəmə pelɛ ghweme ta Horɛb.

³ Deke le ka shihɛ ɓəmə menete jikə geva shɛ ŋkɛ we, ama le gheɓəmə nyi teghweme pɛtɛ teke ɓeshi.

⁴ Nahe Mahwətə kegezete ŋayɛ ghena kwa ntsə kwa ntsə pelɛ ghəa ghweme shave mbe tepe ta ghwə.

⁵ Ma vəa ŋkwa shɛ ne, nahe 'ya keghereŋe ɗa kwelɛ gheyɛ le Mahwətə, kezha geze ŋayɛ ghena ta Mahwətə, kwa nza ŋkɛ nahe ghazlənə kezhɛte ŋayɛ kwa kema ta ghwəa shɛ ba'a kese yɛ kaɗe kadzeme ghwemea shɛ we.» Ma ke Mahwətə:

⁶ «'Ya ya kaMahwətə Shala ta ŋa nya kekelakave ŋa shave mbe Ɛzhipte nya se na kamava mbe.

⁷ Gwəɗəŋəma na kwa kema ta kweci shala keɗema 'ya kwetɛŋe ɗa ma.

⁸ Mene nda ma kwete shala na ke ghəa ŋa, ya pa ta wəshi nyi pelɛ ghweme, te hɛɗi keɗema kwa yɛmə nya mbe hɛɗi ma.

⁹ Gwəɗəŋəma na kwa kema ta pa ta wəshia shɛhɛ ma, hawema na va hɛ ma. Kwa nza ŋkɛ ne, 'ya ya kaMahwətə Shala ta ŋa, Shala nya kezlɛ. Ma kebezemte ɗa ghena wəndə ne, kateme 'ya te wəndəa shɛ, te ŋwalea ŋkɛ, hwa'a te kwa maheke keɗema kwa wəfaɗe ta hwelefe.

¹⁰ Ama kamene nda ganyɛ 'ya ke mbeli nyi keɗe ɗa ba'a nyi kehawe va wəshi mahalegəa ɗa hwa'a te ka shihɛ slibə.

¹¹ Hekɛmema sləa ɗa, 'ya Shala Mahwətə ta ŋa na gəmə ma, kwa nza ŋkɛ kande beze ghena ve wəndə nya kala nyagha 'ya, 'ya Mahwətə.

¹² Zaghəyitema ve ɗa veci kezhɛne mpi na tekeleke, kala nya gezave ŋa 'ya, 'ya Shala Mahwətə ta ŋa ma.

¹³ Hɛ ŋkwaŋe temene na kamene slene nyi va gha,

¹⁴ ama kwa mberefaŋe ta hɛ ne, gheŋkɛ ya kaveci kezhɛne mpi nya keveyi ɗa geva tekeleke, 'ya Mahwətə Shala ta ŋa. Menema slene na te vecia shɛ, ya gha, ya wəzege teza ta ŋa, ya wəzha ta ŋa, ya nde mene slene ta ŋa, ya kwatera ta ŋa, ya sla ta ŋa, ya kwara ta ŋa, ya kwete hwa wəshi keseɗa ta ŋa, ya nde se se nya ki ghɛa ŋa ma. Ma tsagha ŋkɛ ne, katezhɛne mpi mava ba'a kwatera ta ŋa kala gha.

¹⁵ Zəzəte kamava se na te hɛɗia Ɛzhipte, nda kelakave ŋa 'ya, 'ya Mahwətə Shala ta ŋa mbe laka berete ta ɗa nya wəba. Vatse gezave ŋa 'ya Shala Mahwətə ta ŋa kezha hawe na va veci kezhɛne mpi.

¹⁶ Hawe va yɛ yiteyɛ ŋa le meyɛ ŋa, kala nya gezave ŋa 'ya Shala Mahwətə ta ŋa, yitea jive hɛa ŋa biyake ba'a yitea nza na mbe zeɗe nza te hɛɗi nya ve ŋa 'ya, 'ya Shala Mahwətə ta ŋa.

¹⁷ Peslema wəndə na ma.

¹⁸ Valema na tahe ma.

¹⁹ Ghərəma na ma.

²⁰ Negha nda ma fete tseŋwə na ke nde ghedəkwəa ŋa ma.

²¹ Slama ntsə na yitea male ta nde ghedəkwəa ŋa ma. Slama ntsə na yitea ghɛa nde ghedəkwəa ŋa, ya wəvea ŋkɛ, ya nde mene slene ta ŋkɛ, ya kwatera ta ŋkɛ, ya sla ta ŋkɛ, ya kwara ta ŋkɛ, ya yayata wəsə nya va nde ghedəkwəa ŋa ma.»

²² Nyi ya kawəshi mahalegə nyi gezete ŋayɛ Mahwətə le berete shave mbe tepe ta ghwə, n'yi ba'a ləmbə nya diŋwədi. Nahe ŋkɛ kegezete ŋayɛ ghena, gheyɛ nyi kese rəkwə yitea ghweme, kese ŋkɛ kamtsehe kweci ghena kadzeyite we. Kwa sebe ta ŋkɛ, pa rafete ghena shɛhɛ te pelɛ nyi slapesla slapesla bake nyi fəave ɗa ŋkɛ.

Moyize ya kande geze nda ghena ta Shala ke mbeli

²³ Ma kwa fate ŋwələ yɛ shave mbe ŋkwesle pelɛ ghweme nya kaghwə ne, nahe mbeli nyi te ghə ba'a mbelia jama ta ŋayɛ pɛtɛ kehendeke ɗa geva.

²⁴ Ma ke hɛ sha 'ya: «Nahe Shala Mahwətə ta ɓəmə kencɛte n'yɛ zləvəa ŋkɛ ba'a kwelea ŋkɛ. Nahe n'yɛ kefate ŋwələa ŋkɛ shave mbe tepe ta ghwə. Ma ɓeshi ne, nahe n'yɛ kenakɛ wərə Shala kageze nda ghena ke wəndə ŋelɛ kanza ŋkɛ teghweme.

²⁵ Ama tsetsenya ne, wa raberə nda mpə n'yɛ va ghwə nya wəba nya wa? Ma kezhɛne n'yɛ kafate ŋwələa Mahwətə Shala ta ɓəmə ne, kaganda tempə n'yɛ.

²⁶ Nahe wəndə ŋelɛ kegha kafate ŋwələa Shala nya teghweme kala ghen'yɛ kanzanyɛ ŋkɛ teghweme na?

²⁷ Ma gha gɛ Moyize, hendave nda geva ke Shala Mahwətə ta ɓəmə shɛ na fate ghena nyi geze ŋkɛ. Ma kwa sebe ta ŋkɛ ne, kateɓela n'yɛ hɛ na, katefa hɛ n'yɛ ba'a katemene slene n'yɛ le hɛ.»

²⁸ Nahe Mahwətə kefate ghena nyi gezete ɗa yɛ, ma ke Mahwətə sha 'ya: «Nahe 'ya kefate ghena nyi gezete ŋa mbeli nyi. Kaganda nci gezete hɛ tsagha.

²⁹ Kamawe 'ya kezha hawe wənəa nci keveci keveci va 'ya ba'a kezha mene slene hɛ le wəshi mahalegəa ɗa. Ma tsagha ne, kaghala ghala tenza hɛ mbe zeɗe nza zlaɓe le ŋwalea nci.

³⁰ Kwiɗi tsetsenya, ma pa sha hɛ: ‹Zhɛne mə geva kadzembe cɛ lekwesa ta ŋayɛ.›

³¹ Ama gha ne, nza ŋa teke yitea 'ya. 'Ya kategeze ŋa ghena, wəshi mahalegə ba'a wəshi keshi nyi teteke nda na ke hɛ kezha mene slene hɛ le hɛ te hɛɗi nya teve nda 'ya kaŋa nci ke hɛ.»

³² Ma ke Moyize sha ka Israyɛl ɓiyitsa: «Ntsə mə geva kamene slene le ghena nyi gezave ŋayɛ Shala Mahwətə ta ŋayɛ. Mba yɛ kesərəakɛ kajive laka bela kwa zeme keɗema laka bela kwa gwela.

³³ Dzeghwa mə tiɗiɗi kwa hweŋkwa nya ncɛte ŋayɛ Shala Mahwətə ta ŋayɛ. Ma tsagha ne, teghweme tenza yɛ, katenza yɛ mbe zeɗe nza ba'a katetemə yɛ kwele kwele te hɛɗi nya tekele yɛ kaŋa ŋayɛ.»