Zhɛne Ghwelə yitea Wəshi Mahalegə 4 - Ghena ta Shala

Mene slene le wəshi mahalegəa Shala

¹ Ma tsetsenya gɛ ka Israyɛl, fate mə wəshi mahalegə ba'a wəshi nyi teke ŋayɛ 'ya kezha mene slene yɛ le hɛ. Ma tsagha ne, katenza yɛ teghweme ba'a katekele hɛɗi nya ve ŋayɛ Mahwətə, Shala ta ka shihɛ ŋayɛ yɛ.

² Mtsehema kwete yɛ yitea ghena nyi geze ŋayɛ nyi 'ya ma, ntamtema kwete yɛ shave hwe ma. Ama mene mə slene le ghena ta Shala Mahwətə ta ŋayɛ nyi geze ŋayɛ nyi 'ya.

³ Nahe yɛ kenakɛ tsema tsema menete Mahwətə mbe ghena ta shala Ba'al-Pɛyor le ntsə ta ŋayɛ. Rayɛ Shala Mahwətə ta ŋayɛ zamte sebe te mbelia ŋayɛ nyi kese ŋkɛ kahawe va shala shɛ.

⁴ Ama gheyɛ mbeli nyi kese dɛŋe dɛŋe te Shala Mahwətə ta ŋayɛ ne, mba yɛ pɛtɛ teghweme ɓeshi.

⁵ Newema mə, wəshi mahalegə ba'a wəshi keshi yateke ŋayɛ 'ya kala nya gezave ɗa Shala Mahwətə ta ɗa, kezha mene slene yɛ le hɛ vəa ŋkwa nya tenza yɛ te hɛɗi nya tedzete yɛ kakele kaŋa ŋayɛ.

⁶ Ma kemenete slene yɛ le hɛ ba'a kehawete nda hawe yɛ ke hɛ ne, kaka ntsehwele ntsehwele ba'a kaka ɗepe wəshi tenewe ŋayɛ kweci hwelefefi. Kwa nza ŋkɛ ma vəa ŋkwa nya tefave wəshi mahalegəa shɛhɛ ne, ma ke hɛ sha tegeze: «Wa nya ntsehwele ba'a wa nya ɗepe wəsə va mbeli nyi kwele kwele nyi gɛ!»

⁷ Kwa nza ŋkɛ ne, wa hwelefe nya wəba nya nza yɛ shala ta ŋkɛ terasle yite kala nya mene Shala Mahwətə ta ɓəmə te yayata və nya heka ŋkɛ gheɓəmə wa?

⁸ Wa hwelefe nya wəba nya nza wəshi mahalegə ba'a wəshi keshi nyi tiɗiɗi ve kala wəsə mahalegə nya ve nya 'ya kwa kema ta ŋayɛ ɓeshi wa?

Shala ncɛte ghəa ŋkɛ pelɛ ghweme ta Horɛb

⁹ Ama ntsehwele mə megela, ya mə ghəa ŋayɛ megela va zaghə wəshi nyi nakɛ nyi yɛ le ntsə ta ŋayɛ. Ma mbe pɛtɛa hɛa ŋayɛ teghweme ne, shavema hɛ mbe mehele ta ŋayɛ ma. Ama ɓela nda mə hɛ ke ŋwalea ŋayɛ ba'a ke ka hwelefefia ŋayɛ.

¹⁰ Ma te veci nya se yɛ meslete pelɛ Horɛb mbe kema ta Shala Mahwətə ta ŋayɛ ne, ma ke Mahwətə sha 'ya: «Tsenete mbeli pɛtɛ shɛ 'ya tegeze nda ghena ta ɗa ke hɛ, kezha teke hɛ kahawe va 'ya kala nza ta hɛa nci te hɛɗi ba'a kezha teke nda hɛ ke ŋwalea nci.»

¹¹ Ma te vecia shɛ ne, nahe yɛ kehendeke geva ba'a keghereŋe ŋayɛ yitea ghweme. Ghwə nde tse shave mbe ghwemea shɛ kadzeme pa pelɛ ghweme, te tepe ta n'yi nya ɗɛkeɗɛ ba'a ləmbə nya diŋwədi.

¹² Pa Mahwətə gezete ŋayɛ ghena shave mbe tepe ta ghwə. Nahe yɛ kefate ghena kageze geva, ama kenakɛ ŋkɛ yɛ we. Deke ŋwələa ŋkɛ yafate yɛ.

¹³ Nahe kencɛte ŋayɛ jikə geva nya menete ŋkɛ le gheyɛ. Nahe kegezete ŋayɛ kamene slene le laka hawe va wəshi mahalegə meŋe nyi rafete ŋkɛ te pelɛ nyi slapesla slapesla bake.

¹⁴ Ma kaŋa ɗa ne, nahe Mahwətə kegezave ɗa kezha teke ŋayɛ wəshi mahalegə ba'a wəshi keshi nyi temene slene yɛ le hɛ te hɛɗi nya tekele yɛ kaŋa ŋayɛ.

Ya ghə va wəshi nyi zhɛrete mbeli kashala

¹⁵ Ntsehwele mə yitea ghəa ŋayɛ megela: pa ta wəndə shɛ kenakɛ yɛ te veci nya gezete ŋayɛ ghena Mahwətə shave mbe tepe ta ghwə pelɛ ghweme ta Horɛb we.

¹⁶ Mba yɛ kebeze ghəa ŋayɛ laka mene wəshi nyi zhɛre yɛ kashala, ya pa ta wəshi nyi keve geva kashala, ya pa ta za keɗema ŋa male,

¹⁷ ya ŋa wəshi keseɗa nyi te hɛɗi, ya ŋa 'yɛ nyi yitea ghweme,

¹⁸ ya ŋa wəshi nyi kentsehe geva dzate te hɛɗi keɗema ŋa kelepe nyi kwa yɛmə.

¹⁹ Ma vəa ŋkwa nya newe veci, tere, yɛ saseregwa keɗema pɛtɛa wəshi nyi pelɛ ghweme yɛ ne, pelema ghəa ŋayɛ yɛ kagwəɗəŋə kwa kema ta nci ba'a kamene nda slene ke hɛ ma. Kwa nza nde kaŋa kweci hwelefefi nyi te hɛɗi veyi mene wəshi nyi kala nyighɛ Shala Mahwətə ta ŋayɛ.

²⁰ Ama gheyɛ ne, nahe Mahwətə kelə kazele ŋayɛ ba'a kefəakave ŋayɛ shave mbe yaka nyi dzawe mbe Ɛzhipte kezha nza yɛ kambelia ŋkɛ, kala nya nza nya yɛ ɓeshi tse.

²¹ Nahe Mahwətə kehwepete ɗa wənə tewəmbəreke gheyɛ, nahe ŋkɛ kezemete fela kaɗema 'ya katejive te Zhəwrdɛŋe ba'a kaɗema 'ya katedzete hɛɗi ganyɛ nya teve ŋayɛ nya Shala Mahwətə ta ŋayɛ kaŋa ŋayɛ.

²² Kwa nza ŋkɛ ne, teke te hɛɗi nya temte 'ya, katejive 'ya te Zhəwrdɛŋe we. Ama gheyɛ ne, katejive yɛ te kezha kele hɛɗi ganyɛa shɛ.

²³ Ntsehwele mə megela, yagha yɛ kazaghəyite jikə geva nya menete Shala Mahwətə ta ŋayɛ le gheyɛ. Menema wəshi nyi zhɛre mbeli kashala, ya pa ta yayata wəsə nya fɛake ŋayɛ Shala Mahwətə ta ŋayɛ kemene yɛ ma.

²⁴ Kwa nza ŋkɛ ne, ghwə nya ketere ŋkwa Shala Mahwətə ta ŋayɛ, Shala nya kezlɛ ŋkɛ.

²⁵ Ma vəa ŋkwa nya teteməhwe temə yɛ kwele kwele te hɛɗi nya kemeɗeyi geva ba'a nya teŋ'wete ŋwale ba'a ka shihɛ yɛ ne, bezema ghəa ŋayɛ yɛ laka mene wəshi nyi zhɛre mbeli kashala, pa ta wəshi nyi keveyi geva tekeleke yɛ ma. Menema wəsə kwa ndiremi nya kebeze nda wənə yɛ ke Shala Mahwətə ta ŋayɛ ma.

²⁶ Ma kemenete geva ŋkɛ tsagha ne, yɛ ghweme le hɛɗi ka tenza kaka negha fete ta ɗa ɓeshi: kahe kahe teza sebe te gheyɛ te hɛɗi nya tekele nya yɛ pelɛ kema ta Zhəwrdɛŋe. Katetemə yɛ kwele kwele te we, kwa nza ŋkɛ pɛtɛ tempə yɛ.

²⁷ Katetaze ŋayɛ Mahwətə dzeyi hwa kweci hwelefefi. Kambeli ɓɛhwɛ tetene yɛ te hɛɗi nyi tefəghe ŋayɛ Mahwətə kadzete.

²⁸ Ma pelɛagha ne, katehawe yɛ va shala nyi menete mbeli yitea sheghwə keɗema pelɛ. Ma shala shɛhɛ ne, kanakɛ ŋkwa hɛ we, kafa ghena hɛ we, kazeme wəshi kezeme hɛ we, kafa zəŋwəa wəsə hɛ we.

²⁹ Ma pelɛ hɛɗia shɛhɛ ne, katezele Shala Mahwətə ta ŋayɛ yɛ. Ma kenza yɛ kazele ŋkɛ le wənəa ŋayɛ pɛtɛ ba'a le mehele ta ŋayɛ pɛtɛ ne, katesləyi ŋkɛ yɛ.

³⁰ Ma vəa ŋkwa nya tenza yɛ mbe yaka, te və nya tesave ŋayɛ se ghena nyi te kwete hɛ ne, katezhɛne geva yɛ kase sha Shala Mahwətə ta ŋayɛ ba'a katefa nda ghena yɛ.

³¹ Kwa nza ŋkɛ ma Shala Mahwətə ta ŋayɛ ne, Shala nya kezhɛ heli ŋkɛ, katesərə ŋayɛ ŋkɛ we, kateza sebe ŋkɛ te gheyɛ we, katezaghə jikə geva nya menete ŋkɛ le ka shihɛ ŋayɛ ŋkɛ we.

Nahe Shala kentave ka Israyɛl

³² Zəzəte mə wəshi nyi kemenete geva vəashi, nyi kemenete geva mpelɛa ma ke gheyɛ, se te və nya pate wəndə ŋelɛ Shala te hɛɗi. Zəzəte mə wəshi nyi kemenete geva se te kwete seɗa ta ghweme hwa'a te kwete. Nahe wəsə meŋele nya kala nya kegha kamenete geva na? Nahe mbeli kegha kafate mbeli kageze ghena te wəsə nya kala nya na?

³³ Nahe kwete hwelefe kegha kafate shala kageze nda ghena shave mbe tepe ta ghwə ba'a kanzanyɛ teghweme, kala nya kemenete ŋayɛ geva nya na?

³⁴ Na, nahe kwete shala kegha kase kanta nda mbeli ke ghəa ŋkɛ shave hwa kweci mbeli na? Ewə, ama nahe Shala Mahwətə ta ŋayɛ kemenete kezha gheyɛ kwa ntsə ta ŋayɛ. Vatse ghweneghe nda yaka nyi dzawe dzawe ŋkɛ Ɛzhipte, pa ŋkɛ menete ŋayɛ wəshi meŋele ba'a wəshi nyi kesla heli hwa mbeli, slene nyi berete berete ba'a nyi ghazlənə mbeli ve.

³⁵ Nahe yɛ kenakɛ pɛtɛa wəshia shɛhɛ tiɗiɗi, yitea ɗepe yɛ deke Mahwətə ya kaShala, kwete shala shɛ kala gheŋkɛ we.

³⁶ Sawa pelɛ ghweme ne, nahe ŋkɛ kegezakawa ŋayɛ ghena kezha teke ŋayɛ ntsehwele. Te hɛɗi ne, nahe ŋkɛ kencɛte ŋayɛ ghwə nya wəba ba'a nahe yɛ kefate ghena ta ŋkɛ shave mbe tepe ta ghwə.

³⁷ Ma va nya ɗehwe ka shihɛ ŋayɛ ŋkɛ ba'a va nya ntave ŋayɛ ŋkɛ, gheyɛ hwelefefia nci ne, nahe ŋkɛ kefəakave ŋayɛ shave mbe Ɛzhipte le ghəa ŋkɛ laka berete ta ŋkɛ nya wəba.

³⁸ Ma tsetsenya ne, kateŋka kweci hwelefefi nyi kenza kwele ma ba'a berete ma ke gheyɛ ŋkɛ te kema ta ŋayɛ. Katefə ŋayɛ ŋkɛ kadzete hɛɗia nci kezha ve ŋayɛ kaŋa ŋayɛ.

³⁹ Ɗepete mə ɓeshi ba'a veyi mə kaganda nya kwa wənəa ŋayɛ: Mahwətə ya kaShala pelɛ ghweme ba'a kwake te hɛɗi, kwete shala shɛ we.

⁴⁰ Hawe mə va wəshi mahalegəa ŋkɛ ba'a va ghena nyi gezeke ŋkɛ, nyi geze ŋayɛ nyi 'ya ɓeshi. Ma tsagha ne, mbe zeɗe nza tenza gheyɛ le ŋwalea ŋayɛ. Katetemə yɛ kwele kwele te hɛɗi nya ve ŋayɛ Shala Mahwətə ta ŋayɛ kaghala ghala.

Moyize kanta meleme kewəfərə mahekene

⁴¹ Tsagha gɛ ne, pa Moyize ntave meleme mahekene laka ŋkwa kesame ta veci yitea Zhəwrdɛŋe

⁴² kameleme kewəfərə. Ma vəa ŋkwa nya peslekɛ ŋkwa wəndə kaɗema le ɗe ta ŋkɛ ba'a kaɗema ghema kwelɛ hɛ ghalanza ne, wərə ŋkɛ kawəfərənyɛ mbe kwete hwa meleme shɛhɛ. Ma tsagha ne, pələsə tenza mpia ŋkɛ.

⁴³ Ma melemea shɛhɛ ne, Bɛsɛr nya pelɛ wəmbə nya te ɓerama kaŋa hwelefefia Rəbɛn, Ramot nya mbe Gala'ad kaŋa hwelefefia Gad ba'a Golan nya mbe Bashan kaŋa hwelefefia Manasɛ.

KWA BAKE TA GHENA TA MOYIZE 4.44–11.32

⁴⁴ Nya ya kawəsə mahalegə nya gezete nda Moyize ke ka Israyɛl.

⁴⁵ Ma kwa sebe ta shave ta nci mbe Ɛzhipte ne, pa ncɛmte nda wəshi nyi kehi, wəshi mahalegə ba'a wəshi keshi ke hɛ.

⁴⁶ Ma vəa ŋkwa shɛ ne, laka ŋkwa kesame ta veci hɛ yitea hələa Zhəwrdɛŋe, kwa zlərə nya mbe kema ta Bɛt-Pɛyor, te hɛɗia Sihon, meghea ka Amor nya kese mbe Hɛshebon. Nahe yɛ Moyize le ka Israyɛl keɗate ŋkɛ kwa shave hɛ mbe Ɛzhipte.

⁴⁷ Pa hɛ kelehwe hɛɗia ŋkɛ ba'a hɛɗia Og, meghea ka Bashan. Ma ka meghea ka Amor nyi bake nyi ne, laka ŋkwa kesame ta veci se hɛ yitea Zhəwrdɛŋe.

⁴⁸ Tsagha gɛ, pa ka Israyɛl kelehwe ŋkwa nya keslə mbe Arowɛr nya mɛa hələa Arnon hwa'a pelɛ ghweme ta Hɛrmon nya heka mbeli kaSiyon.

⁴⁹ Mbe hɛɗia shɛ zlərə nya laka ŋkwa kesame ta veci yitea Zhəwrdɛŋe, hwa'a mɛa ndərə kwa Ghwənəghwə nya yitea ghweme ta Pisga.