Zhɛne Ghwelə yitea Wəshi Mahalegə 32 - Ghena ta Shala1 Ghweme, ve sleme yitea ghena nyi tegeze 'ya, hɛɗi, fa ghena nyi ketesame kwa mɛa ɗa. 2 Me geva ghena ta ɗa kala va ganyɛ kənəa wəshi nyi te wəve, ncɛhwɛaɓɛ ŋkwa wəshi nyi teke nda 'ya ke mbeli kala mɛnɛ nyi dzeyi te gwəzə. 3 Katetsahe sləa Mahwətə 'ya. Ka Israyɛl, ɗepete mə wəbake Shala ta ɓəmə! 4 Gheŋkɛ ya kakeleɓa, megela wəshi nyi mene ŋkɛ pɛtɛ, ganyɛke wəshi nyi zəzə ŋkɛ pɛtɛ. Shala nya dɛŋe dɛŋe te ghena ŋkɛ, kamene wəsə kwa ndiremi ŋkɛ tɛape we, keveci keveci nza ŋkɛ tiɗiɗi ba'a le kaganda. 5 Ama gheyɛ mbeli nyi ndiremia mehele ba'a nyi kebeze beze ne, nahe yɛ kebezemte nda ghena ke Shala. Ma va 'yaghwa mehele ta ŋayɛ ne, mba yɛ kaŋwalea ŋkɛ we. 6 Ka gezhia kɛfi ba'a ka dewə ntsehwele, tsetse hi yɛ kamene nda ke Mahwətə na? Ashɛ gheŋkɛ ya kayiteyɛ ŋayɛ, kande pate ŋayɛ, kande veyi ŋayɛ kambelia ŋkɛ wəka? 7 Zəzəte mə hɛ nyi vəashi, zəzəte mə nyi kekiɗinji, kevə kevə. 'Yɛwe mə ghena va mbeli nyi keyake ŋayɛ ba'a va ka meha mehɛɗi, kateɓela ŋayɛ wəshi nyi kemenete geva hɛ. 8 Ma vəa ŋkwa nya nehemte nda hɛɗi Shala tehwə ghweme ke hwelefefi nyi te hɛɗi lema ne, nahe ŋkɛ keveyi yɛ ghala kwelɛ yɛ hɛɗi kala nza ta ŋwalea Israyɛl. 9 Ama nahe Mahwətə kenta nda hwelefe ta Israyɛl ke ghəa ŋkɛ, nahe ŋkɛ keyate hwelefefia Zhakob. 10 Nahe ŋkɛ kebegeme le mbelia ŋkɛ te ɓerama, te tepe ta yɛ mbɛhwe ta yɛ kelɛ gamba. Nahe ŋkɛ kenewete ghweme te hɛ, nahe ŋkɛ ketekave nda wəshi ke hɛ, nahe ŋkɛ keyate hɛ kala velɛa ntsə ta ŋkɛ. 11 Nahe ŋkɛ kenza kala zele nya keteke nda zlə ke ŋwalea ŋkɛ: kagavele nde kənəa ghɛa ŋkɛ, kapele bidzə ŋkɛ fate fate kənəa hɛ ba'a katawe hɛ ŋkɛ kenza hɛ kateɗe. 12 Deke Mahwətə nde begheghe mbelia ŋkɛ, kaɗema kwete shala shɛ kekemanakɛ. 13 Nahe ŋkɛ keveyi hɛ pelɛ wəmbə kezha zeme wəshi nyi kese te wəve hɛ. Kezha hɛ ne, nahe ŋkɛ kehwɛke yɛməa mze sawa mbe keleɓa ba'a nahe ŋkɛ kepesete yɛ bekele dzeyi hwa yɛ gela. 14 Kampa ŋ'wa hɛ yitea yɛ sla ba'a timɛti, kahene zhɛgwəa lɛməa timɛti, gamea lɛmə nyi dɛɓedɛa dɛɓedɛa ba'a zhɛfa lɛmə hɛ kezha zeme. Kazeme ha ganyɛ hɛ ba'a kasa tɛa rɛzɛŋea nci hɛ. 15 Pa Israyɛl zehwe wəsə kezeme ba'a behenyɛ. Ma kwa tsa geva ta ŋkɛ, kwa la hwə ŋkɛ ba'a kwa ŋsle welɛ ŋkɛ ne, pa wəfəyite Shala nya kepate ŋkɛ. Pa ŋkɛ kelemte zləvə te nde ya ŋkɛ ba'a te nde mbele ŋkɛ. 16 Pa ka Israyɛl mtseke hwepe wənəa Mahwətə laka mene wəshi nyi ndiremi ndiremi kashasha, pa hɛ ndeke nda mene zlɛ laka hawe nya hawe hɛ va kweci shala. 17 Kadzeghe nda melɛ hɛ ke wəshi nyi keɗema kaShala, ke shala nyi ghama hɛ kaɗepe. Wəshi kwatenca wəshia shɛhɛ, pa le ka shihɛ nci kaɗema keɗepe hɛ. 18 Ka Israyɛl, nahe yɛ kepeleyite se yitea nde ya ŋayɛ nya keyake ŋayɛ, nahe yɛ kezaghəyite Shala nya kendeke ŋayɛ mpi. 19 Ma kwa nakɛ Mahwətə tsema tsema yiɗə ŋkɛ ŋwale tezhili ba'a ŋwalea kwɛa ŋkɛ ne, pa ɗema ɓela hɛ. 20 Tagha gɛ, ma ke: 'Ya katezhɛre nda wəmbə ke hɛ, nda tenewe 'ya tsema tsema tenza nza ta nci. Kaganda nza hɛ kaka ndiremia mehele, kaŋwale nyi ɗema mbeli kavate ghə te hɛ. 21 Nahe hɛ kendeke ɗa mene zlɛ laka yɛ shala tseŋwəa nci, nahe hɛ kemtsehete ɗa hwepe wənəa ɗa laka wəshi nyi zhɛrete hɛ kashala. Yawa, ma 'ya gɛ ne, 'ya kateve nda zlɛ ke hɛ laka newe ghweme te hwelefe nya keɗema kahwelefe ganyɛ, 'ya katebeze nda wənə ke hɛ le hwelefe nya dewə ntsehwele. 22 Kwa nza ŋkɛ ne, kala ghwə tse hwepe ta wənəa ɗa, pa kwa zeweve ta ghɛa mbelia kwahɛɗi dzawa ŋkɛ. Katere hɛɗi ba'a wəshi nyi te ŋkɛ pɛtɛ, katere yɛ shihəa yɛ ghweme ŋkɛ. 23 'Ya kateghwene yɛ ndiremi kadzeghəa hɛ, 'ya katehe yɛ have ta ɗa kadzehwa hɛ. 24 Ma vəa ŋkwa nya tedenenji hɛ va ma, nya tempəmte hɛ ɗawa ba'a kweci zereghwe ne, kateghwene nda wəshi keseɗa nyi hwa gamba ba'a shishi nyi ghyana ghyana 'ya ke hɛ. 25 Katempə ŋwalea nci dzeyi kwa yɛ hweŋkwa va kafayɛ, pɛtɛ tempə mbeli dzeyi ki ghɛ va ghazlənə: ka mempɛhwetɛti ba'a deghelɛshi, ka meha mehɛɗi ba'a ŋwalea fəshi. 26 Zəzə kezamte sebe te hɛ ya va 'ya. 'Ya ɗe kazamte sləa nci yitea ghə te hɛɗi lema. 27 Ama pa 'ya ghazlənə ɗa yagha ka jaga ta nci kaŋ'wəshi ɗa, pa 'ya ghazlənə ɗa yagha hɛ kaghwetete ghəa nci, ma tegeze hɛ: Mahwətə nde zamte sebe te hɛ we, ama gheɓəmə le berete ta ɓəmə. 28 Hwelefe nya ɗema mehele ve hwelefe ta ka Israyɛl, mbeli nyi keɗema keɗepe wəshi hɛ. 29 Ma ya nahe hɛ kentsehwele ne, katefave hɛ, kateɗepete wəshi nyi ketemene nda geva ke hɛ hɛ. 30 Tsema nza wəndə kwetɛŋe kakekate mbeli slibə, mbeli bake kakekate mbeli 10.000 keɗema Keleɓa nya keya hɛ kepamte hɛ, keɗema Mahwətə keveyi hɛ mbe dzeve ta nci wa? 31 Ama nahe ka jaga ta nci keɗepe le ghəa nci kaɗema zləvə te shala nya keya hɛ kala Shala ta ka Israyɛl. 32 Ma ghenci, kenza hɛ za ma ke mbeli nyi mbe Sodome ba'a Gomore we. Yipə yipə hɛ le rɛzɛŋe nya keya ya nyi ndɛalɛa ndɛalɛa ba'a nyi nza dala mbe. 33 Kala ghwɛa shishi tɛa nci, kala ghyana ta ghwɛa mentsape. 34 Ashɛ gheŋkɛ ya kawəsə nya veyi 'ya, nya wəfərəakɛ 'ya te ŋkwa kewəfərə wəsə ta ɗa wəka? 35 'Ya nde tewa dewa ba'a nde tenehe zhɛme te və nya tetsa hɛ tehene, kwa nza ŋkɛ takwa takwa ndiremi katedzete hɛ, katedera wəsə nya kehite geva kaŋa nci we. 36 Katemeha nda ghwə Mahwətə tiɗiɗi ke mbelia ŋkɛ, katezhɛ heli ŋkɛ yitea ka mene slene ta ŋkɛ vəa ŋkwa nya tenakɛ hɛ ŋkɛ kaka dewə berete, kaɗema wəndə kedɛŋe geva ba'a kekemane hɛ shɛ. 37 Tagha gɛ, ma te'yɛwe ŋkɛ: Tema yɛ shala ta nci nyi wəfərə nyi hɛ yite gɛ wa? 38 Tema hɛ nyi kese nyi kazeme merege ta melɛa nci ba'a kasa tɛ nyi ɓasle hɛ gɛ wa? Sate hɛ te ŋkwa kezha kemane ŋayɛ, se hɛ kezha ya ŋayɛ gi ga! 39 Ɗepete mə tsetsenya, deke 'ya nde nza kambelete ŋkwa. Kwete shala shɛ kala 'ya we. 'Ya nde ve nda mte ke mbeli ba'a nde ve ŋkwa teghweme, 'ya nde ɗa ŋkwa le zhi ba'a nde mpi zhi. Wəndə shɛ kazləgwəke wəndə mbe dzeve ta ɗa we. 40 Kaganda ne, 'ya kakafe dzeve yitea ghweme, ma 'ya sha fela: Kaganda nza 'ya teghweme kaghala ghala. 41 Ma kemɗɛte kafayɛa ɗa nya keɓayɛ ɓayɛ 'ya, ma kekafete wəsə kemeha ghwəa shɛ 'ya yitea ghweme ne, katewa dewa 'ya te ka jaga ta ɗa, kateve nda zhɛme ta nci 'ya ke mbeli nyi keɗema ɗa. 42 Katenza yɛ have ta ɗa bətə mbe mimi, katezeme sli kafayɛa ɗa. Sewajɛ shɛ katembele we. Katenza ɗa te pɛtɛa mbeli nyi ɗakɛ zhi ba'a nyi keseve mbeli. 43 Ghweme, zlama le mbelia ŋkɛ, hawe wəshi nyi zhɛrete mbeli kashala va Shala. Katewa mte ta ŋwalea ŋkɛ ŋkɛ, katewa dewa ŋkɛ te ka jaga ta ŋkɛ. Kateve nda zhɛme ta nci ŋkɛ ke mbeli nyi keɗema ŋkɛ, ama kateyaɓe hɛɗia mbelia ŋkɛ ŋkɛ wɛŋe. 44 Hwa'a yɛ Moyize le Zhozəwɛ, wəzege ta Nəwn se kadzawa kema ta mbeli, pa hɛ zlapave nda pɛtɛa ghena nyi mbe ciməa shɛ ke hɛ. 45 Ma vəa ŋkwa nya nahemte geze nda pɛtɛa ghena shɛhɛ Moyize ke pɛtɛa ka Israyɛl ne, 46 ma ke sha hɛ: «Keseyi mə pɛtɛa ghena nyi geze ŋayɛ nyi 'ya ɓeshi mbe ghə. Ghena shɛhɛ ka tenegha fete yitea gheyɛ. Geze nda mə ke ŋwalea ŋayɛ kezha mene slene hɛ le pɛtɛa ghena nyi mbe wəsə mahalegə nya. 47 Kwa nza ŋkɛ ne, kenza ghena shɛhɛ kaghena kwada kaŋa ŋayɛ we. Mpia ŋayɛ ghena shɛhɛ, laka ghena shɛhɛ tetemə yɛ kwele kwele te hɛɗi nya tekele nya yɛ kaŋa ŋayɛ pelɛ kema ta Zhəwrdɛŋe.» Mahwətə kageze mte ta Moyize 48 Te vecia shɛnyɛ, ma ke Mahwətə sha Moyize: 49 «Kwiɗi kadzeme ghweme ta yɛ Abarim, te hɛɗia Mowab, mbe kema ta Zhɛriko. Dzeme ŋa pelɛ ghəa ghweme ta Nɛbo shɛ na newakɛ hɛɗia ka Kanan nya teve nda 'ya kaŋa nci ke ka Israyɛl. 50 Ma kwa sebe ta ŋkɛ, katemte na pelɛ ghəa ghweme nya dzeme ŋa nya na, katelə na sha ka shihɛ ŋa, kala nya mtenyɛ wəza meyɛ ŋa Aron pelɛ ghweme ta Hor, nya lənyɛ ŋkɛ sha ka shihɛnyɛ. 51 Va nya nza ŋkɛ nahe gheyɛ le Aron kemenete ɗa fete nya dzawe kwa kema ta ka Israyɛl, mbe ghena ta yɛməa Mɛriba nya mbe Kadɛs, te ɓerama ta Tsin. Ma te vecia shɛ ne, kese yɛ kancɛ nda ke ka Israyɛl 'ya ya kaShala nya kaganda we. 52 Deke cakeɗake tenewe hɛɗia shɛ na. Ama katedzete hɛɗi nya teve nda 'ya ke ka Israyɛl na we.» |
La Bible en langue Kapsiki avec les livres deutérocanoniques © Alliance Biblique du Cameroun 2012.
Bible Society of Cameroon