Zhɛne Ghwelə yitea Wəshi Mahalegə 26 - Ghena ta Shala

Tsəməa wəshi nyi kese te wəve

¹ Ma vəa ŋkwa nya tentsehe yɛ te hɛɗi nya ve ŋayɛ Shala Mahwətə ta ŋayɛ kaŋa ŋayɛ, ma vəa ŋkwa nya tekelete ŋkɛ yɛ ba'a nya tenza yɛ te ne,

² katenta ka ghate ta ya ta wəshi nyi tewəzate ŋkɛ te hɛɗi nya ndeke ŋayɛ Shala Mahwətə ta ŋayɛ yayata wəndə. Katebete hɛ ŋkɛ kwa kwaciga ba'a katekele hɛ ŋkɛ kalə kadzete ŋkwa nya tentave Shala Mahwətə ta ŋayɛ kezha ncɛ nza ta ŋkɛ te.

³ Katelə ŋkɛ sha nde dzeghe Shala nya te slene te vəa shɛ, ma ke sha tegeze nda: «'Ya kageze ɓeshi kwa kema ta Shala Mahwətə ta ŋa nahe 'ya kentsehe te hɛɗi nya meɗeyi nda Mahwətə ke ka shihɛ n'yɛ kave n'yɛ.»

⁴ Katekele kwaciga shɛ nde dzeghe Shala mbe dzeve ta ŋkɛ ba'a kateve ŋkɛ mbe kema ta reghwetɛa Shala Mahwətə ta ŋayɛ.

⁵ Tagha gɛ, ma ke wəndəa shɛ sha tegeze kwa kema ta Shala Mahwətə ta ŋayɛ: «Kande Aram nya kendeŋe se shia ɗa. Nahe ŋkɛ kese kwa Ɛzhipte nya se ŋkɛ kande se se le mbeli nyi ɓɛhwɛ kwa sebe ta ŋkɛ kwa. Ma kwagha ne, pa hɛ zhɛrenji kahwelefe nya wəba, nya berete ba'a nya kwele kwele.

⁶ Ama nahe ka Ɛzhipte kese kasa n'yɛ yaka, nahe hɛ kevate titikwə te ghen'yɛ ba'a kendeke n'yɛ slene mava nya dzawe.

⁷ Tagha gɛ, pa n'yɛ tsave nda lewela ke Shala Mahwətə ta ka shihɛ n'yɛ. Pa Mahwətə fate nehwene ta n'yɛ. Pa ŋkɛ nakɛ yaka, titikwə ba'a ɗa nya te ghen'yɛ.

⁸ Pa Mahwətə fəakave n'yɛ mbe Ɛzhipte laka berete ta ŋkɛ nya dzawe ba'a nya ghazlənə mbeli ve ba'a laka wəshi nyi dzawe dzawe ba'a wəshi meŋele.

⁹ Pa ŋkɛ fəke n'yɛ kadzete ŋkwa nya ba'a ndeke n'yɛ hɛɗi nya hwɛ yɛ yɛməa mze le ŋ'wa te.

¹⁰ Ma tsetsenya gɛ ne, 'ya kakele ka ghate ta wəshi nyi kese te wəve nyi ndeke ɗa Mahwətə kase.» Tagha gɛ, kateve hɛ wəndəa shɛ kwa kema ta Shala Mahwətə ta ŋayɛ ba'a kategwəɗəŋə ŋkɛ ntiŋə ghə mbe hɛɗi kezha hawe va Shala Mahwətə ta ŋayɛ.

¹¹ Ma kwa sebe ta ŋkɛ ne, katezlama yɛ le ka Lɛvi ba'a ka se se nyi te hɛɗia ŋayɛ te wəshi ganji nyi menete ŋayɛ Shala Mahwətə ta ŋayɛ kaŋa ŋayɛ ba'a kaŋa mbelia ŋayɛ.

Tsehe wəsə nya te kwa mahekene ta va

¹² Kala kiɗi ta wa mahekene ne, katsehe kwa meŋe ta bela ta wəshi mbeli. Katekele kwa meŋe ta bela yɛ shave hwa wəshia ŋayɛ nyi kese te wəve ba'a kateve nda kwa meŋe ta bela shɛ yɛ ke ka Lɛvi, ke ka se se, ke ka mezhɛtiti ba'a ke ka wedidi. Katezeme hɛ hɛ ba'a katenza hɛ behe behe dzeyi mbe yɛ meleme ta ŋayɛ.

¹³ Tagha gɛ, ma pe yɛ tegeze kwa kema ta Shala Mahwətə ta ŋayɛ: «Nahe 'ya kekelemte wəsə nya keveyi geva tekeleke shave ki ghɛa ɗa ba'a kendeke nda ke ka Lɛvi, ke ka se se, ke ka mezhɛtiti ba'a ke ka wedidi kala ghena nyi gezete ɗa na. Kese 'ya kapele se yitea ghena nyi gezete ɗa na we, kwete shɛ kezaghəyite 'ya we.

¹⁴ Kese 'ya kazeme bela shɛ vəa ŋkwa nya se 'ya mbe nehwene we, wəsə shɛ kekelemte 'ya vəa ŋkwa nya se 'ya wale wale we, wəsə shɛ kendeke nda 'ya ke wəndə nya kemte mte we. Nahe 'ya kefate nda ŋa Shala Mahwətə ta ɗa, nahe 'ya kemenete kala nya gezave ɗa na.

¹⁵ Newe ŋkwa sawa pelɛ ghweme nya nza na ba'a wəpikɛ ka Israyɛl nyi kambelia ŋa ba'a hɛɗi nya ndeke n'yɛ na kala nya zemete nda na kafela ke ka shihɛ n'yɛ, hɛɗi nya hwɛ nya yɛ ŋ'wa le yɛməa mze te.»

Ka Israyɛl ya kambelia Mahwətə

¹⁶ Ma ɓeshi nya ne, kageze ŋayɛ Shala Mahwətə ta ŋayɛ kezha mene slene le wəshi mahalegə nyi ba'a wəshi keshi nyi. Katehawe yɛ va hɛ ba'a katemene slene yɛ le hɛ le wənəa ŋayɛ pɛtɛ ba'a le nza ta ŋayɛ pɛtɛ.

¹⁷ Ma ɓeshi nya ne, nahe yɛ kekemave wəsə nya meɗeyi ŋayɛ Mahwətə: kaShala ta ŋayɛ tenza ŋkɛ kenza yɛ kamene wəsə nya ɗe ŋkɛ, kenza yɛ kahawe va wəshi mahalegəa ŋkɛ, va ghena nyi gezete ŋkɛ ba'a va wəshi keshia ŋkɛ, kenza yɛ kafa nda ŋa ŋkɛ.

¹⁸ Ma gheŋkɛ le ŋa ŋkɛ ne, nahe ŋkɛ kekemave meɗe mɛ nya se va gheyɛ: kambelia ŋkɛ, kawəsəa ŋkɛ nya nza zləvə te tenza yɛ, kala nya gezete ŋkɛ ba'a katehawe yɛ va wəshi mahalegəa ŋkɛ pɛtɛ.

¹⁹ Kaganda ne, kaɗe Shala Mahwətə ta ŋayɛ kanza yɛ kakwa ghate hwa hwelefefi nyi pate ŋkɛ pɛtɛ: laka zləvə, laka dzemte ta slə ba'a laka kwele. Kaɗe ŋkɛ kanza yɛ kambeli nyi keveyi geva kaŋa ŋkɛ le ghəa ŋkɛ, kala nya meɗeyi ŋayɛ ŋkɛ.