Zhɛne Ghwelə yitea Wəshi Mahalegə 24 - Ghena ta Shala

Mi nyi ŋkamte zhilia nci

¹ Ma vəa ŋkwa nya wəmeve male za, kwa sebe ta ŋkɛ, pa malea shɛ ɗema malea shɛ, va nya nakɛ wəsə hawe ŋkɛ te ne, katerafe palepa ta nehe le ŋkɛ. Ma kwa sebe ta nya ndeke nda ŋkɛ ne, kateŋkamte ŋkɛ shave ki ghɛa ŋkɛ.

² Kateshave nde ki ghɛa ŋkɛ, kateslə nde ba'a katewəme kwete za nde.

³ Ma keɗema ŋkɛ za nyagha ne, rafave nda palepa ta nehe ŋkɛ. Ma kwa sebe ta nya ndeke nda ŋkɛ kateŋka ŋkɛ shave ki ghɛa ŋkɛ. Keɗema ma kemte wəndə nya kezhɛne nya kawəmeve ne,

⁴ katezhɛne za makwa nta nya keŋkamte kakele kamale we. Kwa nza ŋkɛ ne, nahe nde kezhɛre nda wale wale kaŋa ŋkɛ. Kawəsə nya ndiremi kashasha tenza nde kwa kema ta Mahwətə. Kateve hɛɗi nya ndeke ŋayɛ Shala Mahwətə ta ŋayɛ kaŋa ŋayɛ mbe jaɗafa.

Za makwa

⁵ Ma keŋzlete makwa za kakwate ŋzle ne, katelə ŋkɛ kadzehwa ka sewajɛ we, katese mbeli shɛ kezha 'yɛwe kwete wəsə ve we. Gwezlayɛ tenza ŋkɛ ki ghɛ kava zake ba'a kateve nda zlama ŋkɛ ke makwa ta ŋkɛ nya ŋzlete ŋkɛ.

Kese wəshi te ŋkwa wəshi

⁶ Katekese vena keɗema pelɛ vena mbeli te ŋkwa wəsə we, kwa nza ŋkɛ ne, kala fɛake nda wəshi kezeme ŋkɛ ke wəndə.

Kese ŋkwa kaberete

⁷ Ma kenakɛ wəndə nya kekesehwe kwete hwa ka menəhɛnyɛ mbeli hwa ka Israyɛl, nya kezhɛrete ŋkɛ kamava keɗema nya kepamte ŋkɛ ne, katepesle wəndə nya kekesehwe ŋkwa shɛ mbeli. Tsagha ne, kateza sebe yɛ te wəsə kwa ndiremi hwa gheyɛ.

Zereghwe nyi te hweta

⁸ Ntsehwele mə megela yitea zereghwe nyi te hweta: ya mə tsape ba'a mene mə slene tiɗiɗi le pɛtɛa wəshi nyi teteke ŋayɛ ka dzeghe Shala nyi kaka Lɛvi. Hawe mə va ghena nyi gezete nda 'ya ke hɛ.

⁹ Zəzəte mə wəsə nya menete nda Shala Mahwətə ta ŋayɛ ke Miriyam vəa ŋkwa nya nza yɛ kwa hweŋkwa, kwa sebe ta shave ta ŋayɛ mbe Ɛzhipte.

Ya ka dewə berete

¹⁰ Ma kenzəɓəave nda dewa yɛ ke nde ghedəkwəa ŋayɛ ne, katedzeki ghɛa ŋkɛ yɛ kezha kele wəsə te ŋkwa dewa shɛ we.

¹¹ Pelɛ te ŋwela tenza yɛ, wəndə nya nzəɓəave nda dewa yɛ nde tekele wəsə te ŋkwa dewa shɛ kashave.

¹² Ma kenza ŋkɛ nde dewə berete nde ndeke ŋayɛ lekwesa ta ŋkɛ te ŋkwa dewa ne, kesema ŋkɛ yɛ kahɛ ma.

¹³ Katezhɛne nda ŋkɛ yɛ yipə le pəkwə ta veci, yitea dəpə ghəa ŋkɛ le kahɛ ba'a yitea tsa ŋayɛ hana ŋkɛ. Tsagha ne, slene ganyɛ yamenete kwa kema ta Shala Mahwətə ta ŋayɛ.

Nza tiɗiɗi le ka mene slene

¹⁴ Katemene ghəa ŋayɛ yɛ le nde mene slene nya kande titikwə keɗema nya kande dewə berete, ya gheŋkɛ nza kande Israyɛl keɗema kande se se nya mbe meleme nya te hɛɗia ŋayɛ we.

¹⁵ Kateŋki nda meleɓe ta vəghwəa ŋkɛ yɛ nda tepəkwə veci. Kwa nza nde ne, nde titikwə ŋkɛ ba'a kahe kahe ɗe ŋkɛ kaŋki nda mbeli. Ma keɗema ŋkɛ tsagha ne, katenehwene nda nehwene ŋkɛ ke Mahwətə le gheyɛ ba'a kaka mene jaɗafa tenza yɛ.

Kwa ghəa yayata wəndə nza slene nyi mene ŋkɛ

¹⁶ Katempə mbeli nyi keyake ŋwela mbeli te jaɗafa ta ŋwalea nci we. Katempə ŋwale mbeli te jaɗafa ta mbeli nyi keyake hɛ we. Te jaɗafa ta ŋkɛ tepesle yayata wəndə mbeli.

Nza ganyɛke laka ka titikwəa kɛfi

¹⁷ Katemeha nda ghwə mbəɗəkwə yɛ ke nde se se ba'a ke mezhɛte we. Katekele lekwesa ta male wede yɛ te ŋkwa dewa we.

¹⁸ Zəzəte mə kaka mavashi se yɛ mbe Ɛzhipte, nda mbeɗeke ŋayɛ Shala Mahwətə ta ŋayɛ. Vatse geze ŋayɛ 'ya kamene slene le ghena nyi.

¹⁹ Ma kenza yɛ kacɛsli ha mbe wəvea ŋayɛ, nda zaghəyite ghwɛpɛ yɛ mbe wəvea shɛ ne, katezhɛre geva yɛ dzeyi te sebe kezha zele we. Kaŋa ka se se, ka mezhɛtiti ba'a ka wedidi tesərə nda ŋkɛ yɛ. Ma tsagha ne, katewəpi ŋayɛ Shala Mahwətə mbe yayata wəsə nya mene yɛ.

²⁰ Ma vəa ŋkwa nya tegagəzə wəfe ta bekele ta ŋayɛ yɛ ne, katezhɛne geva yɛ dzeyi te sebe kezha nda ya nyi ketene te we. Kaŋa ka se se, ka mezhɛtiti ba'a ka wedidi tesərə nda hɛ yɛ.

²¹ Ma vəa ŋkwa nya tenda rɛzɛŋea ŋayɛ yɛ se te wəve ne, katezhɛne geva yɛ dzeyi te sebe kezha nda ya nyi ketene we. Kaŋa ka se se, ka mezhɛtiti ba'a ka wedidi tesərə nda hɛ yɛ.

²² Zəzəte mə kaka mavashi se yɛ mbe Ɛzhipte. Vatse geze ŋayɛ 'ya kamene slene le ghena nyi.