Zhɛne Ghwelə yitea Wəshi Mahalegə 15 - Ghena ta Shala

Sərə ta dewa te yayata mberefaŋe ta va

¹ Menema ta va mberefaŋe ne, katesərə nda dewa ta ŋayɛ yɛ ke mbeli nyi nza hɛ hwe.

² Wa nya tsetse temene yɛ: Ma vəa ŋkwa nya zlapete geva va kesərə dewa kazləvəa Mahwətə ne, katesərə dewa ta ŋkɛ yayata wəndə nya kenzəɓəave nda dewa ke nde ghedəkwəa ŋkɛ. Katetərənə nde ghedəkwəa ŋkɛ keɗema menənyɛ ŋkɛ kaŋki nda ŋkɛ we.

³ Wərə yɛ katərənəte nde se se kaŋki ŋayɛ. Ama katesərə nda dewa ta ŋayɛ yɛ ke menə ŋayɛ.

⁴ Tsagha ne, katenza nde titikwə hwa gheyɛ we, kwa nza ŋkɛ katewəpi ŋayɛ Mahwətə kwele kwele te hɛɗi nya teve ŋayɛ Shala Mahwətə ta ŋayɛ kaŋa ŋayɛ.

⁵ Ama nda yɛ kafa nda ŋa Shala Mahwətə ta ŋayɛ megela laka mene slene tiɗiɗi le wəshi mahalegə nyi ve ŋayɛ nyi 'ya ɓeshi.

⁶ Kwa nza ŋkɛ ne, katewəpi ŋayɛ Shala Mahwətə ta ŋayɛ kala nya meɗeyi ŋayɛ ŋkɛ. Tagha gɛ, katenzəɓə nda dewa yɛ ke hwelefefi kwele kwele. Ama gheyɛ ne, katenzəɓə dewa yɛ we. Katesleke hwelefefi yɛ kwele kwele, ama hwelefe shɛ katesleke ŋayɛ we.

⁷ Ma kenza nde titikwə shɛ hwa ka menəhɛ ŋayɛ, mbe kwete hwa yɛ meleme ta ŋayɛ, te hɛɗi nya teve ŋayɛ Shala Mahwətə ta ŋayɛ ne, katenza mehele ta ŋayɛ ntɛaŋe ntɛaŋe ba'a dzeve ta ŋayɛ keməkwə məkwə laka menə ŋayɛ nya kande titikwə we.

⁸ Ama katepele nda dzeve yɛ werete ba'a katenzəɓə nda wəshi nyi ɗe ŋkɛ yɛ.

⁹ Ya mə mehele ta ŋayɛ megela va zəzə nya ndiremi, laka geze nda ke ghəa ŋayɛ: «Takwa takwa va kwa mberefaŋe, va kesərə dewa», pe yɛ. Nzama yɛ ntɛaŋe ntɛaŋe laka menə ŋayɛ nya kande titikwə, kaɗema kanzəɓə nda dewa ma. Kwa nza ŋkɛ ne, kateve ŋayɛ fete ŋkɛ kwa kema ta Mahwətə ba'a katenza yɛ kaka beze ghena.

¹⁰ Nzəɓə nda mə dewa, nzəɓə nda mə le wənə kwetɛŋe. Ma tsagha ne, katewəpi ŋayɛ Shala Mahwətə ta ŋayɛ mbe pɛtɛa slene ba'a wəshi nyi temene yɛ.

¹¹ Katenza ka titikwəa kɛfi keveci keveci te hɛɗia ŋayɛ. Vatse geze ŋayɛ 'ya kezha nza dzeve ta ŋayɛ waɗe laka ka menəhɛ ŋayɛ nyi kesa yaka ba'a nyi kaka titikwə te hɛɗia ŋayɛ.

Pele ta ka Ɛbrə nyi kaka mavashi waɗe

¹² Ma kepamte ŋayɛ ghəa ŋkɛ kwete hwa ka menəhɛ ŋayɛ nyi kaka Ɛbrə, male keɗema za kamava ne, katemene ŋayɛ slene ŋkɛ kava ŋkwaŋe. Ma te kwa mberefaŋe ta va ne, katepele ŋkɛ yɛ kanza waɗe.

¹³ Ama katesərə ŋkɛ yɛ kaslə le dzeve pala pala we.

¹⁴ Katenta nda wəshi gəmə nyi ɗave ŋayɛ Shala Mahwətə ta ŋayɛ yɛ: timɛti, kwi, ha ba'a tɛ.

¹⁵ Zəzəte mə kaka mavashi se yɛ mbe Ɛzhipte nda mbeɗeke ŋayɛ Shala Mahwətə ta ŋayɛ. Vatse ve ŋayɛ wəsə mahalegə nya 'ya ɓeshi.

¹⁶ Ama kegeze ŋayɛ mava shɛ: «Kaɗe 'ya kashave ɗa ki ghɛa ŋa we», a ke, va nya ɗehwe ŋayɛ ŋkɛ, gheyɛ le mbeli nyi ki ghɛa ŋayɛ ba'a nya nza ŋkɛ le zlama ki ghɛa ŋayɛ ne,

¹⁷ katekele zhɛliɓə yɛ ba'a katentsa nda sleme yɛ vare sheghwəa gelembe. Ma tsagha ne, kamava ta ŋayɛ tenza ŋkɛ kaghala ghala. Tsagha shɛ temene nda yɛ ke kwatera ta ŋayɛ.

¹⁸ Nzama ŋkɛ kawəsə nya dzawe kezha pele ŋkɛ waɗe shave ki ghɛa ŋayɛ ma, kwa nza ŋkɛ mbe slene nya menete ŋayɛ ŋkɛ kava ŋkwaŋe ne, nahe ŋkɛ kemeneke ŋayɛ wəshi bake zhigə kwele ma ke ŋa nde mene slene te cɛdɛ. Pelakɛ mə ŋkɛ waɗe, ma tsagha, katewəpi ŋayɛ Shala Mahwətə ta ŋayɛ mbe yayata wəsə nya temene yɛ.

Tsəməa ŋwalea wəshi keseɗa

¹⁹ Ma yayata tsəməa wəzege ta sla ta ŋayɛ, timɛtia ŋayɛ keɗema kwia ŋayɛ nya kaŋeza ne, kateve nda yɛ tekeleke ke Shala Mahwətə ta ŋayɛ. Katemene slene yɛ le tsəməa mca ta ŋayɛ we, katetsehe shinti yɛ seyi te tsəməa gamea ŋayɛ we.

²⁰ Keva keva ne, katezeme hɛ yɛ le mbeli nyi ki ghɛa ŋayɛ mbe kema ta Shala Mahwətə ta ŋayɛ, te ŋkwa nya tentave Shala Mahwətə ta ŋayɛ.

²¹ Ma kenza beze te geva ta ŋkɛ, kenza ŋkɛ katseheɗe keɗema kaghwələ, keɗema kenza yayata beze nya dzawe te ne, katedzeghe nda melɛ yɛ le ke Shala Mahwətə ta ŋayɛ we.

²² Katezeme ŋkɛ yɛ ki ghɛa ŋayɛ. Katezeme wəndə nya wale wale le nya wɛŋe kanya kwetɛŋe, kala wəsə nya nza ŋkɛ kakɛme keɗema kale.

²³ Ama katezeme mimia wəsə keseɗa shɛ yɛ we. Kadzete hɛɗi tesheke yɛ kala yɛmə.