Zhɛne Ghwelə yitea Wəshi Mahalegə 14 - Ghena ta Shala

Wəshi keshi nyi kefɛake geva laka nehwene

¹ Ma gheyɛ ne, ŋwalea Shala Mahwətə ta ŋayɛ yɛ. Katepeperawe geva yɛ ba'a kateŋsə ghə kwele yɛ kemte wəndə we.

² Kwa nza ŋkɛ ne, mbeli nyi keveyi geva tekeleke kaŋa Shala Mahwətə ta ŋayɛ yɛ. Gheyɛ yantave Mahwətə kezha nza kambelia ŋkɛ hwa hwelefefi nyi te hɛɗi lema.

Sli nyi zeme mbeli ba'a nyi kefɛake geva

³ Katezeme wəsə kezeme nya wale wale yɛ we.

⁴ Wa nyi wəshi keseɗa nyi tezeme yɛ nyi: sla, təmə, kwe,

⁵ le, kɛme, ghweɓeke, berezlɛa, kwakweshala, maŋwelema ba'a kwe gamba.

⁶ Katezeme yayata wəsə keseɗa nya nza cɛpe keperawe perawe te ba'a nya kegwəɓə gwəzə yɛ.

⁷ Ma hwa wəshi keseɗa nyi keghwəɓə gwəzə ba'a nyi nza cɛpe keperawe perawe te hɛ ne, wa nyi wəshi keseɗa nyi ɗema yɛ tezeme nyi: zlegwemə, vɛra ba'a kese, va nya nza hɛ kagwəɓə gwəzə, ama kaɗema cɛpe keperawe te hɛ. Kawəshi nyi wale wale tenza hɛ sha gheyɛ.

⁸ Tsagha gərədə, va nya nza ŋkɛ keperawe perawe cɛpe te, ama kaɗema nde kagwəɓə gwəzə. Wale wale tenza nde sha gheyɛ. Katezeme slia ŋkɛ ba'a katekwaɗe kwa mte mte ta ŋkɛ yɛ we.

⁹ Ma hwa wəshi nyi mbe yɛmə ne, katezeme pɛtɛa wəshi nyi nza yɛ bazla keyiɗə ba'a yɛ jɛpəli te hɛ yɛ.

¹⁰ Ama katezeme yayata wəsə nya ɗema bazla keyiɗə ba'a jɛpəli te yɛ we. Kawəsə nya wale wale nza ŋkɛ sha gheyɛ.

¹¹ Katezeme pɛtɛa 'yɛ nyi wɛŋe yɛ.

¹² Ama wa nyi 'yɛ nyi ɗema yɛ katezeme nyi: zele, zleŋa kwa livə, damba tsaraka,

¹³ wəmbələ, zleŋa, mama ta yɛ ghagha,

¹⁴ mama ta yɛ ghame,

¹⁵ zhenɛgə, təwəvəŋə ghweme, yiɗə yɛmə, mama ta yɛ mazavɛ,

¹⁶ təwəvəŋə wəfe, tewəvəŋə gamba, təwəvəŋə gela,

¹⁷ Wəmbaya, zleŋa kwa tɛawetɛa, zhɛ,

¹⁸ kwaghela, mama ta nteɗe ŋwələ, wəsəa kwadzakwə ba'a mezlekwe zlekwe.

¹⁹ Kawəsə nya wale wale tenza yayata wəsə nya ɓɛhwɛ nya nza bidzə yite sha gheyɛ. Katezeme wəsəa shɛ yɛ we.

²⁰ Ama katezeme yayata wəsə nya ɓɛhwɛ nya nza bidzə yite nya wɛŋe yɛ.

²¹ Katezeme wəsə keseɗa nya kemte mte yɛ we. Ke ka se se nyi hwa gheyɛ teve nda wəsə kwa mte mtea shɛ yɛ, kezha zeme ŋkɛ, keɗema ne, katepamte nda yɛ ke wəndə ŋkwərə. Kwa nza ŋkɛ ma gheyɛ ne, mbeli nyi keveyi geva tekeleke kaŋa Shala Mahwətə ta ŋayɛ yɛ. Kateta zhɛgwəa kwe yɛ hwa ŋ'wa ta meghekɛ we.

Ghena te ghəa kwa meŋe ta bela ta wəshi

²² Kateve kwa meŋe ta bela ta wəshia ŋayɛ nyi kese te wəve yɛ te ŋa ŋkɛ ŋkwa keva keva.

²³ Kwa sebe ta ŋkɛ, katedzawa kema ta Shala Mahwətə ta ŋayɛ yɛ, te ŋkwa nya tentave ŋkɛ kezha ncɛ ghəa ŋkɛ te. Tagha tezeme kwa meŋe ta bela ta ha, tɛ mɛnɛfɛ ba'a n'yia ŋayɛ yɛ, tsagha tsəməa ŋwalea sla, timɛti ba'a kwia ŋayɛ. Tsagha ne, kateteke yɛ kahawe va Shala Mahwətə ta ŋayɛ keveci keveci.

²⁴ Ma vəa ŋkwa nya tenza ŋkwa cakeɗake kezha fəke kwa meŋe ta bela ta wəshia ŋayɛ yɛ, va nya nza ŋkwa nya tentave Shala Mahwətə ta ŋayɛ kezha ncɛ ghəa ŋkɛ te cakeɗake yitea gheyɛ ba'a nya wəpikɛ ŋayɛ Shala Mahwətə ta ŋayɛ kwele kwele ne,

²⁵ katepamte kwa meŋe ta bela ta wəshia shɛhɛ yɛ te cɛdɛ, katekele cɛdɛa shɛ yɛ kalə kadzete ŋkwa nya tentave Shala Mahwətə ta ŋayɛ.

²⁶ Tagha ne, katepa yayata wəsə nya ɗe yɛ yɛ te cɛdɛa shɛ: yɛ sla, timɛti keɗema kwi, tɛ keɗema kweci wəshi kesa nyi kemsle msle, yayata wəsə nya ɗe yɛ. Tagha tezeme wəshia shɛhɛ yɛ kwa kema ta Shala Mahwətə ta ŋayɛ, katezlama yɛ, gheyɛ le mbeli nyi ki ghɛa ŋayɛ.

²⁷ Ma vəa ŋkwa shɛ ne, katepele se yɛ yitea ka Lɛvi nyi mbe meleme ta ŋayɛ we, kwa nza ŋkɛ ne, wəve shɛ va hɛ hwa gheyɛ we.

²⁸ Menema ta va mahekene ne, katekele kwa meŋe ta bela ta wəshi nyi kese te wəve yɛ te va shɛ. Ama mbe meleme ta ŋayɛ tebete hɛ yɛ.

²⁹ Tsagha ne, katese ka Lɛvi nyi ɗema wəve va hɛ hwa gheyɛ, ka se se, ka mezhɛtiti ba'a ka wedidi nyi mbe meleme ta ŋayɛ kanta hɛ. Katezeme wəshi kezeme hɛ behe behe. Ma tsagha gɛ, katewəpi ŋayɛ Shala Mahwətə ta ŋayɛ mbe yayata wəsə nya temene yɛ.