Zhɛne Ghwelə yitea Wəshi Mahalegə 10 - Ghena ta Shala

Leve ta sla mze kwa tere tere: zhɛ helia Shala

¹ Tagha gɛ, ma ke Mahwətə sha 'ya: «Tsehete pelɛ nyi slapesla slapesla bake kala ka ghate. Baŋete səndəkwə yitea sheghwə. Kwa sebe ta ŋkɛ, same sha 'ya pelɛ ghweme.

² Katerafe wəshi mahalegə nyi kese te ka ghate nyi mpəmte na 'ya te pelɛ nyi slapesla slapesla shɛhɛ. Kwa sebe ta ŋkɛ, katebete hɛ na kwa səndəkwəa shɛ.»

³ Tagha gɛ, pa 'ya baŋete səndəkwə yitea sheghwəa gwevɛre, pa 'ya tsehete pelɛ nyi slapesla slapesla bake kala ka ghate, cape 'ya kadzeme ghweme le pelɛ nyi slapesla slapesla shɛhɛ yitea dzeve.

⁴ Pa Mahwətə rafate wəshi mahalegə nyi meŋe, nyi gezete ŋayɛ ŋkɛ shave mbe tepe ta ghwə, te pelɛ nyi slapesla slapesla shɛhɛ, kala ka ghate. Te veci nya tsenete geva yɛ yitea ghweme menete geva ŋkɛ. Kwa sebe ta ŋkɛ, pa Mahwətə fəave ɗa hɛ.

⁵ Pa 'ya zhɛnakawa geva sawa pelɛ ghweme ba'a beteyi hɛ kwa səndəkwə nya baŋete 'ya. Mba hɛ kwagha, kala nya gezete ɗa Mahwətə.

⁶ Cape ka Israyɛl slənji yitea yɛ belageji nyi mbe Benɛ-Yakan kezha dzembe Mosɛra. Tagha mtenyɛ Aron ba'a lamte ŋkɛ mbeli. Pa wəzege ta ŋkɛ Ɛlazar zhɛrenyɛ kande dzeghe Shala te ŋkwa ŋkɛ.

⁷ Slə tagha ne, cape ka Israyɛl kadzembe Gəwdgoda, slə mbe Gəwdgoda, cape hɛ kadzembe Yotbata nya nza hələ kwele kwele mbe.

⁸ Ma vəa ŋkwa shɛ gɛ, pa Mahwətə veyi hwelefe ta Lɛvi tekeleke kezha kele səndəkwəa jikə geva ta Mahwətə, kezha dzawa kema ta Mahwətə kamene nda slene ba'a kezha wəpi ŋkwa te sləa ŋkɛ, kala nya mene nya ka Lɛvi pa ɓeshi.

⁹ Vatse ɗema ka Lɛvi kekemave ŋa nci bela ta hɛɗi kala ka menəhɛ nci. Mahwətə ya kaŋa nci bela kala nya meɗeyi nda Shala Mahwətə ta ŋayɛ ke hɛ.

¹⁰ Pa 'ya nza ɗa pelɛ ghweme kaveci wəfaɗemsə ba'a kaviɗi wəfaɗemsə kala kwa ghate. Ma vəa ŋkwa shɛ ɓiyitsa ne, pa Mahwətə fate səkwə ta ɗa ba'a pa nzanyɛ keza sebe te gheyɛ.

¹¹ Kwa sebe ta ŋkɛ, ma ke Mahwətə sha 'ya: «Sate! Kwiɗi te kema ta mbeli nyi. Katelə hɛ kakele hɛɗi nya zemete nda 'ya kafela ke ka shihɛ nci kave nda ke hɛ.»

Wəsə nya neghe Mahwətə va mbelia ŋkɛ

¹² Ma tsetsenya gɛ ne ka Israyɛl ne, wa yaneghe Shala Mahwətə ta ŋayɛ va gheyɛ wa? Neghe yaneghe ŋkɛ kezha hawe yɛ va Shala Mahwətə ta ŋayɛ laka dzeghwa kwa hweŋkwa ta ŋkɛ, laka ɗe ba'a mene nda slene ke Shala Mahwətə ta ŋayɛ le wənəa ŋayɛ pɛtɛ, le nza ta ŋayɛ pɛtɛ,

¹³ laka mene slene le ghena nyi gezete Mahwətə ba'a wəshi mahalegə nyi ve ŋayɛ nyi 'ya ɓeshi, yitea nza yɛ mbe zeɗe nza.

¹⁴ Kaganda ne, Shala Mahwətə ta ŋayɛ ya kande sleke ghweme nya ɓalayɛ layɛ, hɛɗi ba'a pɛtɛa wəshi nyi te.

¹⁵ Ma vəashi ne, deke le ka shihɛ ŋayɛ jikəte geva Mahwətə, ghenci ya ɗehwe ŋkɛ. Ma kwa sebe ta nci, gheyɛ hwelefefia nci yantave ŋkɛ hwa kweci hwelefefi kala nya newe nya mbeli ɓeshi.

¹⁶ Nza mə kambeli nyi keveyi geva tekeleke fəyitekeghə kaŋa Shala ta ŋayɛ, zhɛnema yɛ kamene nda ntɛaŋentɛa ghə ma.

¹⁷ Va nya nza ŋkɛ ne, Shala Mahwətə ta ŋayɛ ya kaShala ta yɛ shala ba'a kaNde sleke ka sleke ŋkwa, kaShala nya wəba, nya berete ba'a nya ghazlənə mbeli ve, nya keɗema kanta ghala ba'a nya keɗema mbəɗəkwə.

¹⁸ Gheŋkɛ nde meha nda ghwə tiɗiɗi ke ka mezhɛtiti ba'a ka wedidi. Kancɛ nda ɗe ta ŋkɛ ŋkɛ ke ka se se nyi hwa gheyɛ laka ve nda wəsə kezeme ba'a lekwesa ke hɛ.

¹⁹ Ma gheyɛ perə gɛ ne, ɗe mə ka se se, kwa nza ŋkɛ kaka se se se yɛ te hɛɗia Ɛzhipte.

²⁰ Shala Mahwətə ta ŋayɛ yatehawe yɛ ve, gheŋkɛ yategwəɗəŋə yɛ kwa kema ta ŋkɛ, gheŋkɛ yateve nda ghəa ŋayɛ yɛ, te sləa ŋkɛ tezeme fela yɛ.

²¹ Gheŋkɛ yatetsahe yɛ, gheŋkɛ ya kaShala ta ŋayɛ, gheŋkɛ nya kemenete wəshi nyi jama jama ba'a nyi ghazlənə mbeli va hɛ nyi nakɛ nyi yɛ le ntsə ta ŋayɛ.

²² Deke mberefaŋemsə ka shihɛ ŋayɛ vəa ŋkwa nya dzawa Ɛzhipte hɛ. Ama tsetsenya ne, nahe Shala Mahwətə ta ŋayɛ keyate ŋayɛ kwele kwele kala saseregwa nyi te ghweme.