Daniyɛl 7 - Ghena ta Shala

Kwa ghate ta wəsə nya nakɛ Daniyɛl: wəshi keseɗa wəfaɗe

¹ Ma mbe kwa ghate ta va ta Baltazar kameghe mbe Babilone ne, pa Daniyɛl shiwəte shiwə ba'a nakɛ wəshi mbe mehele ta ŋkɛ, vəa ŋkwa nya nza ŋkɛ meɓelahe te gezle ta ŋkɛ. Tagha gɛ, pa rafete shiwəa shɛ.

² Wa nya nza ta wəsə nya ɓelate ŋkɛ nya: «Ma heviɗi ne, pa 'ya nakɛ sefə nya kese mbe bela ta hɛɗi wəfaɗe kawəvaɗe wəvaɗe ndərə nya wəba.

³ Pa wəshi keseɗa nyi jama jama wəfaɗe same kwa ndərə. Kwete shɛ keyipə le kwete we.

⁴ Nahe kwa ghate kenza kala nivɛrə ba'a nahe yɛ bidzəa zele kenza yite. Ma newe 'ya ne, pa yɛ bidzəa ŋkɛ nteɗehwe geva, pa sletakate geva sate te hɛɗi ba'a ghereŋenyɛ te seɗa bake kala wəndə ŋelɛ. Pa mehele ta wəndə ŋelɛ ndeke nda geva.

⁵ Nahe kwa bake ta wəsə keseɗa kenza kala mtsekwele. Pa nde ghereŋenyɛ te bela kwetɛŋe ba'a 'yɛ'yɛa slerepe mahekene ya mbe mɛ ve. Ma ke mbeli gezete nda: Sate megela gɛ ga! Zeme sli kwele kwele gɛ!

⁶ Ma newe 'ya kwa sebe ta ŋkɛ ne, pa 'ya nakɛ kwete wəsə keseɗa nya kala deghwava. Yɛ bidzəa 'yɛ ya wəfaɗe te wəmbəa ŋkɛ ba'a ghə wəfaɗe ya te wəsə keseɗa shɛ. Pa berete kesleke ŋkwa ndeke nda geva.

⁷ Ma newe 'ya heviɗi zhɛne ne, pa 'ya nakɛ kwa wəfaɗe ta wəsə keseɗa nya ghazlənə mbeli ve, nya kedake ŋkwa ba'a nya bereteke. Nahe slene nyi kwa mɛa ŋkɛ kenza kalɛ, kazeme ba'a kaslekwe yayata wəsə nya sləyi ŋkɛ, kaŋkeɗe nya ketene ŋkɛ le seɗa. Nahe ŋkɛ kenza tekeleke le kweci wəshi keseɗa nyi mahekene, tereme meŋe ya kwa.

⁸ Ma mba 'ya mbe newe teremea shɛhɛ ne, ntake kwete tereme mɛnɛfɛ, keɓɛhwɛnyɛ kapese kwelɛ kweci, pa nde betemte tereme mahekene. Ma te teremea shɛ ne, ntsə bake kala ŋa wəndə ŋelɛ ba'a mɛ nya kegeze ghena ŋkele ntsə ya shɛ.»

Meha ghwə ta Shala

⁹ Ma mba 'ya mbe newe ŋkwa ne, pa yɛ pasla beteyi geva ba'a pa meha za ntishɛnyɛ. Nahe lekwesa ta ŋkɛ kenza tɛawe tɛawe kala kwacakelɛ, shintia ghəa ŋkɛ kala shintia təmə nya wɛŋe. Ghwə nde tse kwa pasla ta ŋkɛ, nahe wəshi nyi kala yɛ seɗa ta wəmata yite kenza kaghwə nya wəba.

¹⁰ Ntake ghwə kahwɛ kala hələ kwa kema ta ŋkɛ. Mbeli tipə tipə ka ghereŋe kwa kema ta ŋkɛ kezha mene nda slene. Tagha gɛ, pa ka meha ghwə ntishɛ, pa yɛ palepa pelemte geva.

¹¹ Mba 'ya mbe newe ŋkwa, tewəmbəreke gaka ta ghena ŋkele ntsə nya geze nya tereme nya ɓɛhwɛa shɛ. Ma mba 'ya kanewe ŋkwa ne, pa mbeli peslekɛ kwa wəfaɗe ta wəsə keseɗa. Pa mbeli zamte geva ta ŋkɛ laka negha ŋkɛ mbe ghwə nya wəba.

¹² Pa berete ta kweci wəshi keseɗa shɛhɛ zamte geva, ama pa temə teghweme kavə ɓɛhwɛ ndeke nda geva ke hɛ hwa'a te və nya kesləyi geva.

¹³ Ma mba 'ya kanewe wəshi nyi kencɛ ɗa geva nyi heviɗi ne, pa 'ya nakɛ kwete wəsə kala wəndə ŋelɛ kase mbe ləmbə nya te ghweme. Hwa'a ŋkɛ ntsehe sha meha za, pa mbeli hendeyi ŋkɛ kwa kema ta ŋkɛ.

¹⁴ Pa ŋkɛ kemave berete, zləvə ba'a meghe. Tagha gɛ, ntake pɛtɛa hwelefefi, pɛtɛa hɛɗi ba'a pɛtɛa ghena kamene nda slene. Kaghala ghala tenza berete ta ŋkɛ, katekiɗi ŋkɛ we. Kateza sebe te meghea ŋkɛ tɛape we.

Ghena nya mbe kwa ghate ta wəsə nya nakɛ Daniyɛl

¹⁵ Ma 'ya, 'ya Daniyɛl ne, keyirə yirə se mehele ta ɗa tewəmbəreke wəsə nya nakɛ 'ya. Kwa nza ŋkɛ ne, nahe ŋkɛ kendeke ɗa ghazlənə.

¹⁶ Pa 'ya hendave nda geva ke kwete hwa mbeli nyi tagha ba'a 'yɛwete kaganda ta ghena nya mbe wəsə nya nakɛ 'ya. Tagha gɛ, ma ke ncɛte ɗa ghena nya mbe:

¹⁷ Ma wəshi keseɗa nyi jama jama nyi wəfaɗe nyi ne, ghenci ya kaka meghea kɛfi wəfaɗe nyi ketenca te hɛɗi lema.

¹⁸ Ma kwa sebe ta nci, ma mbeli nyi kaŋa Shala tehwə ghweme ne, katekemave meghe nya kaghala ghala ba'a nya kekiɗima hɛ.

¹⁹ Zhɛne ne, nahe 'ya keɗehwe kezha fave ghena nya mbe kwa wəfaɗe ta wəsə keseɗa nya tekeleke le kweci nyi mahekene. Nahe ŋkɛ kenza kawəsə kedake ŋkwa le yɛ slene lɛa ŋkɛ ba'a le yɛ pela mze kwa ghwə ghwəa ŋkɛ. Kazeme ba'a kaslekwe yayata wəsə nya sləyi ŋkɛ. Kaŋkeɗe nya ketene ŋkɛ le seɗa.

²⁰ Pa 'ya 'yɛwete ghena nya mbe tereme nyi meŋe kwa ghəa wəsə keseɗa shɛ, ghena nya mbe tereme nya kepesenyɛ ba'a nya kebetemte kweci tereme mahekene. Yɛ ntsə ba'a mɛ nya kegeze ghena ŋkele ntsə ya te teremea shɛ. Nahe ŋkɛ kenza wəba ma ke kweci.

²¹ Ma mba 'ya kanewe ŋkwa ne, ntake ŋkɛ kampa le mbelia Shala ba'a kahərə hɛ.

²² Ama pa meha za shɛ hendeke geva ba'a ndeke nda nza tiɗiɗi ke mbelia Shala tehwə ghweme. Ma kwa se və ne, pa mbelia Shala kemave meghe.

²³ Wa nya ghena nya gezete ɗa ŋkɛ nya: Ma kwa wəfaɗe ta wəsə keseɗa ne, nde wəfaɗe ta meghe nya kwake te hɛɗi, nya tekeleke le pɛtɛa kweci nde. Katezeme pɛtɛa hɛɗi ŋkɛ, kateŋkeɗe ŋkɛ ba'a katencɛhwe ŋkɛ.

²⁴ Ma ghena nya mbe tereme nyi meŋe ne, ka meghea kɛfi meŋe nyi ketedzedzete meghe. Ma nde meŋe kwetɛŋeghəmbe ta meghe nya tekeleke le kweci nyi keghate ne, kateŋka ka meghea kɛfi mahekene ŋkɛ.

²⁵ Kategeze ghena ŋkele ntsə ŋkɛ te Shala tehwə ghweme ba'a katesa nda yaka ŋkɛ ke mbelia Shala. Katekele zəzə ŋkɛ kezha zhɛre yɛ hɛa yɛ gəsəkə ba'a wəsə mahalegəa Shala. Katenza mbelia shɛhɛ mbe dzeve ta ŋkɛ kava mahekene ba'a kwete yite.

²⁶ Kwa sebe ta ŋkɛ ne, katemeha geva ghwə pelɛ ghweme ba'a katekelehwe berete ta ŋkɛ mbeli. Tsagha gɛ, kateza geva sebe te gheŋkɛ ba'a katenza ŋkɛ bətə fəyitekeghə.

²⁷ Kateve geva nda meghe, berete ba'a kwelea pɛtɛa hɛɗi ka meghe nyi te hɛɗi ke mbelia Shala tehwə ghweme. Katenza meghea nci kameghe nya kaghala ghala, katehawe pɛtɛa hɛɗia ka meghe va hɛ ba'a katemene nda slene hɛ ke hɛ.

²⁸ Teke kiɗi ghena shɛ. Ma 'ya, 'ya Daniyɛl ne, kwele kwele tazenji yɛ zəzə ta ɗa. Pa 'ya zhɛre ɗa tɛarawe rawe ba'a ntake 'ya kazəzə wəsəa shɛ.